Polokalama ʻAho ʻAsemipilī Makehe Foʻou
Ko e kaveinga ʻo e polokalama ʻaho ʻasemipilī makehe ki he taʻu fakangāue 2008 “Ko Kitautolu ko e ʻUmea—Ko Sihova Hotau Tufunga ʻUmeá,” makatuʻunga ʻi he Aisea 64:8. Ko e akonaki Fakatohitapu ʻoku tokonaki ʻo fakafou mai ʻi he polokalama ko ʻení te ne fakalahi ʻetau mahino ki he poto, fakamaau totonu, mālohi mo e ʻofa ʻa Sihová ʻi hono tuʻunga ko e Tufunga ʻUmea Lahí.
Ko e malanga ʻa e ʻovasia sēketí, “Ngāue ko e Ngaahi Ipu Kinokinoifie ʻi he Ngāue Fakafaifekaú,” ʻe fakahaaʻi mai ai ʻa e founga ʻo hono maʻu ʻe he kakai tokolahi ange ʻa e tāpuaki lahi fau ko hono ʻiloʻi ʻa e moʻoní pea mo hono vahevahe atu ia ki he niʻihi kehé. Ko e malanga “ʻE Maluʻi Koe ʻe he Fakalaulaulotó” ʻe fakahaaʻi mai ai ʻa e founga ʻo hono maluʻi kitautolu ʻe he fakalaulauloto fakamātoato ki he ngaahi tefitoʻi moʻoni ʻa Sihová. ʻE fakahanga ʻe he tokotaha malanga ʻaʻahí ʻa e kau fanongó ki he ongo kaveinga “ʻIkai ‘Fakaangatatau ki he Maama ko Eni’” mo e “Hoko ʻo Fakafuo ʻe he Tufunga ʻUmea Lahí.” ʻE maʻu ʻe he ngaahi mātuʻá mo e fānaú ʻa e fakalototoʻa ʻi he ongo konga “Kau Talavou ʻOku ʻAonga kia Sihova” pea mo e “Ngafa Mahuʻinga ʻo e Ongo Mātuʻá ʻi he Ngāue Fakafuó.” Fakafou ʻi he ngaahi fakahāhaá mo e ngaahi fakaʻekeʻeké, te tau fiefia ai ke fanongo mo mātā ʻa e meʻa ʻoku lavaʻi ʻe hotau fanga tokouá mo e fanga tuofāfiné ʻi heʻenau ngāue fakafaifekaú. Ko e faʻahinga ʻoku nau loto ke fakaʻilongaʻi ʻenau fakatapui ki he ʻOtuá ʻaki ʻa e papitaiso ʻi he vaí ʻoku totonu ke nau fakahā ia ki he ʻovasia tauhí ʻi he vave taha ʻe malavá. Fakapapauʻi ke ʻomai hoʻomou tatau ʻo e Taua Leʻo ʻe ako ʻi he uike ʻo e ʻaho ʻasemipilī makehé.
Ko e hā pē ha meʻa ʻoku taumuʻa ki ai ʻa e Tufunga ʻUmea Lahí ʻokú ne fakahoko. Ka ʻoku ʻi he tokotaha taki taha pē ʻo kitautolu ke fili pe ʻe anga-fēfē ʻetau tali ki heʻene fakafuo kitautolú. Ko e faʻahinga ʻoku fakapotopoto ʻo anganofo ki he ngaahi sīpinga mo e ngaahi fakalelei ʻa Sihová ʻe malava, hangē ko ha takaonga ʻumea ʻi ha meʻa takai ʻa ha tufunga ʻumeá, ke fakafuo, fakaleleiʻi, pea liliu ʻo hoko ko ha ngaahi ipu kinokinoifie. ʻI heʻetau ngāue fakataha mo Sihová, ʻoku tau fakahīkihikiʻi ai hono tuʻunga-haú pea maʻu ai ʻa e ngaahi tāpuaki lahi.