Takimuʻa ʻa e Kau ʻOvasiá—Ko e ʻOvasia Ngāué
1 ʻOku mahuʻingaʻia ʻaupito ʻa e ʻovasia ngāué ʻi he ngaahi meʻa kotoa pē ʻoku fekauʻaki mo e laka ki muʻa ʻa e ngāue fakaʻevangelioó ʻi he feituʻu ʻoku vaheʻi ki he fakatahaʻangá. ʻOkú ne fakahoko foki ha ngafa mahuʻinga ʻi hono tokoniʻi kitautolu ke tau fakahoko hotau fatongia ko hono malangaʻi ʻa e ongoongo leleí. ʻI he tuʻunga ko ha tokotaha ʻevangeliō faivelenga, ʻokú ne takimuʻa ʻi hono fokotuʻutuʻu ʻa e kotoa ʻo e ngaahi meʻa fekauʻaki mo e ngāue fakamalangá. ʻI he tuʻunga ko ha faiako taukeí, ʻokú ne tokoniʻi ʻa e kau malanga tāutaha ke fakaleleiʻi ke ola lelei ʻenau ngāue ʻi he ngāue fakafaifekaú.—Ef. 4:11, 12.
2 ʻOku tokangaʻi fakahangatonu ʻe he tokotaha mātuʻa ko ʻení ʻa e ngāue ʻa e kau sevāniti fakafaifekau ʻoku vaheʻi ke nau tokangaʻi ʻa e ngaahi tohí, ngaahi makasiní, mo e ngaahi feituʻú. ʻOku fakafatongiaʻaki ia ke ne fakapapauʻi ʻoku ala maʻu ha ngaahi tohi, ngaahi makasini, mo e ngaahi foomu ngāue feʻunga ki he māhina taki taha ki heʻetau ngāueʻakí. Tuʻo taha ʻi he taʻu, ʻokú ne vakai ai ki he faile fakafeituʻú ki he kotoa ʻo e ngaahi tuʻasila ʻo e ngaahi ʻapi ʻa ia kuo tala mai ke ʻoua te tau ʻaʻahi ki aí, pea ʻokú ne vaheʻi ha ngaahi tokoua taau ke ʻaʻahi ki he ngaahi ʻapi ko ʻení.
3 ʻOku fakafatongiaʻaki ʻa e ʻovasia ngāué ke ne tokangaʻi ʻa e ngaahi tafaʻaki kehekehe ʻo e ngāue fakamalangá, kau atu ki ai ʻa e faifakamoʻoni ʻi he feituʻu pisinisí, halá, mo e telefoní. ʻOkú ne tokanga foki ke fai ha ngaahi fokotuʻutuʻu ʻaonga ki he fakataha ki he ngāue fakamalangá ʻi he lolotonga ʻo e uiké, ʻo kau atu ki ai mo e ngaahi ʻaho mālōloó. ʻOkú ne fakahā ʻa e houngaʻia moʻoni ʻi he ngāue ʻo e ako Tohitapú. ʻOkú ne kumi ha ngaahi founga ke fai ai ha tokoni fakalaumālie ki he faʻahinga ʻoku nau hoko ʻo tōmokosi pe ʻikai kau longomoʻui ki he ngāue fakafaifekaú. ʻOkú ne tokanga fakamātoato fekauʻaki mo e ngāue ʻa e kau tāimuʻá, pea ʻokú ne tokangaʻi ʻa e polokalama Tokoniʻi ʻe he Kau Tāimuʻá ʻa e Niʻihi Kehé.
4 ʻI he tuʻunga ko ha mēmipa ʻo e Kōmiti Ngāue ʻa e Fakatahaʻangá, ʻoku fai ʻe he ʻovasia ngāué ha ngaahi feʻunuʻaki ʻoku fiemaʻu ʻi he ngaahi kulupu Ako Tohi ʻa e Fakatahaʻangá. ʻI he taimi ʻokú ne ʻaʻahi atu ai ki hoʻomou kulupú, fakapapauʻi ke ke ʻi ai pea kau fakataha mo ia ʻi he ngāue fakamalangá.
5 Ko kinautolu kotoa pē ʻi he fakatahaʻangá ʻoku totonu ke nau loto-lelei ke fengāueʻaki fakataha mo e fakahinohino ʻoku ʻomai ʻe he ʻovasia ngāué. ʻE tokoniʻi ai heni kitautolu ke tau fakatupulekina ʻetau lavameʻa lelei ʻi he ngāue ngaohi-ākongá pea maʻu ʻa e fiefia lahi ange ʻi heʻetau ngāue fakafaifekaú.