Ngāue ʻOku Fakaivifoʻou
1 Ko e pōpoaki ʻa e Tohitapú ʻokú ne fakaivifoʻou ʻa e faʻahinga kotoa ʻoku nau ngāueʻaki ia ʻi heʻenau moʻuí. (Sāme 19:7, 8) ʻOkú ne tokoniʻi kinautolu ke nau ʻatā mei he ngaahi akonaki loí mo e ngaahi tōʻonga fakatupu maumaú pea ʻomai ha ʻamanaki alafalalaʻanga ki he kahaʻú. Kae kehe, ko e faʻahinga ʻoku nau tali ʻa e ongoongo leleí ʻoku ʻikai ko e faʻahinga pē ia ʻe maʻu ʻaongá. Ko e faʻahinga ʻoku nau vahevahe atu ʻa e ngaahi moʻoni faka-Tohitapú ki he niʻihi kehé ʻoku toe fakaivifoʻou mo kinautolu foki.—Pal. 11:25.
2 Fakalongomoʻuiʻi ʻe he Ngāue Fakafaifekaú: Naʻe pehē ʻe Sīsū ko e faʻahinga ʻoku nau tali ʻa e ʻioke ʻo e tuʻunga ākonga faka-Kalisitiané, ʻa ia ʻoku kau ki ai ʻa e ngāue fakamalangá mo e ngaohi-ākongá, te nau “ʻilo ha fakaivifoʻou ki [honau] soulú.” (Mt. 11:29, NW) Ko ia tonu naʻá ne ʻiloʻi ko e faifakamoʻoni ki he niʻihi kehé ʻoku fakatupu longomoʻui. Naʻe hangē ia ha meʻakaí kiate ia. (Sione 4:34) ʻI heʻene fekauʻi atu ʻa e kau ākonga ʻe toko 70 ke malangá, naʻa nau fiefia ʻi heʻenau sio ki hono poupouʻi ʻe Sihova ʻenau ngaahi feingá.—Luke 10:17.
3 Ko e kau Kalisitiane tokolahi he ʻaho ní ʻoku fakalongomoʻuiʻi tatau kinautolu ʻi heʻenau kau ʻi he ngāue fakamalangá. Naʻe pehē ʻe ha tuofefine ʻe taha: “ʻOku fakaivifoʻou ʻa e ngāue fakafaifekaú koeʻuhi ʻokú ne ʻomai ki heʻeku moʻuí ʻa e tataki mo e taumuʻa. Ko e ngaahi palopalema fakafoʻituituí pea mo e ngaahi faingataʻa fakaʻahó ʻoku mole atu ia ʻi heʻeku kau ʻi he ngāué.” Naʻe pehē ʻe ha faifekau faivelenga ʻe taha: “Ko e ngāue fakafaifekaú . . . ʻokú ne ʻai ʻa Sihova ke moʻoni kiate au ʻi ha tuʻunga fakaʻaho pea ʻomai kiate au ʻa e nonga mo ha tuʻunga ʻo e fiefia ʻi loto ʻa ia ʻe ʻikai lava ke maʻu ia ʻi ha toe ngaahi founga kehe.” Ko ha monū moʻoni ē ʻoku tau maʻu ke hoko ko e ‘kau kaungāngaue mo e ʻOtuá’!—1 Kol. 3:9.
4 ʻIoke ʻa Kalaisí ʻOku Anga-ʻOfa: Lolotonga ʻoku ekinaki ki he kau Kalisitiané ke nau ‘tōtōiví,’ ʻoku ʻikai ke kounaʻi mai ʻe Sīsū ia ha meʻa lahi ange ʻi he meʻa ʻoku tau malava ke foakí. (Luke 13:24) Ko e moʻoni, ʻokú ne fakaafeʻi anga-ʻofa kitautolu ke ‘hū ki heʻene ʻioké fakataha mo ia.’ (Mt. 11:29, NW, lalo.) Ko e faʻahinga kuo pau ke nau fāinga mo e ngaahi tuʻunga faingataʻá ʻe lava ke nau falala ko ʻenau ngāue ʻaufuatoó, neongo kapau ʻoku fakangatangata, ʻoku fakahōifua ia ki he ʻOtuá.—Mk. 14:6-8; Kol. 3:23.
5 He fakaivifoʻou ē ke tauhi ki ha ʻOtua ʻokú ne fakamahuʻingaʻi ha meʻa pē ʻoku tau fai koeʻuhi ko hono huafá! (Hep. 6:10) ʻOfa ke tau feinga maʻu pē ke ʻoange kiate ia ʻetau lelei tahá.