Tau Vahevahe Atu ʻEtau ʻAmanaki ʻo e Puleʻangá
1 ʻI he lolotonga ʻa e ngaahi ʻaho fakaʻosi faingataʻa ko ʻení, ko e tokolahi ʻi he māmaní ʻoku ʻikai haʻanau ʻamanaki. (Ef. 2:12) Kuo falala fakavalevale ʻa e niʻihi ki heʻenau ngaahi koloa fakamatelié, kau pule fakaetangatá, saienisi ʻi onopōní mo e hā fua. He fiefia ē ka ko kitautolu ʻi heʻetau maʻu ha ʻamanaki moʻoni ki he kahaʻú, ko ha ʻamanaki “moʻo taula hotau laumalie, ko e taula malohi mo maʻumaʻuluta”!—Hep. 6:19.
2 ʻI he pule ʻa e Puleʻanga ʻo e ʻOtuá, ʻe liliu ai ʻa e māmaní ko ha palataisi. ʻE toetuʻu mai ʻa e ngaahi ʻofaʻanga kuo maté. (Ng. 24:15) ʻE ʻikai ke toe ʻi ai ha masiva, fakamaau taʻetotonu, mahamahaki, taʻumotuʻa mo e mate. (Sāme 9:18; Mt. 12:20, 21; Fkh. 21:3, 4) Ko e niʻihi ʻeni ʻo e ngaahi tāpuaki ʻa Sihova ʻoku vavé ni ke fakahokó. Ko fē leva ʻa e tafaʻaki ʻo ʻetau ʻamanakí ʻoku tautefito hoʻo fakatuʻotuʻa atu ki aí?
3 Talaki ʻa e Ongoongo Leleí: Kuo pau ke ʻoua te tau tukulotoʻi pē ʻia kitautolu ʻa e ʻamanaki ʻo e Puleʻangá. ʻOku ueʻi kitautolu ʻe he ʻofa ki he ʻOtuá mo e kaungāʻapí ke tau faʻifaʻitaki kia Sīsū pea “ʻalu mo e ongoongolelei ki he masiva: . . . ke fanongonongo ʻa e tukuange ki he popula, mo e ʻā ki he kui; ke fekau ʻa e taʻeliekina ke ʻalu kuo tauʻataina.” (Luke 4:18, 19) Naʻe vahevahe atu ʻe he ʻapositolo ko Paulá ʻa e ongoongo leleí ʻi he māketí pea ʻi ha feituʻu pē naʻe maʻu ai ʻa e kakaí. Naʻá ne femoʻuekina ʻaupito ʻi he ngāue fakafaifekaú. (Ng. 18:5) ʻI he faʻifaʻitaki ki heʻene faʻifaʻitakiʻanga ʻo e faivelenga ʻi he ngāue fakafaifekaú ʻe taʻofi ai ʻa e “tokaga ki mamani, moe kākā oe koloa” mei hono fakanenefuʻi ʻetau ʻamanaki faka-Kalisitiané.—Mk. 4:19, PM.
4 ʻOku ʻikai mole ʻetau ʻamanaki ʻo e Puleʻangá ʻi he taimi ʻoku tau fetaulaki ai mo e kakai ʻoku nau fakahāhā ʻa e taʻemahuʻingaʻia, ʻo fakahaaʻi ʻa e mahuʻingaʻia siʻisiʻi ʻi he pōpoaki ʻo e Puleʻangá, pe ʻoku nau fakafepakiʻi fakahāhā kitautolú. ʻOku “tau kuku maʻu, taʻengaúe, ʻa e fai fakaha o ʻetau fakatuʻamelie” pe ʻamanakí. (Hep. 10:23) ʻOku ʻikai te tau “māʻi ʻa e Kosipeli.” (Loma 1:16) ʻE faifai atu pē ʻo ueʻi ʻe heʻetau tuipau mo e kītaki loto-moʻoní ha niʻihi ke fanongo.
5 Neongo ʻoku feʻungamālie ʻetau tokanga ki he ngaahi tuʻunga ololalo ʻo e māmaní ʻa ia ʻoku fakahoko ai ʻa e kikite ʻa e Tohi Tapú, ʻoku ʻikai ko e kau malanga kitautolu ʻo e mala. ʻI hono kehé, ʻoku fakahangataha ʻetau ngāue fakafaifekaú ki heʻetau ʻamanaki ʻo e Puleʻangá—ko e ongoongo lelei ʻo e Puleʻanga ʻo e ʻOtuá. ʻOfa ke tau malangaʻi ʻa e ongoongo leleí ni ʻaki ʻa e tuipau mo e faivelenga “ki he ilo bau oe amanaki lelei o aʻu ki he gataaga.”—Hep. 6:11, PM.