Ko Hono Fai ʻa e Ngaahi Ako Tohitapu Fakalakalaka ʻi ʻApí

¹ Ko e hā ʻa e meʻa ʻoku faitatau ai ha neesi ʻi Tenisania, ko ha finemui ʻi ʻĀsenitina, pea mo ha faʻē ʻi Lativia? ʻOku līpooti ʻe he 1997 Yearbook (p. 8, 46, mo e 56) ko e toko tolú ni kotoa naʻa nau fai ʻi heʻenau ngaahi ako Tohitapu ʻi ʻapí ha fakalakalaka vave ʻaupito, mālō ia ʻenau loto-lelei ke fai ʻi he tohi ʻIlo ʻo laka hake ʻi he konga ʻe taha ʻi he uike taki taha. Kuo faʻa fokotuʻu atu kapau ʻe malava, ʻoku totonu ke feinga ʻa e kau malangá ke fakamatalaʻi ʻa e vahe ʻe taha ʻo e tohí he lolotonga ʻo e lēsoni ako taki taha. Kae kehe, ʻoku ʻilo ʻe he niʻihi ko ha pole ia ke fai pehē. Neongo ko e lahi tahá ʻe fakatuʻunga ʻi he ngaahi tuʻunga pea mo e ngaahi malava ʻa e tokotaha ako taki taha, ko e kau faiako taukeí kuo nau ʻilo ʻoku lavameʻa ʻa hono ngāueʻaki ʻa e ngaahi fokotuʻu hono hokó.

² Hangē ko ia naʻe fakahaaʻi ʻi he fakalahi ʻo ʻEtau Ngāue Fakafaifekau ʻo e Puleʻanga ʻo Sune 1996, ʻoku fiemaʻu ke akoʻi hoʻo kau akó ke nau teuteu ki he akó. ʻI he kamataʻangá pē, ʻe lelei ke fakamatalaʻi pea fakahāhaaʻi ʻa e founga ʻo hono fai ʻení. Fakahā ange kiate kinautolu hoʻo tatau ako fakafoʻituitui ʻo e tohi ʻIlo. Teuteu fakataha ʻa e ʻuluaki lēsoní. Tokoniʻi ʻa e tokotaha akó ke ne ʻilo ʻa e ngaahi lea tefitó pe ngaahi kupuʻi lea ʻokú ne tali hangatonu ʻa e fehuʻi ʻoku hikí pea toki laineʻi pe fakaʻilongaʻi kinautolu. Ko e kau malanga ʻe niʻihi kuo aʻu ʻo nau ʻoange ki heʻenau kau akó ha peni-fakaʻilonga. Fakalototoʻaʻi kinautolu ke nau sio ki he ngaahi konga Tohitapú kotoa ʻi heʻenau teuteu ki he akó. ʻI hono fai ʻení, te ke toe akoʻi ai kinautolu ke nau teuteu ki hono maʻu ʻa e Ako Tohi ʻa e Fakatahaʻangá pea mo e Ako Taua Leʻo.​—Luke 6:​40.

³ Ko ha faiako lelei te ne ʻai ʻa e tokotaha akó ke ne lea tauʻatāina kae ʻoua ʻe fuʻu lahi ʻene lea ʻaʻaná. Te ne fakaʻehiʻehi mei haʻane afe ki he ngaahi poini iikí. ʻE tātātaha haʻane tānaki mai ha fakamatala kehe. Ka, ʻokú ne fakaeʻa ʻa e ngaahi poini tefito ʻo e lēsoní. ʻOku ʻoatu ʻe he niʻihi ki he kau akó ha ngaahi tohi ʻo tānaki atu ki ai ke tokoniʻi kinautolu ki hono maʻu ʻa e tali ki he ngaahi fehuʻí. Pehē foki, ko e faʻahinga mahuʻingaʻiá te nau maʻu ʻo tānaki atu ki ai ha fakamatala fakaikiiki fakafou ia ʻi hono maʻu ʻa e ngaahi fakataha ʻa e fakatahaʻangá.

⁴ ʻE ʻikai nai ke fiemaʻu ke sio kotoa ki he ngaahi konga Tohitapu ʻoku lave ki ai ʻi he lēsoní. Ko e ngaahi poini tefito ʻe niʻihi ʻe fakamatalaʻi nai ia mei he ngaahi konga tohi ʻoku hiki ʻi he palakalafí. ʻI he lolotonga ʻo e fakamanatú, fakaeʻa ʻa e ngaahi konga Tohitapu tefito naʻe fakamatalaʻí pea fakalototoʻaʻi ʻa e tokotaha akó ke ne fakamanatuʻi kinautolu.

⁵ Ko e Hā Hono Lōloa ʻOku Totonu ke Fakahoko Ai ʻa e Konga Taki Taha?: Ko e akó ʻoku ʻikai fiemaʻu ke fakangatangata pē ki he houa ʻe tahá. Ko e faʻahinga ʻe niʻihi ʻi he ngaahi ʻapí ʻoku ʻi ai ʻa e taimi ʻatā pea ʻoku nau loto nai ke lōloa atu ʻenau akó. Pe ko e tokotaha akó ʻokú ne fakaʻamu ʻe ia ke ako lahi ange ʻi he tuʻo taha he uiké. ʻE ʻaonga ʻeni ki he faʻahinga ko ia ʻoku lava ke nau fai peheé.

6 Hangē ko ia ʻoku fakamatalaʻi ʻe he Aisea 60:​8, ʻi he ʻahó ni ʻoku laui kilu ʻa e kau fakahīkihikiʻi foʻou ʻo Sihova “ʻoku puna hange ko e ʻao, pe hange ko e fanga lupe ki honau ngaahi tupa” ʻi loto ʻi he ngaahi fakatahaʻanga ʻo hono kakaí. Ke fai kotoa ʻe kitautolu ʻetau tafaʻakí ʻi he ngāue fekoekoeʻi fakataha mo Sihova ʻi heʻene fakavaveʻi ʻa hono tānaki mai ʻa e faʻahinga hangē ha sipí.​—Ai. 60:22.