ʻOku Ueʻi Kitautolu ʻe Heʻetau Tuí ki he Ngaahi Ngāue Leleí
1 Naʻe fakatupunga ʻe he tuí ʻa Noa, Mōsese, mo Lēhapi ke nau fai ha ngāue. Naʻe langa ʻe Noa ʻa e ʻaʻaké. Naʻe liʻaki ʻe Mōsese ʻa e ngaahi ʻaonga fakataimi ʻo e moʻui ʻi he lotoʻā ʻo Feló. Naʻe fūfuuʻi ʻe Lēhapi ʻa e ongo sipaí pea talangofua leva ki heʻena ngaahi fakahinohinó, ʻo fakahaofi ai ia mo hono fāmilí. (Hep. 11:7, 24-26, 31) Ko e hā ʻa e ngaahi ngāue lelei ʻoku ueʻi ʻe heʻetau tuí kitautolu ke fai he taimi ní?
2 Faifakamoʻoni: ʻOku ueʻi kitautolu ʻe he tuí ke tau lea fekauʻaki mo hotau ʻOtua fakaofó pea mo ʻene ngaahi tokonaki ki he fiefia tuʻuloá. (2 Kol. 4:13) ʻI he taimi ʻe niʻihi, ʻoku tau ongoʻi toumoua nai ai ke fai ha fakamoʻoni. Ka ʻi he taimi ʻoku tau hanga ai ʻo ‘fokotuu mau ai be a Jihova i hotau aó,’ ʻoku fakaivimālohiʻi ai kitautolu pea fakaholoholo hifo ai mo e tailiilí. (Sāme 16:8, PM) ʻOku ueʻi leva kitautolu ʻe heʻetau tuí ke vahevahe atu ʻa e ongoongo leleí ki he ngaahi kāingá, ngaahi kaungāʻapí, ngaahi kaungāngāué, ngaahi kaungāakó, pea ki he niʻihi kehé ʻi he faingamālie kotoa pē.—Loma 1:14-16.
3 Fakatahataha Fakataha: Ko e maʻu maʻu pē ʻa e fakatahá ko e ngāue lelei ia ʻe taha ʻoku tupu mei he tuí. ʻO anga-fēfē? ʻOku fakahaaʻi ai ʻetau tuipau ʻoku ʻi hotau lotolotongá ʻa Sīsū fakafou ʻi he laumālie māʻoniʻoni ʻo e ʻOtuá ʻi he taimi ʻoku tau fakatahataha ai ʻi he ngaahi fakataha faka-Kalisitiané. (Mt. 18:20) ʻOku fakahāhā ai ʻetau holi ke “fakafanongo ki he meʻa ʻoku folofolaʻaki ʻe he Laumalie ki he ngaahi siasi.” (Fkh. 3:6) ʻOku tau tokanga ki he fakahinohino ʻoku tau maʻú koeʻuhí fakafou ʻi heʻetau tuí ʻoku tau mahinoʻi ai ko e tokotaha ʻokú ne akoʻi kitautolú ko ʻetau Faiako Maʻongoʻongá, ʻa Sihova.—Ai. 30:20.
4 Ko e Ngaahi Fili ʻOku Tau Faí: Ko e tuipau mālohi ki he ngaahi moʻoni ʻoku ʻikai hā maí ʻoku ueʻi ai kitautolu ke ʻai ʻa e ngaahi meʻa fakalaumālié ke muʻomuʻa ʻi heʻetau moʻuí. (Hep. 11:1) ʻOku faʻa kau heni ʻa hono fai ha ngaahi feilaulau fakamatelie. Ko e fakatātaá, ko ha tokotaha mātuʻa naʻá ne fakafisi ke tali ha tuʻunga māʻolunga ʻi he ngāue fakamāmaní koeʻuhi he ʻe ʻuhinga iá ko hano liʻaki ai ʻa e ngaahi fakatahá, mamaʻo ai mei hono fāmilí, pea taʻofi ai ʻa ʻene ngāue fakafaifekau tāimuʻá. ʻOfa ke tau tuku ʻi he tuʻunga tatau ʻetau tuipau kakató ki he fakapapau ʻa e Tohitapú ʻo pehē ʻe tokonaki ʻe Sihova maʻá e faʻahinga ʻoku “hanganaki fuofua kumi ʻa e puleʻangá pea mo ʻene māʻoniʻoní.”—Mt. 6:33, NW.
5 Ko e tākiekina mālohi ʻoku ʻai ʻe he tuí ki heʻetau moʻuí heʻikai taʻefakatokangaʻi ʻe he niʻihi kehé. Ko e moʻoni, ʻoku ʻiloa ʻetau tuí ʻi māmani lahi. (Loma 1:8) Ko ia ai, ʻofa ke fakahāhā ʻe kitautolu kotoa, ʻi heʻetau ngaahi ngāue leleí ʻoku moʻui ʻetau tuí.—Sem. 2:26.