“Teu ki he Ngaue Lelei Kotoa Pe”
1 ʻI hono kamata ʻe Sīsū ha feingangāue fakamalanga foʻoú, naʻá ne vaheʻi ai ʻa e taimi ke teuteuʻi ʻa ʻene kau ākongá. (Mt. 10:5-14) Neongo ko kitautolu hono kotoa ʻoku tau femoʻuekina, ko ʻetau vaheʻi naʻa mo ha ngaahi miniti siʻi ke teuteu ai ki muʻa ke kau ʻi he ngāue fakafaifekau fale ki he falé ʻe tokoniʻi ai kitautolu ke tau utu ʻa e ngaahi ola lelei.—2 Kol. 9:6.
2 Founga ke Teuteu Aí: Ko e teuteu leleí ʻoku kamata ia ʻi he maheni mo e tohi ʻoku tau palani ke tuʻuakí. ʻOku totonu foki ke tau toe fakakaukau fekauʻaki mo e kakai ʻi hotau feituʻu ngāué. Ko e hā ʻa e ngaahi palopalema ʻoku nau hohaʻa ki aí? Ko e hā ʻa e ngaahi tui fakalotu ʻoku ngalingali te tau fetaulaki mo iá? ʻE lava ke tau kumi ki he ngaahi sīpinga tuʻuaki ʻi he ʻEtau Ngāue Fakafaifekau ʻo e Puleʻanga mo e tohi Reasoning From the Scriptures ki ha ngaahi fakakaukau.
3 Ko e fanongo tokanga ki he ngaahi fakahāhā ʻoku fai ʻi he Fakataha Ngāué ʻe toe tokoni ia kiate kitautolu. ʻI heʻetau maʻu ʻa e taukei ʻi hono ngāueʻaki ʻetau tuʻuakí, ʻe siʻi ai ʻa e taimi te tau fiemaʻu ke teuteu aí. Kae kehe, ʻi he taimi taki taha ki muʻa ke tau ō ʻi he ngāue fakafaifekaú, kapau ʻoku tau fakakaukau ki he meʻa te tau leaʻakí pea hokohoko atu ke fakaleleiʻi ʻetau tuʻuakí, te tau hoko ai ʻo ola lelei ange. ʻOku totonu ke tau toe vaheʻi foki ha mōmeniti ke vakaiʻi ai pe ʻoku ʻi heʻetau kato malangá ʻa e meʻa te tau fiemaʻú.
4 Ko e hā te ne tokoniʻi kitautolu ke tau manatuʻi ʻetau tuʻuakí? Ko e ʻahiʻahiʻi leʻo-lahí ʻa e taha ʻo e founga ke fokotuʻu maʻu ai ʻi hotau ʻatamaí ʻa e meʻa ʻoku tau loto ke leaʻakí. ʻOku fiefia ʻa e niʻihi ʻi hono ʻahiʻahiʻi ha ngaahi konga lolotonga ʻenau ako fakafāmilí. ʻOku ʻiloʻi ʻe he niʻihi ʻoku ʻaonga ke tohi ha kiʻi fakamatala fakanounou ʻo ʻenau tuʻuakí ʻi ha kiʻi lauʻipepa pea hila ki ai ki muʻa pē ke fakaofiofi ki he matapaá.
5 ʻUhinga ʻOku ʻAonga Aí: Ko e teuteu leleí ʻoku fakalahi ai ʻetau ola lelei mo e fiefia ʻi he ngāue fakafaifekaú. ʻOku tokoniʻi ai kitautolu ke tau fiemālie pea siʻi ʻetau manavasiʻi ʻi he matapaá. ʻOku tau malava ai ke fai ʻa e tokanga lahi ange ki he tokotaha-ʻapí kae ʻikai nōfoʻi pē ʻi he fakakaukau ki he meʻa te tau leaʻakí. Tānaki atu ki ai, ko e maheni mo e tohí ʻe tokoniʻi ai kitautolu ke tau loto-māfana ange ʻi he taimi ʻoku tau tuʻuaki aí.
6 ʻOku ekinaki mai ʻa e Tohi Tapú ke tau “teu ki he ngaue lelei kotoa pe.” (Tai. 3:1) Ko e hā ha toe ngāue lelei ange ʻi hono malangaʻi ʻa e ongoongo leleí? ʻI he teuteu leleí, ʻoku tau fakahāhā ai ʻa e fakaʻapaʻapa ki he tokotaha-ʻapi ʻa ia ʻoku loto-lelei ke fanongó, pea kia Sihova, ʻa e ʻOtua ʻoku tau fakafofongaʻí.—Ai. 43:10.