Puha Fehuʻi

◼ Ko e hā hono lōloa ʻoku totonu ke fai ai ha ako Tohitapu anga-maheni mo ha tokotaha ʻi he tohi ko e ʻIlo?

ʻOku tāpuakiʻi ʻe Sihova ʻa ʻene kautahá ʻi he ʻahó ni. ʻOku tau sio ki he fakamoʻoni ʻo e meʻá ni ʻi he taʻu taki taha, ʻi he laui mano ʻo e faʻahinga foʻou ʻoku nau tuʻu maʻá e moʻoní. Ko e tohi ko e ʻIlo ʻoku fakamoʻoniʻi ko ha meʻangāue ola lelei ia ʻi hono fakahoko ʻa e meʻá ni. Ko e tatau ʻo e Taua Leʻo ʻo Fepueli 1, 1996, ʻoku fakahaaʻi ai ko e tohí ni ʻoku faʻu iá ke tokoniʻi ha tokotaha ako Tohitapu ke vave ʻene fakalakalaka fakalaumālié, mahalo pē ki ha tuʻunga ke papitaiso ʻi ha ngaahi māhina siʻi.

ʻI he ʻuhingá ni, naʻe fakahinohino mai ʻe he Taua Leʻo tatau, ʻi he peesi 16: “ʻI he ʻosi kakato ʻo e ako Tohitapu ʻa ha tokotaha ʻi he tohi ko e ʻIlo pea kuó ne papitaiso, ʻe ʻikai toe fiemaʻu nai ke fai ha ako mo ia ʻi he tohi hono uá.”

Fēfē ha tokotaha ʻoku teʻeki ke papitaiso hili ʻa hono fakakakato ʻa e tohi ko e ʻIlo? Ko ʻEtau Ngāue Fakafaifekau ʻo e Puleʻanga ʻo Sune 1996, peesi 6, palakalafi 23, naʻe fakamanatu mai ai kiate kitautolu ʻa e poini naʻe ʻomai ʻi he Taua Leʻo ʻo fekauʻaki mo e ʻikai ke ako ha toe ngaahi tohi kehe mo e tokotaha ako tatau hili hono fakakakato ʻa e tohi ko e ʻIlo. ʻOku ʻuhinga iá ʻoku ʻikai ke tau mahuʻingaʻia ʻi hono tokoniʻi ha tokotaha ako Tohitapu ke lahi ange ʻi he tuʻungá ni? ʻIkai. ʻOku tau fiemaʻu ʻa e kakaí ke maʻu ha ʻilo tefito ʻo e moʻoní. Kae kehe, ʻoku ʻamanekiná fakafuofua ki ha vahaʻa taimi nounou, ko ha faiako lelei te ne malava ke tokoniʻi ha tokotaha loto-totonu ke maʻu ha ʻilo feʻunga ke fai ha fili fakapotopoto ke tauhi ʻa Sihova. Mahalo pē koeʻuhi ko honau ngaahi tuʻunga fakafoʻituituí, ko e kau ako Tohitapú ʻe aʻu ʻo nau loto ke ako lahi ange ʻi he tuʻo taha ʻi he uiké.

Ko hono moʻoní, ko e kau ako ʻe niʻihi te nau fakalakalaka māmālie ange ʻi he niʻihi kehé. Ka ʻo kapau ʻi he hili hono ako ʻa e tohi ko e ʻIlo, ʻa ia ʻe fai ʻo lōloa ange ia ʻi he taimi anga-mahení, kuo ʻikai ke fakakaukau ʻa e tokotahá ia ʻokú ne fie hoko ʻo feohi mo e fakatahaʻangá, ʻoku totonu ke fetalanoaʻaki ʻa e tokotaha malangá mo ha taha ʻo e kau mātuʻa ʻi he Kōmiti Ngāue ʻa e Fakatahaʻangá. Kapau ʻoku kau ai ha ngaahi tuʻunga fakamaʻamaʻaʻi pe angakehe, ʻe fiemaʻu nai ha tokoni lahi ange. ʻOku fehoanakimālie ʻeni mo e tefitoʻi moʻoni ʻo e meʻa kuo fakahā ʻi he palakalafi 11 mo e 12 ʻi he peesi 16 ʻo e Taua Leʻo ʻo Fepueli 1, 1996.

Ko e houngaʻia ʻi hono akó naʻa mo ha ʻilo tefito ʻo e moʻoní, ʻoku totonu ke ne ueʻi ʻa e tokotaha akó ke ne maʻu ʻa e ngaahi fakataha faka-Kalisitiané. ʻE lava ke tataki atu ai ʻa e tokotaha akó ke ne fai ha fakamoʻoni māʻalaʻala ʻo ʻene holi ke tauhi ʻa Sihová. Kapau ʻoku ʻikai hā mai ha houngaʻia fakalaumālie pehē hili hono ako ʻa e tohi ko e ʻIlo ʻi ha vahaʻa taimi lōloa, ʻe fakapotopoto nai ke taʻofi ʻa e akó.