“Te Ke Hoko ko ha Tāimuʻa Lelei!”
1. Naʻe anga-fēfē ongoʻi ha tuofefine fekauʻaki mo ʻene ngāue tāimuʻá?
1 “Kuo ʻikai lava ke u maʻu ha toe ngāue kehe kuó ne ʻomai kiate au ʻa e nonga lahi pe lava ke mātuʻaki fakafiemālie fakalaumālie.” Ko e lea ia ʻa Kathe B. Palm. Naʻá ne ngāue ʻi he ngaahi taʻu lahi ʻi he tuʻunga ko ha faifekau tāimuʻa taʻesiokita ʻi he faifakamoʻoni mei he ngataʻanga ʻe taha ʻo Silí, ʻAmelika Tonga, ki he ngataʻanga ʻe tahá. ʻI he fakakaukau atu ki he moʻui fakafiemālie ʻa e faʻahinga ʻi he ngāue taimi-kakató, mahalo pē kuo pehē atu ʻe ha taha kiate koe: “Te ke hoko ko ha tāimuʻa lelei!”
2. Fakamatalaʻi ʻa e ʻuhinga ʻoku maʻu ai ʻa e fiemālie lahi ʻi he ngaahi ngāue fakalaumālié.
2 Ko ha founga moʻui fakafiemālie: Ko hotau Faʻifaʻitakiʻangá, ʻa Sīsū, naʻá ne maʻu ʻa e fakaivifoʻou moʻoni ʻi hono fai ʻa e finangalo ʻa ʻene Tamaí. (Sione 4:34) Ko ia ai, ʻi he loto-moʻoní naʻe akoʻi ʻe Sīsū ki hono kau muimuí ko e fiemālie moʻoní ʻoku tupu ia mei he kau ʻi he ngāue ʻoku felāveʻi mo e lotu kia Sihová. ʻOku tau fiemālie ʻi he taimi ʻoku fakafonuʻaki ai ʻetau moʻuí ʻa e ngaahi ngāue ʻoku maʻu ai ʻa e hōifua ʻa Sihová. ʻIkai ko ia pē, ʻi heʻetau foaki ʻa e taimi lahi ange, ivi mo e koloa ke tokoniʻi ʻa e niʻihi kehé ʻoku lahi ange ai ʻa ʻetau fiefiá.—Ng. 20:31, 35.
3. Ko e hā ʻa e fiefia te tau hokosia nai ʻi hono ngāueʻaki ʻa e taimi lahi ʻi he ngāue fakafaifekaú?
3 Ko e lahi ange ʻa e taimi ʻoku tau ngāueʻaki ʻi he ngāue fakafaifekaú, ko e lahi ange ia ʻa e faingamālie ʻoku tau maʻu ke hokosia ai ʻa e fiefia ʻi hono kamata mo fai ʻa e ngaahi ako Tohi Tapú. Naʻa mo e feituʻu ʻoku hā ngali ʻoku tokolahi ai ʻa e faʻahinga taʻemahuʻingaʻia ʻi he ngaahi ʻapí, te tau ʻiloʻi nai ʻoku ola lelei ange ʻa hotau feituʻu ngāué ʻi he meʻa naʻa tau ʻuluaki fakakaukau ki aí, ʻi heʻetau maʻu ʻa e taukei mo e pōtoʻi ʻi he ngāue fakafaifekaú. ʻE lava ke ngāueʻaki ʻe he kau tāimuʻá ʻa e ako lahi kuo nau maʻu mei he Ako Ngāue Tāimuʻá hili ʻenau tāimuʻa ʻi he taʻu nai ʻe taha. (2 Tim. 2:15) ʻI heʻetau kītakí, te tau hoko nai ai ʻo ola lelei ʻi hono tō ʻa e tenga ʻo e moʻoní ʻa ia ʻe fua ʻi ha taimi ʻamui ange.—Koh. 11:6.
4. Ko e hā ʻoku totonu ke fakakaukau ki ai ʻa e kau talavou kuo mei ʻosi ʻenau akó?
4 Kau Talavou: Lolotonga e fakaʻosiʻosi hoʻo akó, kuó ke fakakaukau fakalelei ki ho kahaʻú? ʻI he aʻu mai ki he taimi ko ení, ko hoʻo taimi-tēpilé ʻoku fakatuʻunga lahi ia ʻi hoʻo ngāue fakaakó. Te ke ngāueʻaki fēfē ho taimí ʻi he hili hoʻo akó? ʻI he ʻikai tuli ki ha ngāue paʻangá, ko e hā ʻoku ʻikai te ke fakakaukau ai fakataha mo e lotu ki he taumuʻa ko e tāimuʻa tuʻumaʻú? Ko e ngaahi pōtoʻi akó—ko e faifakamoʻoni ki he kakai ʻo e puipuituʻa kehekehe, ikuʻi ʻa e fakafaingataʻaʻiaʻanga fakafoʻituituí, fakatupulekina ʻa e akonakiʻi-kitá, mo hono fakatupulekina ʻa e malava fakafaiakó—te ke maʻu ʻaonga ai ʻi he kotoa ʻa hoʻo moʻuí.
5. ʻE lava fēfē ke fakaʻaiʻai ʻe he ngaahi mātuʻá mo e fakatahaʻangá ʻa e tāimuʻá?
5 Ngaahi mātuʻa, ʻoku mou fai hoʻomou tafaʻakí ʻi hono fakahanga hoʻomou fānaú ki he ngāue taimi-kakató? Ko hoʻomou leá mo e faʻifaʻitakiʻanga leleí ʻe lava ke tokoni lahi ia kia kinautolu ke nau fakamuʻomuʻa ʻa e ngaahi meʻa ʻo e Puleʻangá. (Mt. 6:33) Ko Ray, ʻa ia naʻá ne kamata tāimuʻa ʻi heʻene ʻosi mei he kolisí, ʻokú ne manatu: “Naʻe ongoʻi maʻu pē ʻe heʻeku faʻeé ko e tāimuʻá ʻe iku ia ki he founga moʻui mātuʻaki fakafiemālie.” Ko e faʻahinga kotoa ʻi he fakatahaʻangá ʻe lava ke nau fakaʻaiʻai ʻa e ngāue tāimuʻá ʻi heʻenau leá mo ʻenau poupoú. Ko Jose, mei Sipeini, ʻokú ne fakamatala: “Naʻe vakai ʻa ʻeku fakatahaʻangá ki he ngāue tāimuʻá ko e ngāue lelei taha ia ki he fānaú. Ko ʻenau fakamatalá mo ʻenau houngaʻia ki he ngāue tāimuʻá fakataha mo ʻenau tokoni ʻaongá naʻe ʻai ai ke faingofua ange kiate au ke u kamata tāimuʻa.”
6. Ko e hā nai te tau faí kapau ʻikai te tau lolotonga maʻu ʻa e holi ki he tāimuʻá?
6 Ikuʻi ʻa e Fakafaingataʻaʻiaʻangá: Kae fēfē kapau ʻokú ke pehē, ‘ʻoku ʻikai te u maʻu ʻe au ʻa e holi ki he tāimuʻá.’ Kapau ko e anga ia hoʻo ʻuluaki ongoʻí, lotu kia Sihova fekauʻaki mo hoʻo ongoʻí pea tala ange kiate ia, ‘ʻoku ʻikai te u ʻilo pe ʻoku ou taau ke tāimuʻa, ka ʻoku ou loto ke fai ʻa e meʻa ʻoku fakahōifua kiate koé.’ (Sāme 62:8; Pal. 23:26) Pea hanga leva ki heʻene tatakí fakafou ʻi heʻene Folofolá mo ʻene kautahá. Ko e kau tāimuʻa tokolahi kuo nau “kamata” pe ʻahiʻahiʻi ʻa e tāimuʻá ʻi he tuʻunga ko e kau tāimuʻa tokoni, pea ko e fiefia kuo nau hokosiá kuo ueʻi ai kinautolu ke nau tuli ki he ngāue taimi-kakató.—Sāme 34:8.
7. ʻE lava fēfē nai ke tau ikuʻi ʻa e veiveiua pe ʻe lava ke tau aʻusia ʻa e fiemaʻu fakamāhina ko e houa ʻe 70?
7 Fēfē kapau ʻoku ʻikai te ke fakapapauʻi pe ʻe lava ke ke aʻusia ʻa e fiemaʻu fakamāhina ʻo e houa ʻe 70? Ko e hā ʻoku ʻikai ke ke lea ai ki he kau tāimuʻa ʻoku nau maʻu ʻa e ngaahi tuʻunga meimei tatau mo koé? (Pal. 15:22) Tohiʻi leva ha ngaahi taimi-tēpile ʻe ala fakahokó. Te ke ʻiloʻi nai ko hono vaheʻi ʻa e taimi ki he ngāue fakafaifekaú mei he ngaahi ngāue ʻoku ʻikai fiemaʻú ʻoku faingofua ange ia ʻi he meʻa naʻá ke ʻuluaki fakakaukau ki aí.—Ef. 5:15, 16.
8. Ko hā ʻoku totonu ai ke tau fakakaukau ʻi he taimi ki he taimi ki hotau tuʻungá?
8 Vakaiʻi Fakalelei: ʻOku faʻa liliu ʻa e ngaahi tuʻunga fakafoʻituituí. ʻOku lelei ke fakakaukau ʻi he taimi ki he taimi ki ho tuʻungá. Ko e fakatātaá, kuó ke mei mālōlō mei he ngāue paʻangá? Ko Randy, ʻa ia naʻe mālōlō tōmuʻa mei he ngāué, ʻokú ne pehē: “Ko e fili ko ení kuó ne ʻai ke u malava ai ʻo kamata tāimuʻa tuʻumaʻu fakataha mo hoku uaifí, pea kuó ne ʻomai kia kimaua ʻa e faingamālie ke ma hiki ʻo ngāue ʻi he feituʻu ʻoku lahi ange ai ʻa e fiemaʻú. Kuó u maʻu ʻa e tāpuaki taʻefaʻalaua ʻi he fili kuó u faí, ka ko e tāpuaki lahi tahá ko hono maʻu ha konisēnisi lelei.”
9. Ko e hā ʻoku totonu ke fakakaukau ki ai ʻa e ngaahi hoa malí?
9 Kuo ʻiloʻi ʻe he ngaahi hoa mali ʻe niʻihi ʻi he hili ha sivisiviʻi fakalelei ʻoku ʻikai fiemaʻu ke na fakatou ngāue paʻanga taimi-kakato. Ko e moʻoni, ʻe fiemaʻu nai heni ke fakafaingofuaʻi ʻe he fāmilí ʻa ʻenau founga moʻuí, ka ʻoku tuha ia mo e feilaulau ʻoku faí. Ko John, ʻa ia naʻe tukuange ki muí ni ʻe hono uaifí ʻa ʻene ngāue paʻanga taimi-kakató koeʻuhi ke fakalahi ʻa ʻene ngāue fakafaifekaú, ʻokú ne fakamatala: “ʻOku ʻikai ha ongoʻi ʻe toe lelei ange ka ko hono ʻiloʻi ʻoku kau ʻa hoku uaifí ʻi he ngaahi meʻa fakalaumālié ʻi he lolotonga ʻa e ʻahó.”
10. Ko e hā ʻokú ne ueʻi ʻa e kau Kalisitiané ke nau fakakaukau ki he tāimuʻá?
10 Fakahāhā ʻa e ʻOfa mo e Tui: Kuo ʻai ʻe Sihova ʻa e malangá ko e ngāue mahuʻinga taha ia ʻe lava ke fai ʻe ha taha pē ʻo kitautolu. Ko e fokotuʻutuʻu motuʻá ni kuo vavé ni ke fakaʻauha, pea ko e faʻahinga pē ʻoku ui ki he huafa ʻo Sihová ʻe fakamoʻuí. (Loma 10:13) Ko ha loto ʻoku fonu ʻi he ʻofa mo e houngaʻia kiate ia ʻi he meʻa kuó ne fai maʻatautolú ʻe ueʻi ai kitautolu ke talangofua ki he fekau mei hono ʻAló ke malanga faivelengá. (Mt. 28:19, 20; 1 Sione 5:3) ʻIkai ko ia pē, ko hono maʻu ʻa e tui ʻoku tau moʻui moʻoni ʻi he ngaahi ʻaho fakaʻosí ʻe ueʻi ai kitautolu ke tau fai ʻa e meʻa kotoa te tau malavá ʻi he ngāue fakafaifekaú lolotonga ʻoku kei ʻi ai ʻa e taimí, kae ʻikai ke ngāueʻaki ʻa e māmaní ko e meʻa ke ʻosiki.—1 Kol. 7:29-31.
11. ʻOku totonu ke fēfē ʻetau fakakaukaú kapau ʻoku tala mai ʻe ha taha te tau hoko ko ha kau tāimuʻa lelei?
11 Ko e tāimuʻa tuʻumaʻú ʻoku mahulu atu ia ʻi hono tali pe ha fiemaʻu ke fakakakato ha houa, ko ha fakahāhā ia ʻo ʻetau līʻoa ki he ʻOtuá. Ko ia kapau ʻe tala atu ʻe ha taha te ke hoko ko ha tāimuʻa lelei, fakakaukau ki ai ko ha fakaongoongolelei. Pea fai ha fakakaukau fakataha mo e lotu ke kau fakataha mo e faʻahinga ʻoku nau kau ʻi he tafaʻaki fakafiemālie ko eni ʻo e ngāué.
[Fakamatala ʻi he peesi 4]
Ngaahi mātuʻa, ʻoku mou fai hoʻomou tafaʻakí ʻi hono fakahanga hoʻomou fānaú ki he ngāue taimi-kakató?
[Fakamatala ʻi he peesi 5]
Kuo ʻai ʻe Sihova ʻa e malangá ko e ngāue mahuʻinga taha ia ʻe lava ke fai ʻe ha taha pē ʻo kitautolu.