ʻOku Takimuʻa ʻa e Kau ʻOvasiá—Ko e Sekelitalí
1 ʻOku fakahoko ʻe he sekelitali ʻa e fakatahaʻangá ha ngafa mātuʻaki mahuʻinga ʻi hono fakapapauʻi ko e “meʻa kotoa pe ke fai ke tāu mo māu.” (1 Kol. 14:40) ʻI he tuʻunga ko e mēmipa ʻo e Kōmiti Ngāue ʻa e Fakatahaʻangá, ʻokú ne tokangaʻi ʻa e ngaahi fetuʻutaki ʻa e fakatahaʻangá mo e ngaahi lēkooti mahuʻinga. Neongo ko hono ngaahi fatongiá ʻoku ʻikai ke hā ia ki he tokotaha kotoa pē ʻo hangē ko ia ko e kau mātuʻa kehé, ko ʻene ngāué ʻoku fiemaʻu lahi pea fakahoungaʻi.
2 ʻI he taimi ʻoku maʻu ai ha fetuʻutaki mei he Sōsaietí pe feituʻu kehe, ʻoku tokanga ʻa e sekelitalí ki ai peá ne sio kuo fai ʻa e tali ki ai ʻi he taimi ʻoku fiemaʻu aí. ʻOkú ne fakapapauʻi ko e ngaahi tohi kuo maʻú ʻoku tufa ia ʻi he lotolotonga ʻo e kau mātuʻá pea faile kinautolu ko ha maʻuʻanga fakamatala. ʻOkú ne vakaiʻi ʻa e ngaahi foomu kole makasini mo e ngaahi tohí pea fakafolau atu kinautolu ki he Sōsaietí. ʻOkú ne tokangaʻi fakahangatonu ʻa e faʻahinga ʻoku nau tokangaʻi ʻa e fakamatala paʻangá mo e ngaahi tukuhaú pea pehē foki ki he kotoa ʻo e ngaahi meʻa fekauʻaki mo e fakataha-lahí.
3 Koeʻuhi ko e sekelitalí kuo pau ke ne fakafolau atu ʻi he māhina kotoa pē ʻa e līpooti ngāue fakamalanga ʻa e fakatahaʻangá ki he Sōsaietí ʻi he ʻaho ono ʻo e māhiná, ʻoku fiemaʻu ki he kotoa ʻo kitautolú ke līpooti vave ʻetau ngāue fakamalangá ʻi he ngataʻanga ʻo e māhina taki taha. ʻOkú ne fakahū leva ʻa e ngaahi līpooti ngāué ki he ngaahi kaati Congregation’s Publisher Record. ʻE kole nai ʻe ha tokotaha malanga ke sio ʻi heʻene lēkooti ngāue fakafoʻituituí.
4 ʻI he taimi ʻoku hiki mai ai pe hiki atu ha tokotaha malanga mei he fakatahaʻangá, ʻoku kole ʻe he sekelitalí mei he kau mātuʻa ʻo e fakatahaʻanga kehé pe fakafolau atu kiate kinautolu ha tohi ʻo e fakafeʻiloaki fakataha mo e ngaahi kaati Congregation’s Publisher Record fekauʻaki mo e tokotaha ko iá.—Our Ministry, p. 104-105.
5 ʻOku vakaiʻi ʻe he sekelitalí ʻa e ngāue ʻa e kau tāimuʻá, ʻo hanganaki fetuʻutaki ki he kau mātuʻá, pea tautautefito ki he ʻovasia ngāué, ʻo fakahā ki ai ha faʻahinga palopalema ʻoku hokosia nai ʻe he kau tāimuʻá. ʻOkú ne fakatokanga ki he kau faiako ʻi he Ako Tohi ʻa e Fakatahaʻangá fekauʻaki mo e kau malanga ko ia ʻoku tōmokosi ʻi he ngāue fakamalangá. ʻOku takimuʻa fakatouʻosi ʻa e sekelitalí pea mo e ʻovasia ngāué ʻi he feinga fakataha ke tokangaʻi ʻa e faʻahinga ʻoku ʻikai ke longomoʻuí.—ʻEtau Ngāue Fakafaifekau ʻo e Puleʻanga, Nōvema 1987, p. 1.
6 ʻI hono maʻu ha houngaʻia lelei ange ʻi he ngaahi fatongia ʻo e sekelitalí, ʻofa ke tau fai ʻa e meʻa te tau malavá ke tokoni ke ʻai ʻene ngāue fakasētuatá ke faingofua ange kiate ia ke fakahoko.—1 Kol. 4:2.