Faifakamoʻoni ʻi ha Feituʻu Pē ʻOku ʻI Ai ha Kakai
1 ʻI hono ʻiloʻi ʻa e ngafa ʻoku fai ʻe he laumālie ʻo e ʻOtuá ki heʻene ngāue fakafaifekaú, naʻe pehē ʻe he ʻaposetolo ko Paulá: “Kae ʻa e ʻOtua ai pe ʻa e fakatupu.” Naʻá ne ʻilo foki: ‘Ko e kau kaungāngaue kitautolu mo e ʻOtuá.’ (1 Kol. 3:5-9) Ko ha monū fakaofo ʻeni. ʻE lava fēfē ke tau fakahāhā ki he kakaí ʻoku tau houngaʻia ʻi he hoko ko e kau kaungāngāue mo e ʻOtuá? ʻAki hono talaki atu ʻa e ongoongo leleí kiate kinautolu kotoa pē te tau fetaulaki mo ia ʻi he ngāue fale-ki-he-falé mo ha feituʻu pē.
2 ʻOku fekauʻi kitautolu ke ‘ngaohi ʻa e ngāhi kakai kotoa pe ko e kau ako.’ (Mt. 28:19) Kapau ʻoku tau feʻiloaki pē mo ha kakai tokosiʻi ʻi he taimi ʻoku tau kau ai ki he ngāue fakafaifekaú, te tau foʻi vave pea ongoʻi ʻoku tau fakahoko pē ha meʻa siʻi. ʻI he tafaʻaki ʻe tahá, ʻoku tau maʻu ʻa e fiefia lahi ʻi heʻetau ngāue fakafaifekaú ʻi he taimi ʻoku tau malava ai ke maʻu ha kakai tokolahi pea fetalanoaʻaki mo kinautolu. ʻE lava ke hoko ʻeni ko ha pole, koeʻuhi ʻoku fiemaʻu ke kamata ʻi heʻetau tafaʻakí ke tau ʻalu ki ha feituʻu pē ʻoku ʻi ai ha kakai koeʻuhi ke lava ke tau feʻiloaki mo kinautolu.
3 Ngaahi Faʻifaʻitakiʻanga ʻAonga: ʻE lava ke tau faifakamoʻoni ki he kakai ʻi he ngaahi māketí, ngaahi paʻaké, ngaahi feituʻu mālōlōʻangá, mo e ngaahi tauʻanga meʻalelé. ʻI he taimi ʻokú ke heka ai ʻi he meʻalele uta pāsesé, ʻokú ke mateuteu ke fai ha fakamoʻoni he lolotonga ʻa e fonongá? Ko ha ongo Fakamoʻoni ʻe toko ua naʻá na heka ʻi ha pasi naʻe fonu heʻena ʻalu ki he faiʻanga fakataha ki he malangá, naʻá na fai ha fetalanoaʻaki fekauʻaki mo e fakatātā ʻo e Palataisí ʻi he tohi ʻIlo, ʻo fakamatalaʻi ai ʻa e ngaahi talaʻofa ʻa e ʻOtuá ki he kahaʻú. Hangē ko ia naʻá na ʻamanekina ʻe hokó, ko ha tangata kei talavou naʻá ne tuʻu pē ʻo ofi mai ʻo ne fanongo pea naʻe maongo ki ai ʻa e meʻa naʻá ne fanongo ki aí. Ki muʻa ke ne hifo mei he pasí, naʻá ne tali ha tohi peá ne kole ke ʻaʻahi ange ha taha ki hono ʻapí.
4 Kuo maʻu ʻe he kau malanga tokolahi ʻa e fiefia ʻi hono fai ʻa e fakamoʻoni ʻi he founga ʻikai anga-mahení. Naʻe ʻalu ha tuofefine ʻe taha ki ha senitā fefakatauʻaki fakalotofonua ʻi he hoʻatā ʻe taha peá ne lea ai ki he kakai kuo ʻosi ʻenau fakataú ka naʻe ʻikai ke hā mai ʻoku nau fakavavevavé. Naʻá ne tufa kotoa ʻa e ngaahi tohi ʻi heʻene kató. Ko ha tangata ʻe taha naʻá ne tatali pē ʻi heʻene kaá naʻá ne fiefia ke ne tali ha ngaahi makasini meiate ia. Naʻá ne maʻu ʻa e ngaahi fakatahá ki muʻa, pea ko ʻena fetalanoaʻakí naʻe langaʻi ai ʻene mahuʻingaʻiá.
5 Ko ha monū ia ke hakeakiʻi ʻa e huafa ʻo Sihová. ʻI hono fakahāhā ʻetau faivelenga ki he ngāue fakamalangá, ʻoku tau fakahā ai ʻoku ʻikai ke tau liʻaki ʻa e taumuʻa ʻo e ʻofa maʻataʻatā ʻa e ʻOtuá kiate kitautolú. Koeʻuhi “ko eni pe taimi matuʻaki tali hu” ke tokoniʻi ai ʻa e niʻihi kehé, ʻai ke tau ʻalu ki ha feituʻu pē ʻoku ʻi ai ha kakai pea faifakamoʻoni kiate kinautolu fekauʻaki mo e “ʻaho fai fakamoʻui” ʻa Sihová.—2 Kol. 6:1, 2.