Meʻa ke Leaʻaki Fekauʻaki mo e Ngaahi Makasiní

Ko e Taua Leʻo Tīs. 15

“ʻI he taimi ko eni ʻo e taʻú, ʻoku fakakaukau ai ʻa e kakai tokolahi ʻo fekauʻaki mo e ʻaloʻi ʻo Sīsuú. Kuó ke fifili nai ʻi ha taimi pe ko e fāmili fēfē naʻá ne tupu hake aí? [Tuku ke ne tali. Pea lau leva ʻa e Luke 2:​51, 52.] Ko e ʻīsiu ko eni ʻo e Taua Leʻo ʻoku lāulea ai ki he ngaahi lēsoni ʻaonga ʻe lava ke tau maʻu mei he lēkooti faka-Tohitapu ʻo hono ʻohake ʻo Sīsuú.”

Awake! Tīs. 22

“Ko kitautolu kotoa ʻoku tau holi ke sio ki heʻetau fānaú ʻoku nau maʻu ha moʻui fiefia mo lavameʻa. ʻOkú ke fakakaukau ko e hā ʻoku fiemaʻu lahi taha ʻe he fānaú ke fekuki ai mo e māmani fonu faingataʻa he ʻaho ní? [Tuku ke ne tali. Pea lau leva ʻa e Palovepi 22:6.] Ko e ʻīsiu ko eni ʻo e Awake! ʻoku lāulea ai ki he meʻa ʻoku fiemaʻu ʻe he fānaú pea mo e founga ʻe lava ke feau ai ʻe he ngaahi mātuʻá ʻa e ngaahi fiemaʻu ko ení.”

Ko e Taua Leʻo San. 1

“ʻOku fakaʻamu ʻa e kakai tokolahi ki ha melino ʻi he māmaní. ʻOkú ke fakakaukau ʻe faifai ange pea tau sio ki hano fakahoko ʻo e ngaahi meʻá ni? [Lau ʻa e Sāme 46:9. Pea tuku leva ke ne tali.] Ko e ʻīsiu ko eni ʻo e Taua Leʻo ʻoku lāulea ai ki he founga ʻe fakahoko ai ení mo e ʻuhinga ʻe lava ai ke tau maʻu ʻa e tuipau ki he palōmesi ʻa e ʻOtuá ʻo fekauʻaki mo ha māmani ʻe ʻikai ha taú.”

ʻĀ Hake! San.-Mas.

“Kapau kuó ke fehangahangai ʻi ha taimi pe ko ha mēmipa ʻo ho fāmilí pea mo e houtamakí, ʻokú ke ʻiloʻi ʻa e fakalotomafasia ʻoku lava ke hokó. [Tuku ke ne tali.] Ko e ʻīsiu ko eni ʻo e ʻĀ Hake! ʻoku ʻomai ai ʻa e ngaahi fokotuʻu ʻaonga ki he faʻahinga maʻukovia ʻe he houtamakí. ʻOku toe lāulea ai ki he palōmesi ʻa e ʻOtuá ʻo fekauʻaki mo ha taimi ʻa ia ʻe ʻatā fakaʻaufuli ai ʻa e moʻuí mei he ngaahi palopalema peheé.” Lau ʻa e Maika 4:4.