Puha Fehuʻi

◼ Ko e hā ʻe lava ke tau fai ke tokoni ki hono fakaleleiʻi ʻa e tuʻunga ola lelei ʻo ʻetau ngaahi fakatahá?

ʻOku hehema nai ʻa e niʻihi ke ongoʻi ko e kau mātuʻá mo e kau sevāniti fakafaifekaú pē ʻoku fakafatongiaʻaki ki he lavameʻa ʻa e ngaahi fakataha ʻa e fakatahaʻangá koeʻuhí he ʻoku nau ngāueʻi kinautolu pea fai ʻa e lahi taha ʻo e ngaahi kongá. Ko hono moʻoní, ko e kotoa ʻo kitautolú ʻe lava ke tau tokoni tāutaha ki he mahuʻinga mo e ʻaonga ʻo e ngaahi fakatahá. ʻOku lava ke tau tokoni ke ʻai ʻa e ngaahi fakatahá ke ola lelei ange ʻi he founga ʻe hongofulu hoko haké:

Teuteu ki muʻa. ʻI he taimi ʻoku tau teuteu lelei aí, ʻoku puke ʻe he ngaahi fakatahá ʻetau mahuʻingaʻiá. ʻI he taimi ʻoku fai ai ʻeni ʻe he kotoa ʻo kitautolú, ʻoku longomoʻui ange ai ʻa e ngaahi fakatahá pea fakatupu langa hake lahi ange. Maʻu maʻu pē. Ko ha kau maʻu fakataha tokolahi ange ʻoku fakalototoʻa ange ia ki he tokotaha kotoa pē ʻoku ʻi aí, ʻo fakaivimālohiʻi ʻa e houngaʻia ki he mahuʻinga ʻo hono maʻu iá. Aʻu taimi totonu. Kapau ʻoku tau ʻi hotau nofoʻangá ki muʻa ke kamata ʻa e polokalamá, ʻe lava ke tau kau ʻi he hiva kamatá mo e lotu kamatá pea maʻu ai ʻa e ʻaonga kakato mei he fakatahá. Haʻu kuo ʻosi mateuteu lelei. ʻI hono ʻomai ʻetau Tohitapú pea mo e ngaahi tohi ʻoku ngāueʻaki he lolotonga ʻo e fakatahá, ʻe lava ke muimui fakataha pea maʻu lelei ange ʻa e meʻa ʻoku fai ki ai ʻa e fakamatalá. Fakaʻehiʻehi mei he fakahohaʻá. ʻOku tau fanongo lelei ange nai ʻi he taimi ʻoku tau tangutu hangatonu aí. Ko e fanafana mo e toutou ʻalu ki he falemālōloó ʻe lava ke ne ʻai kitautolu pea mo e niʻihi kehé ke mole ʻa e tokangatahá. Hoko ko ha tokotaha kau ki ai. ʻI he tokolahi ange ʻo kitautolu ʻoku hiki hotau nimá pea fai ha talí, ʻoku fakalototoʻaʻi ange ai ʻa e tokolahi pea langa hake ʻaki ʻa e fakahāhā ʻo e tuí. Fai ha tali nounou. ʻOku ʻoatu ai heni ha faingamālie ki he tokolahi taha ʻe malavá ke kau ki ai. ʻOku totonu ke fakangatangata ʻetau tali nounoú ki he fakamatala ʻoku lolotonga akó. Fakahoko ʻa e ngaahi kongá. ʻI he tuʻunga ko e kau ako ʻi he Akoʻanga Fakafaifekau Fakateokalatí pe ko ha faʻahinga ʻoku kau ki he Fakataha Ngāué, teuteu lelei, ʻahiʻahiʻi ki muʻa, pea feinga ke ʻoua ʻe kaniseli. Fakaongoongoleleiʻi ʻa e faʻahinga ʻoku kau ki aí. Tala ange ki he niʻihi ʻa e lahi ʻo e houngaʻia ʻi heʻenau ngaahi feingá. ʻOku langa hake ai heni kinautolu pea ueʻi ai kinautolu ke nau toe fai lelei ange ia ʻi he kahaʻú. Fefakalototoʻaʻaki. Ko e fefakafeʻiloaki anga-ʻofa mo e fetalanoaʻaki langa hake ki muʻa pea mo e hili ʻa e ngaahi fakatahá, ʻoku tānaki atu ia ki he fiefia mo e ʻaonga ʻoku tau maʻu mei he maʻu ʻa e ngaahi fakatahá.