Ko ha Tokotaha Mā Koe?
1 ʻOku ʻikai ke tau ofo ʻi he taimi ʻoku tau sio ai ki ha kiʻi tama ʻoku fakaasiasi mai kiate kitautolu mei mui ʻi heʻene faʻeé pe tamaí. ʻOku fakaenatula pē ʻa e maá mei he kei siʻí. Naʻa mo e hoko ʻo fuʻu lahí, ko e tokolahi ʻoku nau kiʻi natula mā pē. Kapau ʻoku uesia ʻe he maá hoʻo kau ʻi he ngāue fakafaifekaú, ko e hā ʻe lava ke ke faí?
2 Fekuki mo e Maá: ʻOku mahuʻinga ke fai ha tokanga ki he “tangata fufū ʻo e loto.” (1 Pita 3:4) Fakaivimālohiʻi ʻa hoʻo ʻofa kia Sihová pea mo ho kaungāʻapí. Hoko ʻo tuipau kakato ko hono fakahoko ʻo e fekau ke malangá ko e taha ia ʻo e ngaahi founga lelei taha ke fakahāhā ai ʻa e ʻofa feilaulauʻi-kitá. Tuli ki ha founga lelei tuʻumaʻu ʻo e ako fakafoʻituituí mo e maʻu fakatahá. Lotu tuʻumaʻu pea tautefito ki he tokoni ʻa Sihová. Ko e tui mo e falala mālohi kiate iá te ne langa hake ʻa e tuipaú pea ʻomai ai mo e “loto toa ke lea aki ae folofola o taemanavahe.”—Fili. 1:14, PM.
3 Tauʻi ʻa e ngaahi ongoʻi ʻo e taʻefeʻungá. ʻOku hā ko Tīmoté naʻe pau ke ne fai ʻeni. Naʻe fakaʻaiʻai ʻe Paula ʻa Tīmote ke “ʻoua naʻa tuku ke fakasikakaʻi [ia] ʻe ha taha ko [ʻene] talavou,” ʻo fakamanatu kiate ia ʻo pehē “naʻe foaki ʻe he ʻOtua kiate kitaua, naʻe ʻikai ko e Laumalie angafoʻi, ka ko e angamalohi.” (1 Tim. 4:12; 2 Tim. 1:7) Naʻe ngāueʻaki kakato ʻe Sihova ʻa Tīmote, ko ia te ne toe ngāueʻaki mo koe kapau te ke feinga ke fakalakalaka fakataha mo e tuipau kakato kiate Ia.—Sāme 56:11.
4 ʻI he fakalaulauloto ki ha konga Tohitapu, hangē ko e Mātiu 10:37, naʻe tokoniʻi ai ha tuofefine ʻa ia ko ʻene loto-siʻí naʻe ʻai ai ia ke ne manavahē ki hono husepāniti fakafepakí. ʻI heʻene kītakí, naʻe hoko ai ʻo faingofua ange kiate ia ʻa e ngāue fakafaifekaú, pea faifai atu pē ko hono husepānití, faʻeé pea mo hono fanga tuongaʻané kotoa naʻa nau tali ʻa e moʻoní!
5 ʻOku Mātuʻaki Fiemaʻu ʻa e Teuteú: ʻE toe tupulekina ange ʻa hoʻo tuipaú ʻi he taimi ʻokú ke teuteu fakaʻāuliliki ai ki he ngāue fakafaifekaú. Filifili ha tuʻuaki faingofua mei he tohi Reasoning pe ngaahi ʻīsiu ki muʻa ʻo ʻEtau Ngāue Fakafaifekau ʻo e Puleʻanga, ako ia, pea ʻahiʻahiʻi. ʻI he ʻikai ke langa hake ha puputuʻu ʻoku ʻikai ke fiemaʻú, fakakaukau pau. Maʻu ha loto-toʻa mei he ngāue vāofi mo e niʻihi kehé. Manatuʻi ko e tokolahi ʻo e kakai te ke fetaulaki mo ia ʻi he ngaahi matapaá ʻoku nau loto-siʻi, ʻo hangē pē ko koé. ʻOku fiemaʻu ki he tokotaha kotoa pē ʻa e pōpoaki ʻo e Puleʻangá.
6 Kapau ʻokú ke mā, ʻoua ʻe fakatuʻatamaki. ʻI hoʻo ngāueʻaki koé, ʻe tokoniʻi koe ʻe Sihova ke ke hoko ko ha tokotaha malanga ola lelei ʻo e ongoongo leleí. Pea te ke maʻu leva ai ʻa e fiefia ʻi hoʻo ngāue fakafaifekaú.—Pal. 10:22.