Ko e Akoʻanga Fakafaifekau Fakateokalati ki he 1998
Ke akó ʻoku ʻuhingá ke “akoʻi pe toutou ako ke maʻu ha ʻilo pau pe pōtoʻi.” Fakafou ʻi he Akoʻanga Fakafaifekau Fakateokalatí, ʻoku akoʻi maʻu pē ai kitautolu ki he ʻiloʻi ʻo e ʻOtuá. ʻIkai ko ia pē, ko ʻetau kau ki he akoʻanga ko ʻení ʻokú ne fakaʻatā ai kitautolu ke tupulekina ʻetau pōtoʻi leá mo e faiakó. Ko e polokalama ʻo e akoʻangá ki he 1998 te ne tokonaki mai maʻatautolu ʻa e ngaahi faingamālie lahi ke fai ha laka ki muʻa fakalaumālie lahi ange.
ʻI hoʻo vakaiʻi ʻa e fakahokohoko ʻa e akoʻangá ki he taʻu hoko maí, te ke fakatokangaʻi ko e Konga Fika 1 ʻoku faʻa makatuʻunga ia ʻi ha kupu mei he Taua Leʻo. Ko e Konga Fika 4 ʻoku vaheʻi nai ia ki ha tokoua pe ko ha tuofefine. Kapau ʻoku fai ia ʻe ha tokoua, ʻoku totonu ke ne fai ia ko ha malanga ki he fakatahaʻangá, ʻo ʻikai ko hano ngāueʻaki ha fokotuʻutuʻu kehe. Pea ko ha fakamanatu pē, ʻoku ʻikai ha taha ʻi he polokalama ʻo e akoʻangá ʻoku totonu ke ne ʻovataimi.
Ko ha Meʻa Foʻou: Ki ha lelei fakafoʻituitui maʻatautolu, ko ha “Fakalahi ʻo e Fakahokohoko ki he Lau Tohitapu” ʻoku fokotuʻu atu ʻi he pelēketi hili pē ʻa e fika ʻo e hiva ki he uike taki taha. Neongo ʻoku ʻikai ha konga ʻi he polokalama fakauike ʻo e akoʻangá ʻoku makatuʻunga ai, ʻai ia ko hoʻo kolo ke muimui ki ai. ʻE malava ai heni kiate koe ke ke angaʻaki ʻa hono lau fakaʻaho ʻa e Tohitapú kapau ʻoku teʻeki ai ke ke fai pehē.
Ki ha fakamatala lahi ange fekauʻaki mo e ngaahi kongá, akonakí, pea mo e fakamanatu tohinimá, kātaki ʻo lau fakalelei ʻa e ngaahi fakahinohino ʻoku maʻu ʻi he “Fakahokohoko ʻa e Akoʻanga Fakafaifekau Fakateokalati ki he 1998,” pea pehē foki ki he peesi 3 ʻi he ʻEtau Ngāue Fakafaifekau ʻo e Puleʻanga ʻo ʻOkatopa 1996.
Kapau ʻoku teʻeki ai ke ke kau ki he Akoʻanga Fakafaifekau Fakateokalatí, ʻoku mau fakaafeʻi atu koe ke ke kau ki ai he taimí ni. Ko e akoʻanga taʻefakatataua ko ʻení ʻoku hokohoko atu ia ʻi hono fakahoko hono ngafa mahuʻinga ki hono akoʻi ʻo e kau sevāniti mateaki mo anga-fakatōkilalo ʻa Sihová ke nau hoko ʻo taau lelei ange ko ʻene kau faifekau.—1 Tim. 4:13-16.