Felangahakeʻaki ʻAki ʻa e Tali ʻi he Ngaahi Fakatahá

¹ ʻOku enginakiʻi kitautolu ʻi he Hepelu 10:24 ke ‘fefakaʻaiʻaiʻaki ki he feʻofaʻaki mo e ngaue lelei.’ ʻOku kau ki he meʻá ni ʻa e felangahakeʻaki ʻaki hono fai ʻo e ngaahi tali mohu ʻuhinga ʻi he ngaahi fakataha ʻa e fakatahaʻangá. Ko e hā ʻoku totonu ai ke tau talí? ʻE lava fēfē ke tau fai eni? Ko hai ʻoku ʻi ha tuʻunga ke maʻu ʻaonga mei aí?

² Fakakaukau ange ki he taimi lahi ʻokú ke maʻu ʻaonga ai mei he fanongo ki hono ʻomai ʻe he niʻihi kehé ʻa e ngaahi lea faingofua mo maʻalaʻala, ʻa ia ʻokú ne fakalahi ai ʻa hoʻo mahinó pea ʻai ai ke ke mālohi fakalaumālie. ʻOkú ke maʻu ʻa e monū ko hono fai ʻa e meʻa tatau kiate kinautolu. ʻI he taimi ʻokú ke fai ai iá, ʻokú ke fakahāhā ai ʻa hoʻo holi ke ‘ʻatu ha meʻi kelesi fakalaumalie’ ki hono fakalototoʻa ʻo e kotoa ko ia ʻoku kau ki aí.​—Loma 1:​11, 12.

³ Founga ʻo Hono Fai ʻo e Ngaahi Tali Leleí: ʻOua ʻe ʻoatu ha ngaahi tali lōloa, ʻo ʻosiki ʻa e fakakaukau kotoa ʻi he palakalafí. ʻOku ʻikai faʻa lava ke fakaeʻa ʻa e tali totonú ʻi he ngaahi tali lōloá, pea ʻe fakalotosiʻi ai ʻa e niʻihi kehé mei he kau ki aí. Ko e ʻuluaki tali ʻi he palakalafí ʻoku totonu ke hoko ia ko ha tali nounou mo fakahangatonu ki he fehuʻi kuo pulusí. Ko e faʻahinga ko ia ʻoku nau fai ha ngaahi tali ʻo tānaki mai ki aí ʻe lava leva ke nau ngāueʻaongaʻaki ʻa e fakamatalá pe fakahā ʻa e anga ʻo e kaunga ʻo e ngaahi konga Tohitapú. Sio ki he School Guidebook, peesi 90-92.

⁴ Kapau ʻoku ʻai koe ke ke loto-moʻua ʻi he fakakaukau fekauʻaki mo e talí, teuteu ki muʻa ha tali nounou, pea kole ange ki he tokotaha faiakó ke tuku mai kiate koe ʻa e palakalafi ko iá. Hili haʻo fai eni ʻi ha ngaahi fakataha siʻi, ʻe hoko ʻo faingofua ange ai ʻa e kau ki aí. Manatuʻi naʻe fakahāhaaʻi ʻe Mōsese mo Selemaia ʻa e taʻefalala ki heʻena malava ke lea ʻi ha kakaí. (Eki. 4:​10; Sel. 1:​6) Ka naʻe tokoniʻi kinaua ʻe Sihova ke lea maʻana, pea te ne tokoniʻi mo koe foki.

⁵ Ko Hai ʻE Maʻu ʻAonga mei Hoʻo Ngaahi Talí? Ko koe tonu ʻokú ke maʻu ʻa e ʻaongá koeʻuhi ko hoʻo ngaahi talí ʻokú ne ʻai ke toe maongo mālohi ange ai ʻa e moʻoní ki ho ʻatamaí mo ho lotó, ʻo ʻai ke faingofua ange ai kiate koe ke toe manatuʻi ʻamui ʻa e fakamatalá. Pehē foki, ʻoku toe maʻu ʻaonga ʻa e niʻihi kehé mei he fanongo ki hoʻo ngaahi fakamatala fakatupu langa haké. ʻOku tau loto-toʻa ʻi he taimi ʻoku fai ai ʻe he tokotaha kotoa ʻa e feinga, tatau ai pē pe ʻoku nau taukei, kei siʻi, mā, pe foʻou, ke fakahāhā ʻenau tuí ʻi he ngaahi fakataha ʻa e fakatahaʻangá.

⁶ ʻOku papau ʻetau ʻilo ko e ‘lea ʻoku fai ʻi hono taimi totonú, hono ʻikai lelei’ ʻi hono ngāueʻaki kinautolu ke felangahakeʻaki ai ʻi he ngaahi fakatahá!​—Pal. 15:23.