Ko Hono ʻAi ʻa e Huafa ʻo Sihová ke ʻIlo ʻe he Foʻi Māmaní Kotoa
1 ʻI he taimi naʻe fekauʻi atu ai ʻe Sīsū ʻene kau ākongá ke nau faifakamoʻoni ki he “ngataʻanga ʻo e mamani,” naʻá ne ʻosi fokotuʻu ʻa e faʻifaʻitakiʻanga kiate kinautolu ke nau muimui ai. (Ng. 1:8) ʻI he taimi pea ʻi he feituʻu pē naʻá ne maʻu ai ha kakai, naʻá ne talanoa ai ʻo fekauʻaki mo e taumuʻa ʻa e ʻOtuá ki he faʻahinga ʻo e tangatá. ʻI he faʻifaʻitaki kia Sīsuú, ʻoku ngāueʻaki ʻe he kalasi tamaioʻeiki anga-tonú ha ngaahi founga kehekehe ke ʻai ai ʻa e huafa ʻo Sihová ke “ʻilo ia ʻe mamani katoa.”—Ai. 12:4, 5.
2 Ko e Meʻa Naʻe Fai ʻi he Ngaahi ʻAho ki Muʻá: ʻI he faai mai ʻa e ngaahi taʻú, naʻe pulusi ʻa e ngaahi malangá ʻi he ngaahi nusipepá; ko e “Tulama-ʻAta ʻo e Fakatupú” naʻe faʻu pea huluʻi ia ki he laui miliona; naʻe ngāueʻaki mo e ngaahi kā fakaleʻo-lahi; pea naʻe fakalahi hono ngāueʻaki ʻa e kalamafoní, pea ʻi he taimi ʻe taha, ko e letioó—naʻe ngāueʻaki kotoa ia ke malangaʻi ʻa e ongoongo leleí. Ko e moʻoni, naʻe fai maʻu pē ʻa e fakamamafa tefitó ki hono fai ʻo e fetuʻutaki fakafoʻituitui mo e kakaí koeʻuhi ke malava ai ʻo fakatupulekina ha mahuʻingaʻia kuo maʻu. Ko hono olá, ko e ngāue fakafaifekau fale-ki-he-falé naʻe fakamoʻoniʻi ʻa ʻene hoko ko e founga ola lelei ʻaupito ia ʻo hono ʻai ʻa e huafa ʻo Sihová ke ʻiloa ʻi he feituʻu kotoa pē.—Ng. 5:42.
3 Ko e Meʻa Kuo Fai ʻi Hotau ʻAhó: ʻI he feliliuaki ʻa e taimí ʻoku ʻunu atu ai ʻa e māmaní ʻi ha ngaʻunu fakavavevave, pea ʻi he ngaahi feituʻu lahi ʻoku tātātaha ai ke maʻu ʻa e kakaí ʻi ʻapi. Ko e tokosiʻi pē ʻoku nau hehema ke fakamoleki ʻa e taimi ʻi he lautohi mo e fakalaulauloto ki he ngaahi meʻa fakalaumālié. Ko ia ai, kuo pau ke tau liliu ʻetau ngāue fakafaifekaú ke fakatatau ki ai. ʻI he tānaki ki he hokohoko atu ʻo hono ʻosiki ʻa e feituʻu ngāué ʻi he fale ki he falé, kuo fakalototoʻaʻi kitautolu ke tau ō ki he feituʻu ʻoku ʻi ai ʻa e kakaí pea ke “mateuteu maʻu pē” ke maluʻi ʻa e ʻamanaki ʻoku tau maʻú. (1 Pita 3:15, NW) ʻOku ʻuhinga ʻení ke feinga ke faifakamoʻoni ki he kaungāngāué, ki he kaungāakó, ki he kakai ʻi he halá pea ʻi he paʻaké pe tauʻanga meʻalelé, mei he falekoloa ki he falekoloa, pea ʻi ha feituʻu pē ʻe maʻu ai ha kakai. ʻI hono maʻu ʻa e poupou ʻa Sihová, ʻe lavameʻa lelei ʻetau ngaahi feingá. ʻOkú ke kau ʻi he aʻu ki he kakaí ʻi ha feituʻu pē ʻoku nau ʻi ai?
4 ʻOfa ke tau ʻahiʻahiʻi ʻa e founga kotoa pē ʻe malavá ʻi he taimi ʻoku hoko mai ai ki hono ʻai ʻa e huafa ʻo Sihová ke ʻiloa ʻi hotau feituʻú. Te tau maʻu ai ʻa e fiemālie lahi ʻi hono fakahoko kakato ʻetau ngāue fakafaifekaú, ʻi heʻetau hanga kia Sihova ke ne tohoakiʻi mai ʻa e faʻahinga loto-totonú.—Sione 6:44.