“ʻOku Totonu Ke U Hiki?”
1 ʻI he tali ki he fekau ʻa Sīsū ke “ō . . . ʻo ngaohi ʻa e ngāhi kakai kotoa pe ko ʻeku kau ako,” kuo hiki ai ʻa e kau sevāniti fakatapui tokolahi ʻa Sihova ke ngāue ʻi he feituʻu ʻoku lahi ange ai ʻa e fiemaʻú. (Mt. 28:19) ʻOku nau faʻifaʻitaki ai kia Paula, ʻa ia naʻá ne tali ʻa e ui: “Laka mai ki Masitonia, ʻo tokoniʻi kimautolu.” (Ng. 16:9) ʻE lava fēfē ke fai ʻeni ʻi ha founga ʻaonga?
2 Fakahoko ha Sitepu ʻe Taha ʻi he Taimi ʻe Taha: ʻOku ʻi ai ha feituʻu ʻoku tātātaha hono ngāueʻí ʻi hoʻo fakatahaʻangá? Kapau ko ia, ʻe fakahangataha nai hoʻo ngaahi feingá ki he ngaahi feituʻu ko iá. Ki muʻa ke ke fili ke ʻalu ki ha feituʻu kehé, talanoa mo hoʻo kau mātuʻá ke sio pe ʻoku nau ongoʻi ʻokú ke mateuteu ke fai ha hiki. Te ke toe ʻeke nai ki hoʻo ʻovasia fakafeituʻú pe ʻokú ne ʻilo ha fakatahaʻanga ofi mai ʻa ia te ke malava ke fakalahi atu ai hoʻo ngāue fakafaifekaú. ʻI he tafaʻaki ʻe tahá, hili ʻa hono lau fakalelei ʻo e fakamolé, te ke loto nai ke fai ʻa e tokoní ʻi ha tafaʻaki kehe ʻo e fonuá, pe ʻi ha fonua kehe. Kapau ko hoʻo holí ʻeni, ko koe fakataha mo hoʻo kulupu ʻo e kau mātuʻá ʻoku totonu ke mou tohi ki he ʻōfisi vaʻa ʻo e feituʻu ʻokú ke saiʻia ke ngāue aí, ʻo fakahaaʻi ai ʻa hoʻo ʻātakai fakateokalatí. ʻOku fakapotopoto nai ke ʻaʻahi ki he feituʻú ki muʻa ke ke fili pe te ke fai ha hiki ʻosi pe ʻikai.
3 Tokanga Fekauʻaki mo e Nofo Hilí: Ko ha tokolahi fakautuutu ʻo hotau fanga tokouá ʻoku nau hiki ki ha ngaahi fonua kehe koeʻuhí ʻoku nau kumi ki ha tuʻunga moʻuilelei ange pe ʻataʻatā mei he ngaohikoviá. ʻI he taimi tatau pē, kuo tō ʻa e niʻihi ki he tauhele ʻa e faʻahinga tāutaha taʻefaitotonu ʻoku nau talaʻofa ange ke tokoniʻi kinautolu ke nau nofo ʻi he fonua foʻoú ka ʻoku nau ʻave pē ʻenau paʻangá pea liʻaki leva kinautolu. ʻI he ngaahi tuʻunga ʻe niʻihi ʻoku aʻu ʻo feinga ʻa e faʻahinga tāutaha ko ʻení ke fakamālohiʻi ʻa e kau nofo hilí ki he ngāue taʻetaau. ʻI he taimi ʻoku nau fakafisi aí, ʻoku tuku taʻemaluʻi ai kinautolu ʻi he fonua naʻa nau hū ki aí. Ko ia, ko e tuʻunga ʻo e kau nofo hilí kuo hoko ʻo toe kovi ange ia ʻi he tuʻunga naʻa nau ʻi ai ʻi honau fonua tupuʻangá. ʻOku aʻu ʻo nau fiemaʻu nai ke kole ki he fanga tokouá ke nau nofo pea mo tokoniʻi kinautolu ʻi ha tuʻunga, ʻo fakakavengaʻi ai ʻa e ngaahi fāmili Kalisitiane kehe ʻoku nau fekuki mo ʻenau ngaahi palopalema pea mo e ngaahi faingataʻa pē ʻa kinautolú. Ko e ngaahi mēmipa ʻo e ngaahi fāmili ʻe niʻihi kuo nau mavahe fakaesino ʻiate kinautolu, pea ko e ngaahi fāmilí kuo nau hoko ʻo vaivai fakalaumālie koeʻuhí ko e ngaahi hiki taʻefakakaukauʻi lelei peheé.—1 Tim. 6:8-11.
4 Kapau ʻokú ke loto ke ke fai ha hiki koeʻuhí ko ha lelei fakafoʻituitui, manatuʻi ʻe tatau ai pē pe ko fē ʻokú ke nofo aí, ʻoku ʻi ai ʻa e ngaahi palopalema te ke fehangahangai mo ia. ʻOku faingofua ange ke ke ikuʻi ʻa e ngaahi palopalemá ʻi he feituʻu kuó ke ʻosi ʻilo ʻa ʻene leá pea mo e anga fakafonuá, kae ʻikai ko e kamata foʻou ʻi ha ngaahi ʻātakai ʻoku ʻikai te ke maheni mo ia.