Ke “ʻAsili” Hono Maʻu ʻa e Ngaahi Fakatahá
1 ʻOku mātuʻaki mahuʻinga maʻu pē ʻa e fakataha fakatahá ki he kakai ʻa Sihová. Naʻe maʻu ʻe he kau ʻIsilelí ʻa e temipalé mo honau ngaahi sinakoké ko ha senitā ia ki he lotu moʻoní, ako fakaʻotuá, pea mo e feohi fiefiá. ʻI he founga meimei tatau, naʻe ʻikai ke liʻaki ʻe he muʻaki kau Kalisitiané ʻa e fakatahataha fakatahá. Koeʻuhi ko e tupulekina ʻa e fakafeʻātungiá mo e ngaahi ʻahiʻahí ʻi he ngaahi ʻaho faingataʻa fakaʻosí ni, ʻoku fiemaʻu foki kiate kitautolu ʻa e fakaivimālohi fakalaumālie, ʻa ia ʻoku tokonaki mai ʻe heʻetau ngaahi fakataha ʻi he fakatahaʻangá—pea ʻoku “ʻasili” hono fiemaʻu ia kiate kitautolú. (Hep. 10:25) Fakatokangaʻi ʻa e ʻuhinga ʻe tolu ʻo e ʻuhinga ke tau maʻu ai ʻa e ngaahi fakatahá.
2 Ki he Feohi: ʻOku akonakiʻi kitautolu ʻe he ngaahi Konga Tohitapú ke “fetokoniʻaki kimoutolu, pea fefaiʻaki homou langa hake.” (1 Tes. 5:11) Ko e feohi fakaʻotuá ʻokú ne fakafonu hotau ʻatamaí ʻaki ʻa e ngaahi fakakaukau lelei pea ueʻi kitautolu ke fai ʻa e ngaahi ngāue lelei. Ka ʻo kapau ʻoku tau fakamavaheʻi kitautolu, te tau angaʻaki ke fakakaukauʻi ʻa e ngaahi fakakaukau fakasesele, siokita, pe naʻa mo taʻetaau.—Pal. 18:1.
3 Ki he Fakahinohino: ʻOku tokonaki mai ʻe he ngaahi fakataha faka-Kalisitiané ha polokalama hokohoko ʻo e fakahinohino faka-Tohitapu ʻoku faʻu ke hanganaki tauhi ʻa e ʻofa ki he ʻOtuá ke moʻui ʻi hotau lotó. ʻOku nau ʻomai ʻa e faleʻi ʻaonga ki hono ngāueʻaki ʻa e “finagalo kotoabe oe Otua.” (Ng. 20:27, PM) ʻOku akoʻi kitautolu ʻe he ngaahi fakatahá ki he pōtoʻi ʻi he malangá mo e faiakoʻaki ʻa e ongoongo leleí, ʻoku ʻāsili ʻa hono fiemaʻu ʻa e pōtoʻí he taimí ni ke aʻusia ʻa e fiefia taʻeala fakamatalaʻi ʻi hono maʻu mo tokoniʻi ʻa e faʻahinga te nau talitali lelei ʻa e moʻoni ʻo e Tohitapú.
4 Ki he Maluʻi: ʻI he māmani fulikivanu ko ʻení, ko e fakatahaʻangá ko ha hūfangaʻanga fakalaumālie moʻoni—ko ha taulangaū ʻo e melino mo e ʻofa. ʻI he taimi ʻoku tau maʻu ai ʻa e ngaahi fakataha ʻa e fakatahaʻangá, ʻoku tākiekina mālohi ai kitautolu ʻe he laumālie māʻoniʻoni ʻo e ʻOtuá, ʻo fakatupu ai ʻa e fua ko e “ʻofa, loto-fiefia, melino, kātaki-fuoloa, angaʻofa, anga-lelei, tui, anga-malū, mapuleʻi-kita.” (Kal. 5:22, 23, NW) ʻOku fakaivimālohiʻi kitautolu ʻe he ngaahi fakatahá ke tau tuʻu maʻu mo fefeka ʻi he tuí. ʻOku nau teuʻi kitautolu ke hoko ʻo mateuteu ki ha ngaahi ʻahiʻahi mei muʻa.
5 ʻI hono maʻu maʻu pē ʻa e fakatahá, ʻoku tau hokosia ai ʻa e meʻa naʻe fakamatalaʻi ʻe he tokotaha-tohi-sāmé, ʻo hangē ko ia ʻoku hiki ʻi he Sāme 133:1, 3: “Vakai, hono ʻikai lelei, pea hono ʻikai sai ke nonofo ha kainga, ʻo fakataha foki!” Pe ko fē pē ha feituʻu ʻoku ngāue mo fakataha fakatahataha ai ʻa e kakai ʻa e ʻOtuá he ʻahó ni, “ko e potu ia naʻe tuʻutuʻuni ai ʻe Sihova hono tapuekina, ko e moʻui ʻo taʻengata.”—Fakaʻītali ʻamautolu.