Malanga ʻo ʻIkai Tuku
1 ʻI he taimi ʻe niʻihi, ʻoku tau ongoʻi nai ai kuo toutou ngāueʻi fakaʻāuliliki ʻa hotau feituʻu ngāué kae siʻi ʻaupito ʻa hono talí. Neongo ia, ʻoku ʻi ai ʻa e ngaahi ʻuhinga mālohi ke tau hokohoko atu ai ʻa e malangá.—Mt. 28:19, 20.
2 Ko ha Fakamoʻoni: Naʻe tomuʻa tala ʻe Sīsū ko hono malangaʻi ʻo e Puleʻangá ʻe hoko ko ha konga mahuʻinga ia ʻo e fakaʻilonga fetuiaki ʻo e “fakaʻosiʻosi ʻo e fokotuʻutuʻu ʻo e ngaahi meʻá” pea ʻe fai ia “ko ha fakamoʻoni ki he ngaahi puleʻangá kotoa.” (Mt. 24:3, 14, NW) ʻI he sio mai ʻa e kakaí ki heʻetau kau ʻi hono malangaʻi ʻa e ongoongo lelei ʻo e Puleʻangá, ʻoku ʻoatu ai ha fakamoʻoni mālohi. ʻI heʻetau mavahe mei he feituʻú, ʻe talanoa nai ha kakai fekauʻaki mo ʻetau ʻaʻahí ʻi ha laui houa pe laui ʻaho, neongo naʻe ʻikai te nau fanongo ki he pōpoakí. Ko hono mahinoʻi ʻa e ngaahi ʻuhinga ki heʻetau ngāue fakafaifekaú ʻoku tokoniʻi ai kitautolu ke tau kītaki. ʻOku tau fakahōifuaʻi ʻa Sihova ʻi heʻetau kau ki hono fakahoko ʻo e kikite Fakatohitapú ʻi he fai ha fakamoʻoni mo fakaongo atu ha pōpoaki fakatokanga.—2 Tes. 1:6-9.
3 Fiemaʻu ʻa e Kītaki: Koeʻuhi ko e lahi fau ʻa e ngaahi fakahohaʻa ki he kakaí pea lahi fau ʻa hono kounaʻi ʻo honau taimí, ʻoku fiemaʻu ai meiate kitautolu ʻa e kītakí ʻi he taimi ʻoku tau feinga ai ke fakatupulekina ʻenau mahuʻingaʻiá. Ko ha fefine ʻe taha naʻe fai ʻa e ʻaʻahi ki ai ʻi he uike kotoa pē ʻo feʻunga mo ha taʻu ʻe taha ki muʻa ke ne fakapapauʻi ke fakaafeʻi ʻa e Kau Fakamoʻoní ki hono falé ki ha fetalanoaʻaki Fakatohitapu. Naʻá ne saiʻia ʻaupito ʻi he meʻa naʻá ne fanongo ki aí ʻo ne tali ai ke ako Tohi Tapu, kamata maʻu ʻa e ngaahi fakatahá pea vave ʻene fakahāhā ʻa ʻene holi ke papitaiso.
4 ʻOku liliu vave ʻa e ngaahi tuʻunga ʻi he māmaní, pea ʻoku toe pehē pē mo e kakaí. Ko e tokolahi naʻa nau talitekeʻi ʻetau ʻaʻahí ʻi he kuohilí te nau tali nai he taimí ni ʻa e ʻamanaki fakaivifoʻou ʻoku tau vahevahe atú. Kapau ko e toko taha pē ʻokú ne tali lelei ʻa e pōpoaki ʻo e Puleʻangá, ʻe ʻaonga ʻetau kītakí.
5 ʻI māmani lahi, ʻoku ʻalu ke toe tokolahi ange ʻa e kakai ʻoku nau “mapuhoi mo toʻe koeʻuhi ko e ngaahi fakalielia ʻoku fai.” (Isi. 9:4) Ko e ola ʻo hono malangaʻi ʻo e Puleʻangá ʻoku fakamoʻoniʻi ai ko e faʻahinga ʻoku hehema ki he māʻoniʻoní ʻoku nau tali ʻa e pōpoaki ʻo e Puleʻangá. (Ai. 2:2, 3) Ko ia ai, tau hokohoko atu ke malanga ʻo ʻikai tuku ʻaki ʻa e kītaki anga-ʻofa ʻi he “ongoongo mai ʻa e lelei.”—Ai. 52:7; Ng. 5:42.