“ʻI Homou Laumalie, Mou Loto Mafana”
1. Ko e hā ʻa e tuʻunga ʻoku totonu ke fakaʻilongaʻi ʻaki ʻetau malangá?
1 ʻOku totonu ke ʻoua ʻe tuʻu ha tafaʻaki ia ʻo ʻetau ngāue faka-Kalisitiané. ʻI hono kehé ʻoku fakalototoʻaʻi kitautolu ke ‘tau loto mafana ʻi hotau laumalié’ pea ‘ʻi he fai ki he ʻEikí, tau tauhi fakatamaioʻeiki ki ai.’ (Loma 12:11) Kae kehe, ʻoku lahi ʻa e ngaahi meʻa ʻe lava ke fakamāmālieʻi ai ʻetau faivelenga ki heʻetau ngāue fakafaifekaú. ʻE lava fēfē ke “hunuaki” ʻetau faivelenga mo e loto-māfana ki heʻetau ngāue ʻo e Puleʻangá?—2 Tim. 1:6, 7.
2. Ko e hā ʻa e fekauʻaki ʻo e ako Tohi Tapu fakafoʻituituí mo e ngāue fakafaifekau faivelengá?
2 Ako Tohi Tapu Fakafoʻituitui: Ko ha tokotaha malanga ola lelei ʻo e Puleʻangá ko ha taha ʻoku ʻofa ʻi he lao ʻa e ʻOtuá pea ʻoku maongo loloto kiate ia ʻa e ngaahi moʻoni ʻoku maʻu aí. (Sāme 119:97) ʻI he taimi ʻoku maʻu ai ʻa e ngaahi koloa Fakatohitapu he lolotonga ʻo e ako fakafoʻituituí, ʻoku ueʻi ai heni hotau lotó pea fakaivimālohiʻi ʻetau faivelengá. Ko e ʻofa ki he Tokotaha-Tokonaki ʻo e ngaahi moʻoni ko iá pea mo ʻetau holi ke vahevahe atu ʻa e ongoongo leleí ki he niʻihi kehé ʻoku ueʻi ai kitautolu ke fakahīkihikiʻi ʻa e ʻOtuá pea talaki fakahāhā hono huafá. (Hep. 13:15) ʻOku hā mahino, ko hono talaki tōtōivi ʻa e ongoongo leleí ʻoku tapua atu ai ʻetau houngaʻia lahi ki hono mahuʻingá.
3. ʻE lava fēfē ke tākiekina ʻe he laumālie ʻo e ʻOtuá ʻetau ngāue fakafaifekaú?
3 Kole ʻa e Laumālie ʻo e ʻOtuá: Ko ha ngāue fakafaifekau ola lelei ʻoku ʻikai lavaʻi ia ʻi haʻatau mālohi pē ʻotautolu. ʻOku tupu ʻa e faivelenga moʻoní mei he tafe tauʻatāina hifo ʻa e laumālie ʻo e ʻOtuá. (1 Pita 4:11) Ko e ʻunuʻunu ofi ange ki he Matavai ʻo e ‘ivi mālohí’ te ne ʻomai ʻa e mālohi fakalaumālie ke faifakamoʻoni loto-toʻa ai. (Ai. 40:26, 29-31) ʻI he fehangahangai ʻa e ʻapositolo ko Paulá mo e fakafili ʻi heʻene ngāue fakafaifekaú, naʻá ne maʻu ʻa e “tokoni mei he ʻOtua.” (Ng. 26:21, 22) Ko e laumālie māʻoniʻoni fakaivimālohi ʻo Sihová ʻe lava ke ne tokoniʻi kitautolu ke tau hoko ʻo loto-māfana ʻi heʻetau ngāue fakafaifekaú, ko ia ʻoku totonu ke tau kole ia.—Luke 11:9-13.
4. Ko e hā ʻa e ngaahi ola lelei ʻe lava ke fakatupunga ʻe he faivelengá, ka ko e hā kuo pau ke tau tokanga ki aí?
4 Ko e faivelenga mālohi ʻi hono malangaʻi ʻo e Puleʻangá ʻoku faʻa fakatupunga ai ʻa e faivelenga lahi ange ʻi he haʻohaʻonga ʻo e kaungā Kalisitiané. (2 Kol. 9:2) ʻI he feituʻu ngāué, ʻoku ngali tali ange ʻe he niʻihi tāutaha ha pōpoaki ʻoku ʻoatu ʻi he loto-māfana mo e tuipau. Kae kehe, kuo pau ke ʻalu fakataha maʻu pē ʻa e faivelengá mo e fakapotopoto mo e anga-malū. (Tai. 3:2) ʻI he taimi kotoa pē, ʻoku tau feinga ke fakangeingeiaʻi ʻa e tokotaha-ʻapí pea fakaʻapaʻapaʻi ʻene tauʻatāina ke filí.
5. Ko e hā ʻa e ekinaki fakamānavaʻi ʻoku totonu ke tau feinga ke ngāueʻakí?
5 ʻI he tuʻunga ko e kau fanongonongo ʻo e Puleʻangá, ʻofa ke tau hoko maʻu pē ‘ʻi hotau laumalié, ʻo loto mafana.’ Tau fakatupulekina ʻa e faivelengá fakafou ʻi he ako Tohi Tapu fakafoʻituitui pea lotu tōtōivi kia Sihova, ʻa e tokotaha ʻoku lava ke ne ʻomai kia kitautolu ʻa e laumālie māʻoniʻoni mālohí. ʻI he founga ko ení, ʻe lava ke tau fakahoko faivelenga ai ʻetau ngāue fakafaifekaú ʻi he “Laumalie Maʻoniʻoni pea mo e loto taʻetalaʻa.”—1 Tes. 1:5.