Tuʻuaki ʻa e ʻŪ Tohí ʻi he Feituʻu Lea Kehekehé
1. Ko e hā ʻoku fiemaʻu ai ʻe he ngaahi fakatahaʻanga lahi ha ʻū tohi ʻi ha lea mulí?
1 ʻI he ngaahi feituʻu lahi, ʻoku kamata ke hoko ʻo kau mai ki he malaʻé ʻa e kakai mei he ngaahi fonua kehe. Ko e tokolahi ʻo e faʻahingá ni ʻoku nau ako vave lahi ange pea mo ha mahino loloto ange ʻi he taimi ʻoku akoʻi ai kinautolu ʻi heʻenau lea tuʻufonuá. Ko e hā ʻa e ngaahi fokotuʻutuʻu ʻoku ʻi ai ke tokonaki ai ki he faʻahinga mahuʻingaʻiá ʻa e ʻū tohi makatuʻunga faka-Tohitapú ʻi he lea ʻoku nau mahinoʻi lelei tahá?
2. Ko e hā ʻa e ngāue fāitaha ʻoku fiemaʻu ʻi he taimi ʻoku ngāue ai ʻa e fakatahaʻanga lea kehekehe ʻe ua pe lahi ange ʻi ha feituʻu tatau?
2 Taimi ke Tuʻuaki Ai ʻa e ʻŪ Tohí: ʻI he taimi ʻoku ngāue ai ʻa e fakatahaʻanga lea kehekehe ʻe ua pe lahi ange ʻi ha feituʻu tatau, ko e kulupu ʻo e kau mātuʻa ʻoku kau ki aí te nau ngāue fāitaha mo e kau ʻovasia ngāué ʻi hono fokotuʻu ha founga ʻa ia ʻe ala tali kotoa koeʻuhi ke fai ai ʻe he kulupu lea taki taha ha fakamoʻoni fakaʻāuliliki. ʻI he taimi ʻo e malanga fale-ki-he-falé, ʻe ʻikai ke tuʻuaki anga-maheni ai ʻe he kau malangá ʻa e ʻū tohí ʻi he lea ʻa e (ngaahi) fakatahaʻanga kehé. Kae kehe, ʻi he taimi ʻoku fakamoʻoni ai ʻa e kau malangá ʻi he founga ʻikai anga-mahení pe ʻi he ngaahi feituʻu kakaí, te nau tuʻuaki nai ai ʻa e ʻū tohi ʻi he ngaahi lea ʻa e feituʻú.—Sio ki he Puha Fehuʻi ʻi he ʻEtau Ngāue Fakafaifekau ʻo e Puleʻanga ʻo Tīsema 1990, peesi 7.
3. Ko fē ʻa e taimi ʻe ʻai ai ʻe ha fakatahaʻanga ha sitoka ʻo ha ʻū tohi lea mulí?
3 Taimi ke ʻAi Ai ha Sitoka ʻo e ʻŪ Tohí: Ko e hā ʻe lava ke fai kapau ʻoku ʻi ai ha kakai lea muli ʻi ha feituʻu ka ʻoku ʻikai ha fakatahaʻanga ʻe lea ʻi he lea tefito ko iá? ʻI he malumalu ʻo e ngaahi tuʻunga ko iá, ʻe ʻai nai ʻe he ngaahi fakatahaʻangá ha sitoka ʻi ha tuʻunga siʻisiʻi ʻo e ʻū tohi tefito ʻa ia ʻoku ala maʻu ʻi he lea ko iá, hangē ko e ngaahi tulekí, ko e polosiua Fiemaʻu mo e Kaumeʻa ʻo e ʻOtuá, pea mo e tohi ʻIlo. ʻE tuʻuaki nai ʻe he kau malangá ʻa e ʻū tohí ni ʻi ha taimi pē ʻoku nau fetaulaki ai mo e kakai ʻoku lava ke nau lautohi ʻi he lea ko iá.
4. ʻE lava fēfē ke maʻu mai ʻa e ʻū tohí ʻi ha lea ʻoku ʻikai ke maʻu ʻi he sitoka ʻa e fakatahaʻangá?
4 Founga ke ʻOta Ai ʻa e ʻŪ Tohí: Kapau ʻe ʻikai ʻai ʻe he fakatahaʻangá ha sitoka ʻo e ʻū tohí ʻi he lea ʻoku lautohi ai ha tokotaha mahuʻingaʻiá, ʻe lava fēfē ke maʻu ha ʻū tohi ʻi he lea ko iá? ʻOku totonu ke vakaiʻi ʻe he tokotaha malangá ki he sevāniti tohí ke fakapapauʻi pe ko fē ʻa e ʻū tohi ʻoku ala maʻu ʻi he lea ko iá koeʻuhi ke lava ʻo ʻota mai ʻa e ʻū tohi ʻoku fiemaʻú fakataha mo e kole tohi hoko mai ʻa e fakatahaʻangá ki he ʻū tohí.
5. Ko e hā ʻe lava ke fai kapau ʻoku fiemaʻu ʻa e ʻū tohí ia ki muʻa ke maʻu mai ʻa e ʻū tohi ʻi he kole tohi hoko maí?
5 Kapau ʻoku fiemaʻu ha ngāue vave ange, ʻe kole nai ʻa e tokotaha malangá ki ha mēmipa ʻo e Kōmiti Ngāue ʻa e Fakatahaʻangá pe ʻe lava ke ʻoatu ʻa e kolé ki muʻa ʻi he kole tohi hoko mai ʻa e fakatahaʻangá kuo fakataimitēpileʻí. Kapau ʻe tali eni, ko e kouʻotineita ʻo e ʻū tohí pe ko ha taha te ne vaheʻi ki ai ʻe lava ke ne fai ha kole fakavavevave fakafou ʻi he meilí pe ʻi he telefoni ki he ʻōfisi vaʻá. ʻE fakaheka mai ʻa e ʻū tohí ki he tuʻasila tufa tuʻumaʻu ʻa e fakatahaʻangá pe ki ha tuʻasila tufa fakataimi, kapau ʻe fiemaʻu. Kapau ʻoku kole ke ʻomai ʻi ha pō ʻe taha pe ʻaho ʻe ua, ʻe totongi ʻe he fakatahaʻangá ʻa e ngaahi fakamole ʻo hono ʻomaí.
6. Ko e hā ʻetau taumuʻa ʻi hono ʻai ke ala maʻu ʻa e ʻū tohí?
6 ʻOfa ke tau ngāueleleiʻaki ʻa e ʻū tohi faka-Kalisitiané ke tokoniʻi ai ʻa e “kakai kotoa pe,” ʻo tatau ai pē pe ko e hā ʻenau leá, ke nau ‘aʻusia ʻa e ʻilo kanokano ki he moʻoní pea ke nau moʻui.’—1 Tim. 2:3, 4.