Fiemālie Pē ʻi he Meʻa ʻOkú Ke Maʻú
1 ʻOku enginaki mai ʻa e ngaahi Konga Tohitapú kia kitautolu ke tau tokonaki fakamatelie ki hotau fāmilí, ka ʻoku ʻikai totonu ke hoko eni ko ʻetau taumuʻa tefito ia ʻi he moʻuí. Kuo pau ke muʻomuʻa ʻa e ngaahi meʻa fakalaumālié. (Mt. 6:33; 1 Tim. 5:8) Ko hono maʻu ʻa e mafamafatatau totonú ko ha pole ia ʻi he “ngaahi taimi faingataʻa” ko ení. (2 Tim. 3:1) Ko e hā te ne tokoniʻi kitautolu ke fai iá?
2 Ngāueʻaki ʻa e Tuʻunga ʻa e Tohitapú: ʻOku fakatokanga mai ʻa e Folofola ʻa e ʻOtuá kia kitautolu ko e tuli ki he koloá ʻe lava ke ne fakatupunga ʻa e maumau fakalaumālie. (Koh. 5:10; Mt. 13:22; 1 Tim. 6:9, 10) ʻI he taimi mahuʻinga ko ení, ʻe fakatuʻutāmaki ki ha taha pē ʻo kitautolu ke hoko ʻo mātuʻaki nōfoʻi ʻi he ngāue fakamāmaní pe ko e ngaahi meʻa fakapaʻangá ʻo tau ʻohifo ai ʻa e ngaahi ngāue fakalaumālié—ʻa e ngaahi fakatahá, akó mo e ngāué—ke fika ua ʻi heʻetau moʻuí. (Luke 21:34-36) ʻI hono kehé, ʻoku akonaki ʻa e Tohitapú: “I he e tau maʻu ae mea kai moe kofu ke tau fiemalie ai.”—1 Tim. 6:7, 8, PM.
3 ʻOku ʻikai ʻuhinga eni ia ʻoku fiemaʻu ki he kau Kalisitiané ke nau moʻui ʻi ha tuʻunga masiva ko e fakatupu ʻe kita. Ka ʻokú ne tokoniʻi kitautolu ke tau ʻiloʻi pe ko e hā moʻoni ʻa ʻetau ngaahi fiemaʻu fakamatelié—ʻa e meʻakai, vala mo e nofoʻanga ʻoku feʻunga ki he feituʻu ʻoku tau nofo aí. Kapau ʻoku tau maʻu ʻa e ngaahi meʻa ʻoku fiemaʻu ki he moʻuí, ʻoku ʻikai totonu ke tau tuli taʻefakangatangata ki ha tuʻunga māʻolunga ange ʻo e moʻuí. ʻI he fakakaukau fekauʻaki mo hono fakatau ha meʻa pe fai ha ngāue fakalahí, ʻoku lelei ke tau ʻeke hifo kia kitautolu, ‘ʻOku fiemaʻu moʻoni ʻa e meʻá ni?’ Ko hono fai iá ʻe tokoniʻi ai kitautolu ke tokanga ki he akonaki fakamānavaʻi: “Ke taʻemanumanu hoʻomou toʻonga; pea mou fiemalie ʻi he ngaahi meʻa ʻoku mou maʻu ni.”—Hep. 13:5.
4 Kapau ʻoku tau falala kia Sihova, te ne tāpuakiʻi kitautolu. (Pal. 3:5, 6) Neongo kuo pau ke tau ngāue mālohi ke maʻu ʻa e ngaahi fiemaʻu fakaʻahó, ʻoku ʻikai fakatefito ʻetau moʻuí ʻi he ngaahi meʻa ko iá. Pe ʻoku tau maʻu ha meʻa siʻisiʻi pe lahi, ʻoku tau falala kia Sihova ke ne fakalato ʻetau ngaahi fiemaʻú. (Fili. 4:11-13) Ko hono olá, ʻoku tau maʻu ai ʻa e fiemālie fakaʻotua fakataha mo e ngaahi tāpuaki lahi kehe.
5 Faʻifaʻitaki ki he Tui ʻa e Niʻihi Kehé: Ko ha tokotaha mātuʻa-taʻehoa ʻa ia naʻá ne tauhi hake ʻa ʻene tamá ʻi he founga ʻo e moʻoní naʻá ne fakafaingofuaʻi ʻi ha tuʻunga fakalakalaka ʻa ʻene moʻuí. Neongo naʻá ne maʻu ʻa e ngaahi meʻa fakafiemālie ʻi hono ʻapí, naʻá ne hiki ki ha kiʻi fale siʻisiʻi ange pea ki mui ai ki ha ʻapaatimeni. Naʻe ʻai ʻe he meʻá ni ke ne lava ai ʻo fakasiʻisiʻi ʻa ʻene ngaahi houa ngāué kae lava ke ne līʻoa ʻa e taimi lahi ange ki he ngāue fakafaifekaú. Hili e tupu hake ʻa ʻene tamá pea malí, naʻe mālōlō ki muʻa ʻa e faʻeé mei he ngāué, neongo naʻe ʻuhinga ení ki ha toe holoki hifo ʻa ʻene paʻanga hū maí. Ko hotau tuofefiné ko e taʻu ʻaki eni ʻe fitu ʻo ʻene ʻi he tuʻunga ko ha tāimuʻa tuʻumaʻu pea ʻoku ʻikai haʻane fakaʻiseʻisa fekauʻaki mo e ngaahi feilaulau fakamatelie naʻá ne fai ke fakamuʻomuʻa ai ʻa e ngaahi meʻa ʻo e Puleʻangá ʻi heʻene moʻuí.
6 Naʻe tāimuʻa ha tokotaha mātuʻa mo hono uaifí ʻi he ngaahi taʻu lahi lolotonga ia hono tauhi hake ʻa e fānau ʻe toko tolu. ʻI he tuʻunga ko ha fāmilí, naʻa nau ako ke fiemālie pē ʻi hono fakalato ʻenau ngaahi fiemaʻú kae ʻikai ʻi hono fakatōliʻa ʻa ʻenau ngaahi holí. ʻOku pehē ʻe he tokouá: “Naʻe pau ke mau moʻui ke toe faingofua ange. Neongo ne mau maʻu ha ngaahi taimi faingataʻa, kuo tokonaki mai maʻu pē ʻe Sihova ʻa e meʻa naʻa mau fiemaʻú. . . . ʻI heʻeku sio ki hoku fāmilí ʻoku nau fakamuʻomuʻa ʻa e ngaahi meʻa fakalaumālié hangē ko ia he taimi ní, ʻoku ou ongoʻi ai ʻoku tonu ʻa e meʻa kotoa pē, pea ʻoku ou ongoʻi lavameʻa.” ʻOku tānaki mai ki ai ʻe hono uaifí: “ʻI heʻeku sio ki [hoku husepānití] ʻoku femoʻuekina ʻi he ngaahi meʻa fakalaumālié, ʻoku ou ongoʻi ʻi loto ʻa e fiemālie lahi.” ʻOku fiefia foki mo e fānaú ʻi he fili ʻa ʻenau ongo mātuʻá ke ngāue taimi-kakato kia Sihová.
7 Ki he faʻahinga kotoa ʻoku nau fili ha ʻalunga pehē ʻo e anga-līʻoa fakaʻotuá kae ʻikai ko e tuli ki he ngaahi meʻa fakamatelié, ʻoku talaʻofa mai ʻe he Tohitapú ʻa e ngaahi tāpuaki lahi fakatouʻosi he taimí ni pea ʻi he moʻui ka hoko maí.—1 Tim. 4:8.