Palani ki Muʻa—Ki he Hā?
1 Ko kitautolu kotoa ʻoku tau fakakaukau nai ki heʻetau ngaahi palani ki he kahaʻú. Ko e faʻahinga ʻoku nau maʻu ʻa e ʻamanaki fakaemāmaní ʻoku nau hanga atu ke moʻui taʻengata ʻi he māmani foʻou māʻoniʻoni ʻa e ʻOtuá. Ka ʻoku ʻi ai ʻa e ngaahi tākiekina ʻoku lava ke ne toʻo atu ʻa e ʻamanaki ko iá mei ha loto ʻo ha taha. ʻOku fiemaʻu ʻa e feinga fakamātoato ke hanganaki langa ʻetau moʻuí ʻi he ngaahi meʻa mahuʻinga ʻo e Puleʻangá pea ʻoua naʻa afeʻi kitautolu ʻe he ngaahi holi fakatauele ʻo e kakanó.—1 Sione 2:15-17.
2 ʻOku ʻikai pē ke makupusi ʻe he māmaní ia ʻa e ngaahi holi ʻa e kakai fakalaumālié. (1 Kol. 2:14) ʻI he lolotonga ʻoku fāinga ʻa e niʻihi ʻo e faʻahinga ʻo e tangatá ke maʻu ʻa e ongoongoá, mafaí, pe koloaʻiá, ʻoku tau feinga mālohi kitautolu ki he ngaahi koloa fakalaumālié. (Mt. 6:19-21) Kapau ʻoku tau feinga ke feʻunuʻaki ʻetau fakakaukaú ke fakafuo ki he vakai ʻa e māmaní ki he kahaʻú, te tau aʻu ai ki heʻetau ngaahi taumuʻa fakalaumālié? ʻE vave ʻa hono fakaʻauha hotau lotó ʻe he ngaahi meʻa fakamāmaní. ʻE lava fēfē ke tau taʻofi ʻeni?
3 “ʻAi Muʻa ʻa e ʻEiki ko Sisu Kalaisi”: Ko e founga ʻe taha ke fakapapauʻi ai pe ʻoku tau langa hake hotau kahaʻú ʻi he ngaahi meʻa mahuʻinga ʻo e Puleʻangá ko hono sivisiviʻi ʻetau fetalanoaʻakí. ʻOku tau talanoa maʻu pē fekauʻaki mo e ngaahi meʻa fakamatelié mo e ngaahi meʻa fakamāmaní? Kapau ko ia, kuo pau ke tau fakakaukau pe ʻoku mole mei hotau lotó ʻa e tokangataha ki he ngaahi meʻa mahuʻinga fakalaumālié. ʻE fiemaʻu nai ke tau fai ha fakamamafa lahi ange ki hono ‘ʻai ʻa e ʻEiki ko Sisu Kalaisí; kae ʻikai ko e tokonaki ki he kakanó ke kanoni ʻene ngaahi holí.’—Loma 13:14.
4 ʻE lava ʻe he kau talavoú ke nau ‘ʻai ʻa Kalaisi’ ʻaki ʻenau palani ki muʻa ki ha ʻaho te nau hū ai ki he ngāue fakafaifekau taimi-kakató. Ko ha talavou naʻá ne fiemaʻu ke tāimuʻa tuʻumaʻu naʻe ʻohake ia ʻi ha anga fakafonua ʻa ia ʻoku mālohi ai ʻa e tōʻonga fakafonua ki he kau talavoú ke nau hoko ʻo maʻu ʻa e maluʻanga fakaepaʻangá. Ko ia ai, naʻá ne kau lahi ki ha pisinisi ʻo aʻu ki ha tuʻunga naʻá ne maʻu fakatuʻunga pē ai ʻa e ngaahi fakatahá mo e kau ʻi he ngāue fakafaifekaú. ʻI he kamata pē ke ne falala ki he ngaahi lea ʻa Sīsū ʻoku hā ʻi he Mātiu 6:33, peá ne mavahe mei he founga tuʻumaʻu fakaongosia naʻá ne ʻi aí, naʻá ne kau leva ki he ngāue taimi-kakató. ʻI he taimí ni, ʻokú ne tauhi kia Sihova, ʻaki ha konisēnisi lelei, ʻo hangē ko ʻene laú, ‘ki heʻene kakato tahá.’
5 ʻOku pehē ʻe he Tohitapú ʻoku fakapotopoto ke palani ki he kahaʻú. (Pal. 21:5) ʻOfa ke tau fai pehē kotoa fakataha mo hono ʻai ke tuʻu muʻomuʻa ʻa e finangalo ʻo e ʻOtuá ʻi hotau ʻatamaí.—Ef. 5:15-17.