Ko e Hā ʻOku Tau Hanganaki Toe Foki Aí?
1 Kuó ke ʻeke ʻa e fehuʻi ko iá kiate koe, mahalo ʻi hoʻo teuteu ki ha ʻaho ʻi he ngāue fakamalangá? ʻI he ngaahi feituʻu ʻe niʻihi ʻa ia ʻoku toutou ngāueʻi ai hotau feituʻú, ʻoku ʻilo nai kitautolu ʻe he ngaahi ʻapí pea vave ʻenau fakasītuʻaʻi kitautolú. Ko ha tokosiʻi pē te nau tali nai ʻi ha founga lelei. Ka, ʻoku ʻi ai ʻa e ngaahi ʻuhinga mālohi lahi ʻoku tau hanganaki toe foki aí.
2 Ko e ʻuluaki meʻá, ʻoku fekauʻi kitautolu ke tau hokohoko atu hono malangaʻi ʻa e pōpoaki ʻo e Puleʻangá kae ʻoua ke hoko mai ʻa e ngataʻangá. (Mt. 24:14; 28:19, 20) Naʻe fifili ʻa e palōfita ko ʻAiseá pe ko e hā ʻa e lōloa te ne hokohoko atu ai ʻene ngāue fakamalangá. Ko e tali naʻá ne maʻú ʻoku hiki ia ʻi he Aisea 6:11. ʻOku ʻikai ha toe fehuʻi fekauʻaki mo ia—naʻe talaange kiate ia ke ne hanganaki toe foki ki he kakaí mo e pōpoaki ʻa e ʻOtuá. ʻOku pehē pē ʻi he ʻahó ni, neongo te nau fakasītuaʻi nai kitautolu, ʻoku ʻamanekina mai ʻe Sihova te tau hokohoko atu ʻa e ʻaʻahi ki he kakai ʻoku nau nofo ʻi hotau feituʻú. (Isi. 3:10, 11) Ko ha fatongia toputapu ʻeni kuo tuku mai kiate kitautolu.—1 Kol. 9:17.
3 Ko e ʻuhinga ʻe taha kiate kitautolu ke tau hanganaki toe foki aí he ʻoku ʻomai ai kiate kitautolu ʻe he meʻá ni ha faingamālie ke fakahā ai ʻa hono lahi ʻo ʻetau anga-līʻoa kia Sihová. (1 Sione 5:3) ʻI he tafaʻaki ʻe tahá, ʻi heʻetau fakakaukau atu ki he meʻa ʻoku tuku tauhi mei he kahaʻu ofi maí maʻá e faʻahinga ʻo e tangatá, ʻe lava fēfē ke tau taʻotaʻofi kitautolu mei ha feinga anga-ʻofa ke faifakatokanga ki hotau ngaahi kaungāʻapí? (2 Tim. 4:2; Sem. 2:8) Ko ʻetau faitotonu ʻi hono fakahoko ʻetau ngāue kuo vaheʻi maí ʻoku tokonaki mai ai ha faingamālie lōua kiate kinautolu ke nau tali ʻa e pōpoaki ʻa e ʻOtuá ki he fakamoʻuí, koeʻuhi ke ʻoua te nau lava ʻo pehē, naʻe ʻikai ha fakatokanga kiate kinautolu.—Isi. 5:13.
4 Tānaki atu ki ai, ʻoku ʻikai te tau teitei ʻiloʻi ʻa e taimi ʻe liliu ai ʻa e loto ʻo e kakai ʻe niʻihi. ʻE lava ke hoko vave ia ʻi ha liliu ʻi honau ngaahi tuʻunga fakafoʻituituí, ko ha meʻa fakamamahi ʻoku hoko ʻi honau fāmilí, pe ko e ngaahi tuʻunga ʻo e māmaní ʻa ia ʻokú ne ueʻi ai kinautolu ke nau fakakaukau fakamātoato ʻo kau ki honau kahaʻú. ʻI he tafaʻaki leva ʻe tahá, ko ha meʻa ʻoku tau leaʻaki ʻi honau ngaahi matapaá ʻe langaʻi nai ai ha tali lelei. (Koh. 9:11; 1 Kol. 7:31) ʻIkai ko ia pē, ʻoku fehikiʻaki ʻa e kakaí. Te tau ʻilo nai ha kakai foʻou ʻi hotau feituʻú ʻa ia te nau tali ʻa e ongoongo leleí—mahalo ko ha tamaiki lalahi ʻoku nau nofo fakaekinautolu pē pea ʻoku nau fakakaukau fakamātoato ʻo kau ki heʻenau taumuʻa ʻi he moʻuí.
5 Te tau hanganaki toe foki? ʻIo! ʻOku ʻomai ʻe he ngaahi Konga Tohitapú kiate kitautolu ha ʻuhinga feʻunga ke toutou toe foki ai ki he kakaí. ʻI he ngataʻangá, ʻi he taimi ʻe ʻosi ai ʻa e ngāue fakamalangá, ʻe tāpuakiʻi kitautolu ʻe Sihova koeʻuhi ko ʻetau feinga hokohoko ʻi he ngāue fakafaifekaú, pea te ne tāpuakiʻi ʻa e faʻahinga ʻoku nau tali loto-hounga ʻa e ongoongo lelei ʻo e Puleʻangá.—1 Tim. 4:16.