Ko Hono Fakahoko ʻEtau Tukumoʻuí ʻi he ʻAho ki he ʻAho
1 Naʻe ueʻi ʻa e tokotaha-tohi-sāme ko Tēvitá ke fakahā kia Sihova: “Ko ia ai te u hiva ʻaki ho huafa maʻu pe, ʻo u fakaai ʻeku tukumoʻui hokohoko ʻaho pe.” (Sāme 61:8) Naʻe ʻilo ʻe Tēvita ko hono fai ko ia ha tukumoʻui ko ha meʻa ʻokú te loto-lelei kakato ki ai. Kae kehe, naʻá ne houngaʻia foki kapau te ne fai ha tukumoʻui, ʻokú ne moʻuaʻaki ke fakahoko ia. Ka neongo iá, naʻá ne fakamālō kia Sihova ki he faingamālie ke fakahoko ʻene ngaahi tukumoʻuí he ʻaho ki he ʻaho.
2 ʻI he taimi naʻa tau fai ai ʻetau fakatapui kia Sihová, naʻa tau tukumoʻui loto-lelei ke fai hono finangaló. Naʻa tau liʻaki atu kitautolu pea ʻai ʻa e tauhi kia Sihová ko ʻetau ʻuluaki meʻa ia ke tulimui ki ai ʻi he moʻuí. (Luke 9:23) Ko ia ai, kuo pau ke tau totongi maʻu pē ʻetau tukumoʻuí he ʻaho ki he ʻaho. (Koh. 5:4-6) Ko ʻetau fakahāhā ko ia ʻoku fai he taimi ʻo e papitaiso ʻi he vaí, kuo pau ke tapua atu ia ʻi heʻetau tōʻonga moʻuí kotoa, koeʻuhi ʻoku tau ʻilo “ʻoku fai ʻa e fakaha ʻaki ʻa e ngutu ke maʻu ʻa e fakamoʻui.” (Loma 10:10) ʻOku kau heni hono malangaʻi ʻa e ongoongo leleí. (Hep. 13:15) ʻOku faikehekehe lahi ʻa e ngaahi tuʻunga tāutahá, ka ʻi he ʻaho ki he ʻaho ko kitautolu kotoa ʻe lava ke tau hanganaki tokanga ai ki he mahuʻinga ʻo hono tufaki atu ʻa e ongoongo leleí ki he niʻihi kehé.
3 ʻAi ha Ngaahi Faingamālie ke Malanga he ʻAho Kotoa Pē: Ko hono tufaki atu ʻa e ongoongo leleí ki ha taha kehe ko ha meʻa fakafiefia ia. Ke fai ʻeni he ʻaho kotoa pē, tau ʻai ha ngaahi faingamālie ke malanga ʻi ha taimi pē ʻoku fakangofua ʻe hotau ngaahi tuʻungá. Kuo ʻi ai ʻa e fiefia ʻi he ngaahi meʻa lahi kuo hokosia ʻe he faʻahinga naʻa nau tomuʻa fai ha fakamoʻoni ʻikai ʻi he founga anga-mahení ki he tokotaha tāutaha he ngāué pe ʻi he ʻapiakó pea ki he ngaahi kaungāʻapí pe niʻihi kehe ʻoku nau fetaulaki he ʻaho taki taha. Naʻa mo hono fai ha ngaahi tohi pe ngāueʻaki ʻa e telefoní ko ha founga ia ke faifakamoʻoni ai ki he niʻihi kehé. Ko e ʻaonga ʻoku maʻu mei he kotoa ʻo e ngaahi foungá ni pea pehē ki hono vaheʻi maʻu pē ha taimi ke faifakamoʻoni mei he matapā ki he matapā pea fai ha ngaahi toe ʻaʻahí ʻe lava ke taki atu ki he fiefia makehe ʻe maʻu mei hono fai ha ako Tohitapu ʻi ʻapi. ʻIo, ʻi he ʻaho taki taha te tau fakatupunga nai ai ha ngaahi faingamālie ke malanga.
4 Ko ha tuofefine naʻá ne kamata lau ʻa e Ko Hono Vakaiʻi Fakaʻaho ʻa e Tohitapú he lolotonga ʻa e mālōlō ʻene ngāué. Naʻá ne fakaafeʻi ha kaungāngāue ke na lau ʻa e konga tohi ki he ʻaho ko iá, pea naʻe vave ʻa e iku atu ki ha ako Tohitapu mo e fefiné. Naʻá na ako haafe houa he ʻaho taki taha, ʻi he ʻaho ʻe nima he uiké. Naʻe fakatokangaʻi ʻe ha kaungāngāue ʻe taha ʻena ako he ʻaho kotoa pē. Naʻe faai atu ʻene fakahā ia ko ha tokoua ʻoku ʻikai longomoʻui. ʻI hono ueʻi ʻe he faivelenga ʻa e tuofefiné, naʻá ne fetuʻutaki leva ki ha tokotaha mātuʻa koeʻuhi ke ne hoko ʻo toe longomoʻui. Naʻe tākiekina pau ʻe he tuofefine ko ʻení ha moʻui ʻe toko ua ʻi ha founga pau koeʻuhi ko ʻene tutui atu ke fakahoko ʻene tukumoʻuí he ʻaho ki he ʻaho.
5 ʻI he taimi ʻoku ueʻi ai kitautolu ʻe ha loto ʻoku fonu he houngaʻia ki he ngaahi meʻa lelei kotoa kuo fai ʻe Sihova maʻatautolú, ʻo fakahoko ʻetau tukumoʻui fakatapuí ki he lelei taha te tau malava he ʻaho taki taha, ʻe ʻomai ai kiate kitautolu ʻa e loto-fiefia mo e fiemālie. Hangē ko e tokotaha-tohi-sāmé, ʻoku lava ke tau fakahā: “Kau fakafetaʻi ki he Afiona ʻaki hoku loto kotoa, ʻe Atonai ko hoku ʻOtua; ʻo fakahikihikiʻi ho huafa ʻo taʻengata.”—Sāme 86:12.