Maongo ʻa e Ngaahi Foʻi Vitioó he ʻOku ʻOatu Ai ha Fakamoʻoni
1 “Naʻe mamata ʻa homa fohá ʻi he foʻi vitioó talu mei he ki muʻa pē ke ne lava ʻo ʻalú. Naʻá ne toutou mamata ai. He fakaofo ē ko hono maʻu ha ngaahi meʻangāue ʻa ia ʻoku fakahūhū ai ʻa e ʻofa kia Sihová ki heʻema fānaú!” Ko e hā ʻa e foʻi vitiō ʻoku fakamatala ki ai ʻa e mātuʻa tauhi fānau Kalisitiane ko ʻení? Ko e foʻi vitiō ko ia ʻoku fakakaveinga ko e Noah—He Walked With God. Ko ha faʻē, ʻikai ko ha Fakamoʻoni ʻa ia ko hono fohá naʻá ne sio ʻi he foʻi vitiō Noah ʻi ha ʻapi ʻo ha tokotaha kehe, naʻá ne ʻave ki he ʻōfisi vaʻá ha $90 U.S. ko ha tokoni pea ʻeke pe ʻoku tau maʻu ha toe ngaahi foʻi vitiō kehe ki he fānaú. Ko e ngaahi foʻi vitiō kuo faʻu ʻe he kautaha ʻa Sihová ʻoku ʻi ai ʻene maongo mālohi ki he fānau īkí mo e taʻumotuʻá fakatouʻosi.
2 ʻI he Fāmilí: ʻI he hili ha mamata ʻa ha fāmili Fakamoʻoni ʻi he Jehovah’s Witnesses Stand Firm Against Nazi Assault, naʻe pehē ʻe he faʻeé: “Naʻá ku fakalaulauloto ʻi he ʻahó kotoa ki he anga hono fakaivia ʻe Sihova ha kakai anga-maheni ke nau kātakiʻi ha ngaahi meʻa faikeke ʻaupito! Ko e fakakaukau atu fekauʻaki mo e meʻa ko iá, naʻe fakamanatu mai ai kiate au ʻa e tuʻunga siʻisiʻi ʻo hoku ngaahi palopalemá tonu. Ko e mamata ʻi he foʻi vitiō ko ʻení mo ʻema fānaú kuó ne tokoniʻi kinautolu ke nau sio māʻalaʻala lelei ange ki he fiemaʻu ke falala kia Sihová. ʻI he fetalanoaʻaki mo kinautolu ki ai ʻi he hili iá, naʻá ma tokoniʻi ai ʻema fānau fefiné ke nau mateuteu lelei ange ke fekuki mo ha ngaahi tenge pea mo ha ngaahi fakatanga pē te nau fetaulaki mo ia.”
3 ʻI he ʻApiakó: ʻI he konga ʻo ha līpooti, naʻe malava ai ʻe ha Fakamoʻoni taʻu hongofulu tupu ke fakahaaʻi ʻa e konga ʻo e foʻi vitiō Stand Firm ki heʻene kalasí. Ki muʻa atú, naʻe pehē ai ʻe he faiakó naʻe ʻikai te ne saiʻia ʻi he Kau Fakamoʻoní. ʻI he hili ʻa e mamata ʻi he foʻi vitioó, naʻá ne pehē: “Kuo liliu moʻoni ʻe he meʻá ni ʻa e anga ʻo ʻeku vakai ki he Kau Fakamoʻoni ʻa Sihová. ʻOku ou palōmesi ai ko e taimi hono hoko te nau haʻu ai ki hoku matapaá, te u fanongo kia kinautolu pea kamata ke ako ʻa e Tohitapú mo kinautolu!” Ko e hā naʻá ne liliu ʻa ʻene vakai mai kia kitautolú? Naʻá ne pehē ko ʻetau “ʻofá mo e mateaki moʻoní.”
4 ʻI he Ngāue Fakafaifekaú: Naʻe fetaulaki ai ha tuofefine mo ha fefine naʻá ne toumoua ke tali ha tohi, neongo naʻe ʻi ai ʻene ngaahi fehuʻi fekauʻaki mo kitautolu pea mo ʻetau ngaahi tuí. Naʻe toe foki ki ai ʻa e tuofefiné mo e foʻi vitiō ko e Jehovah’s Witnesses—The Organization Behind the Name ʻo hulu ia ki he fefiné mo hono husepānití. Naʻe maongo lahi kiate kinaua fakatouʻosi peá na loto-lelei ke ako ʻa e Tohitapú. ʻI he ola ʻo e fakamoʻoni lelei naʻe fai kia kinauá, naʻá na kamata ai ke fakafehoanaki ʻa ʻena moʻuí ki he finangalo ʻo e ʻOtuá.
5 ʻOkú ke ngāue ʻaonga kakato ʻaki ʻetau ngaahi foʻi vitioó ki he ola lelei tahá?