Maʻu Tuʻumaʻu ʻa e Fakatahá—Ko ha Meʻa Muʻomuʻa
1 ʻOku fakamuʻomuʻa ʻe he ngaahi fāmili Kalisitiané ʻa hono maʻu tuʻumaʻu ʻa e ngaahi fakataha ʻa e fakatahaʻangá. Ka ko e ngaahi fiemaʻu ʻi he moʻuí ki he ʻaho ní ʻe lava ke fakahoko mai ai ha pole. ʻOku kamata ke halalotoʻapi ʻa e ngaahi fatongia fakaʻapí, ngāue fakamāmaní, pe ngāue fakaakó ʻi he taimi kuo vaheʻi ki he lotu kia Sihová? Ko e sio ki he ngaahi meʻá mei he tuʻunga ʻa Sihová te ne tokoniʻi kitautolu ke tauhi maʻu ʻa ʻetau ngaahi meʻa muʻomuʻá.—1 Sam. 24:6; 26:11.
2 ʻI he okooko fefie he Sāpaté, naʻe fai ʻiloʻilo pau ai ʻe he tangata ʻIsileli ʻe taha ʻa e ʻikai ke fakakaukau ki he anga ʻo e vakai mai ʻa Sihová. Naʻá ne fakaʻuhinga nai ko ʻene fai eni maʻa hono fāmilí pe ko e pehē ko ha kiʻi meʻa siʻisiʻi pē ia. Kae kehe, fakafou ʻi he fakamaau naʻe faí, naʻe fakahaaʻi ai ʻe Sihova ko e tuli ki he ngaahi ngāue fakamāmaní lolotonga ʻa e ngaahi taimi kuo vaheʻi ki he lotú ko ha meʻa mafatukituki ia.—Nom. 15:32-36.
3 Fekuki mo e Polé: Ki he tokolahi ko ha faitau ia ke taʻofi ʻa e ngāue fakamāmaní mei heʻene taʻofi ʻa e maʻu fakatahá. Kuo fekuki ʻa e niʻihi mo e pole ko ení ʻaki ʻenau lea ki honau pule ngāué, fetongi ʻa e ngaahi sifí mo e kaungāngāué, kumi ki ha ngāue feʻungamālie ange, pe ko hono fakafaingofuaʻi ʻenau sīpinga moʻuí. Ko e moʻoni, ko e ngaahi feilaulau pehē maʻá e lotu moʻoní ʻoku fakahōifua ia ki he ʻOtuá.—Hep. 13:16.
4 ʻOku lava ke toe ʻomai ʻe he ngāue fakaakó ha pole. “ʻOku ou fai ʻa e niʻihi ʻo ʻeku ngāue fakaakó ki muʻa ʻi he ngaahi fakatahá pea ko e toengá ʻi he hili ʻeku foki ki ʻapí,” ko e lau ia ʻa ha toʻutupu ʻe taha. Kapau ʻoku ʻikai lava ke kakato ʻa e homueka kotoa kuo vaheʻi maí ʻi he ngaahi pō fakatahá, kuo fakamatalaʻi ai ʻe he ngaahi mātuʻa ʻe niʻihi ki he kau faiakó ko e maʻu ʻo e ngaahi fakataha faka-Kalisitiané ko ha meʻa muʻomuʻa ia ki honau fāmilí.
5 Ko e fāitahá mo e palani leleí ʻa e ongo kī ki hono lavaʻi ʻa e ngaahi ngāue fakaʻapí ʻi he teuteu ki he maʻu taimi totonu ʻo e ngaahi fakatahá ʻi he tuʻunga ko ha fāmilí. (Pal. 20:18) Naʻa mo e fānau iiki angé ʻe lava ke akoʻi kinautolu ke nau ʻai vala pea maau ke mavahe ki he fakatahá ʻi ha taimi pau. ʻI heʻenau faʻifaʻitakiʻangá, ʻe lava ke ʻai ai ʻe he ngaahi mātuʻá ke maongo ki heʻenau fānaú ʻa e mahuʻinga ʻo e ngaahi fakatahá.—Pal. 20:7.
6 ʻI he fakautuutu ʻa e ngaahi tenge ʻa e fokotuʻutuʻu lolotonga ʻo e ngaahi meʻá, ʻoku mātuʻaki mahuʻinga ke tau maʻu tuʻumaʻu ʻa e ngaahi fakataha ʻa e fakatahaʻangá. ʻOfa ke tau hokohoko atu ke vakai ki he ngaahi meʻá mei he tuʻunga ʻa Sihová pea ʻai ʻa hono maʻu tuʻumaʻu ʻo e fakatahá ko ha meʻa muʻomuʻa.—Hep. 10:24, 25.