ʻOku Tokanga Mai Kiate Kitautolu Hotau Tokotaha-Fakatupu Maʻongoʻongá!
1 ʻI heʻene feinga ke fakaʻuhinga mo ʻIsileli talangataʻá, naʻe ʻeke ange ʻe Sihova: “ʻIkai kuo ke ʻilo? kehe, ʻikai kuo ke fanongo? ko e ʻOtua taʻengata ʻa Sihova, ʻa e Fakatupu ʻo e ngaahi ngataʻanga ʻo mamani.” (Ai. 40:28) ʻOku tau ʻilo hotau Tokotaha-Fakatupu Maʻongoʻongá, pea ʻoku tau sio ki heʻene tokanga ʻofa mai kiate kitautolú. Kae kehe, ʻoku laui miliona ʻa e kakai ʻoku nau veiveiua ki heʻene ʻi aí pe maʻu ha fakakaukau fekauʻaki mo ia ʻoku ʻikai ke fehoanaki ia mo e meʻa ʻoku maʻu ʻi he Tohitapú. ʻE lava fēfē ke tau tokoni kiate kinautolu?
2 Ko e tohi foʻou ko e Is There a Creator Who Cares About You? ʻoku faʻu ia ke tokoni ki he kakai peheé. ʻOkú ne fakaafeʻi ʻa e kakai faʻa fakakaukaú ke fefakaʻuhingaʻaki ʻi he ngaahi moʻoniʻi meʻá. Ko e fakamatala fakamānako pea mo e ngaahi fakakaukau fakatupu fakalotoʻi ʻoku ʻi he tohi ko ʻení ʻoku totonu ke tohoakiʻi mai ai ʻa e faʻahinga ʻoku nau lau iá.
3 ʻAi ke Ke Alāanga mo e Tohi Creator: Fakakaukau ki he anga tefito ʻo hono ngaahi meʻa ʻi lotó. ʻOku lāulea ʻa e vahe 2 ki he 5 ki he founga naʻe hoko mai ai ʻa e ʻunivēsí, moʻuí, mo e tangatá pea mo e meʻa naʻá ne fakatupunga iá. Ko e vahe 6 ki he 9 ʻokú ne sivisiviʻi ʻa e Tohitapú mo hono Tokotaha-Faʻú, pea tautautefito, pe ko e lēkooti ʻi he Senesí fekauʻaki mo e fakatupú ʻoku alafalalaʻanga. ʻOku ʻomai ʻe he vahe 10 ha tali fakafiemālie ki he taha ʻo e ngaahi fehuʻi faingataʻa lahi taha ʻoku ʻeke ʻe he tangatá: “Kapau ʻoku tokanga mai ʻa e Tokotaha-Fakatupú, ko e hā ʻoku lahi fau ai ʻa e faingataʻá?”
4 Feinga ke Fakaʻuhinga mo e Faʻahinga ʻOku Veiveiuá: Ko e peesi 78-79 ʻi he tohi Creator ʻokú ne ʻomai ha fakaʻuhinga ʻe lava ke ke ngāueʻaki ke tokoniʻi ʻa e niʻihi kehé ke aʻu ki he fakamulituku totonu fekauʻaki mo e ʻOtuá. ʻEke kiate kinautolu: “Naʻe ʻi ai ha kamataʻanga ʻo e ʻunivēsí?” Ko e tokolahi taha te nau loto-tatau naʻe ʻi ai. Kapau ko ia, ʻeke ange: “Naʻe hokonoa mai pē ʻa e kamataʻanga ko iá pe naʻe fakatupu?” ʻOku fakatokangaʻi ʻe he tokolahi tahá naʻe fakatupu. ʻOku taki atu ai heni ki he fehuʻi fakaʻosí: “Naʻe fakatupunga ʻa e kamataʻanga ʻo e ʻunivēsí ʻe ha meʻa ʻitāniti nai pe ʻe ha Taha taʻengata?” Ko e fakaofiofi ko ʻení ʻe lava ke ne taki atu ha tokolahi ke nau sio kuo pau ʻoku ʻi ai ha Tokotaha-Fakatupu.
5 Ko e tohi Creator ko e meʻa tofu pē ia ʻoku fiemaʻu ki he kakai tokolahi. Vahevahe ia mo ho ngaahi kāingá, kaungāngāué, kaungāakó, pea mo e ngaahi maheni kehé. Toʻotoʻo ia ʻi hoʻo ngāue fakafaifekaú koeʻuhi ke ke lava ʻo tufa ki he faʻahinga ʻokú ke fetaulaki mo ia ʻoku nau veiveiua fekauʻaki mo e ʻi ai ʻa e ʻOtuá. Ko e lahi ange ʻa ʻetau maheni mo e tohi ko ʻení, ko e mālohi ange ia ʻetau hoko ʻo ʻofa ki hotau Tokotaha-Fakatupú, ʻo ueʻi ai kitautolu ke ʻaʻeva hokohoko atu ʻo fehoanaki mo ʻene ngaahi tuʻunga māʻolungá.—Ef. 5:1; Fkh. 4:11.