Kuo Pau Ke Tau Tokaʻi ʻa e Tuʻunga Mafai ʻo Sihová
ʻOkú ke fakafekauʻaki ki he hā ʻa e ngaahi hingoa motuʻa ko e Kola, Tētani mo e ʻApilamí? Ki he angatuʻu! Ki he hā? Tuʻunga mafai fakaʻotuá. Ko e ngaahi fakaikiiki ʻo honau ʻalunga fakamamahí ʻoku lēkooti ia ʻi he Nomipa vahe 16, pea ko ha fakanounou ʻo e meʻá ni ʻoku ʻomai ia ʻi he kupu ko e “Moʻulaloa Mateaki ki he Mafai Fakaʻotuá” ʻi he Taua Leʻo ʻo ʻAokosi 1, 2002. Te ke ʻiloʻi ʻoku ʻaonga ke lau ʻa e fakamatalá ni pea toki vakai leva ki hono fakatātaaʻi mafatukituki ia ʻi he foʻi vitiō ko e Respect Jehovah’s Authority. Te ke sio ai ki he fepaki naʻe tupu ʻi he vahaʻa ʻo e ngaahi foha faitōnunga ʻo Kolá mo ʻenau tamai angatuʻú, ʻa ia naʻá ne ʻi ha ʻalunga fakafepaki ki he Hau ʻo e ʻunivēsí. (Nom. 26:9-11) Ko e tulama moʻoni ko eni ʻi he moʻuí ʻoku totonu ke ne ueʻi ai kitautolu kotoa ke fakatupulekina ke toe kakato ange ʻa ʻetau mateaki kia Sihová.
ʻI hoʻo sio he foʻi vitioó, kumi ki he fakamoʻoni naʻe tō ʻa Kola mo hono ngaahi kaungā angatuʻú ʻi he ʻahiʻahi ʻo e mateakí ʻi he ngaahi tafaʻaki mahuʻinga ʻe ono: (1) Naʻe anga-fēfē ʻenau taʻetokaʻi ʻa e tuʻunga mafai fakaʻotuá? (2) Naʻe anga-fēfē ʻenau tuku ʻa e hīkisiá, kumi tuʻungá mo e meheká ke ne uesia kinautolú? (3) Naʻe anga-fēfē ʻenau tokangataha ki he ngaahi taʻehaohaoa ʻa e faʻahinga naʻe fakanofo ʻe Sihová? (4) Ko e hā ʻa e fakakaukau lāunga naʻa nau fakatupulekiná? (5) Ko e hā naʻa nau hoko ai ʻo taʻefiemālie ʻi honau ngaahi monū ʻi he ngāué? (6) Naʻe anga-fēfē ʻenau fakaʻatā ʻa e ngaahi kaumeʻá mo e fāmilí ke muʻomuʻa ʻi heʻenau mateaki ki he ʻOtuá?
Fakakaukau ki he anga ʻo e kaunga ʻa e ngaahi lēsoni ʻoku ako ʻi he tulama Fakatohitapu ko ení ki heʻetau vakai fakafoʻituitui he ʻahó ni ki he tuʻunga mafai fakaʻotuá: (1) ʻOku totonu ke fēfē ʻetau tali ki he ngaahi fili ʻa e kau mātuʻa ʻi he fakatahaʻangá, pea ko e hā hono ʻuhingá? (2) ʻE lava fēfē ke tau fakafepakiʻi ha ngaahi fakaueʻiloto taʻetotonu pē ʻi loto ʻia kitautolu? (3) ʻOku totonu ke fēfē ʻetau tali ki he ngaahi taʻehaohaoa ʻa e faʻahinga kuo fakanofo ke nau takimuʻá? (4) Ko e hā ʻoku totonu ke tau faí kapau ʻe kamata ke tupu ha laumālie lāunga ʻi hotau lotó? (5) ʻOku totonu ke fēfē ʻetau ongoʻi fekauʻaki mo ha ngaahi monū pē kuo ʻomai kia kitautolu? (6) Ko hai ʻoku totonu ke ʻoua ʻaupito ʻe fakamuʻomuʻa ʻi heʻetau mateaki ki he ʻOtuá, pea ko fē ʻa e taimi ʻe hoko nai ai eni ko ha ʻahiʻahi faingataʻa kia kitautolú?
Hili ʻa e lāulea ki he fakamatala ko ení ʻi he fakatahaʻangá, fēfē ke toe sio he foʻi vitioó. Tuku ke toe maongo ange ki ho ʻatamaí ʻa e ngaahi ʻuhinga kuo pau ai ke tau tokaʻi maʻu pē ʻa e tuʻunga mafai ʻo Sihová!—Sāme 18:25; 37:28.