Founga ke Akoʻi Ai ʻa e Faʻahinga Foʻoú ke Malangá
1. Naʻe anga-fēfē hoʻo ongoʻí ʻi he ʻuluaki taimi naʻá ke kau ai ʻi he ngāue fakafaifekaú?
1 ʻOkú ke manatuʻi ʻa e ʻuluaki taimi naʻá ke kau ai ʻi he ngāue fakafaifekau fale-ki-he-falé? Ngalingali, naʻá ke manavasiʻi ʻaupito. Kapau naʻá ke ngāue mo hoʻo faiako Tohi Tapú pe ko ha tokotaha malanga ʻe taha, ʻoku ʻikai ha veiveiua naʻá ke fiefia ke ne tokoniʻi koe. ʻI hoʻo maʻu he taimí ni ʻa e taukei ʻi he tuʻunga ko ha faifekaú, ʻokú ke ʻi ha tuʻunga ai ke tokoniʻi ʻa e faʻahinga foʻou angé ke nau malanga.
2. Ko e hā ʻoku fiemaʻu ke ako ʻe he kau malanga foʻoú?
2 ʻOku fiemaʻu ke ako ʻa e kau malanga foʻoú ki he founga ke kamata ai ha fetalanoaʻaki mo e tokotaha-ʻapí, ngāueʻaki ʻa e Tohi Tapú ʻi he matapaá, fai ha ngaahi toe ʻaʻahi, pea kamata mo fai ha ngaahi ako Tohi Tapu. ʻOku totonu foki ke nau ako ki he founga ke kau ai ʻi he tafaʻaki kehekehe ʻo e malangá, hangē ko e faifakamoʻoni ʻi he halá mo e ʻaʻahi ki he kakai ʻi he feituʻu pisinisí. ʻE lava ke ke tokoniʻi kinautolu ke nau fakalakalaka ʻi he ngaahi tafaʻaki ko ení fakatouʻosi ʻi hoʻo faʻifaʻitakiʻangá pea ʻi hoʻo ngaahi fokotuʻú.
3. ʻE fēfē nai haʻatau tokoniʻi ʻa e niʻihi kehé ʻaki ʻetau faʻifaʻitakiʻangá?
3 Faiako ʻAki ʻa e Faʻifaʻitakiʻanga: Naʻe fakahāhaaʻi ʻe Sīsū ki heʻene kau ākongá ʻa e founga ke fai ai ʻa e malangá. (Luke 8:1; 1 Pita 2:21) ʻI he taimi ʻokú ke fokotuʻutuʻu ai ke ngāue mo ha tokotaha malanga foʻou angé, teuteuʻi ha tuʻuaki faingofua ʻe lava ke faʻifaʻitaki ki ai ʻa e tokotaha malangá, ʻi hono ngāueʻaki nai ha founga ʻoku maʻu ʻi he taha ʻo ʻetau ʻū tohí. Pea fakahaaʻi ange leva te ke lea ʻi he ʻuluaki matapaá pe ko e matapā hono uá koeʻuhi ke lava ai ʻo fanongo ʻa e tokotaha malangá ki he meʻa ʻokú ke leaʻakí. ʻI he vahaʻa ʻo e ngaahi matapaá, te ke kole nai ai ki he tokotaha malangá ke ne fai angé haʻane fakamatala pe naʻe ola lelei ʻa hoʻo tuʻuakí. ʻE tokoniʻi ai heni ia ke ne sio ki he mahuʻinga ʻo e ngāue mo e niʻihi kehé ʻi he ngāue fakafaifekaú pea ʻe ʻai ai ke faingofua kiate ia ke ne tali ha fokotuʻu pē te ke fai hili ʻene fai ʻene tuʻuakí.
4. Te tau tokoniʻi fēfē nai ha tokotaha malanga foʻou hili ʻa e fanongo ki heʻene tuʻuakí?
4 Fai ha Fokotuʻu: Naʻe toe ʻoange ʻe Sīsū ki heʻene kau ākongá ʻa e fakahinohino ki he founga ʻo e malangá. (Mt. 10:5-14) ʻE lava ke ke tokoniʻi ha tokotaha malanga foʻou ʻi ha founga meimei tatau. ʻI hono taimi ke leá, fanongo lelei. Pea ʻi he taimi te mo mavahe ai mei he matapaá, fai loto-lelei ha fakaongoongolelei papau mo loto-moʻoni, neongo kapau te ke sio ki ha ngaahi tafaʻaki ʻo ʻene tuʻuakí ʻe fiemaʻu ke fakaleleiʻi. Ki muʻa ke fai ha fokotuʻú, te ke fili nai ke vakaiʻi pe te ne toe fai ʻa e fehālaaki tatau ʻi he matapā hono hokó. Mahalo naʻá ne manavasiʻi pē. Manatuʻi foki ʻoku ʻikai ke maʻu ʻe he kau malangá kotoa ʻa e malava tatau, pea ʻoku faʻa lahi ange ʻi he founga totonu pē ʻe taha ʻa e founga ke fai ai ha meʻa.—1 Kol. 12:4-7.
5. Ko e hā ʻe lava ke tau leaʻaki ʻi he tamuʻomuʻa ke fai ha fokotuʻú?
5 ʻI he taimi ʻe niʻihi ʻe kole atu nai ʻe ha tokotaha malanga foʻou ki haʻo fokotuʻu. Ka ʻo kapau heʻikai, tamuʻomuʻa ke tokoniʻi ia. ʻE lava fēfē ke fai eni ʻi he tuʻunga fakapotopoto? Ko e kau malanga taukei ʻe niʻihi ʻoku nau ʻeke pē, “ʻE lava ke u fai atu ha fokotuʻu?” pe, “ʻOkú ke fakakaukau naʻe fēfē ʻa e meʻa ko iá?” Ko e toe meʻa ʻe taha ke leaʻakí, “ʻI he taimi naʻá ku hoko ai ko ha tokotaha malanga foʻoú, naʻá ku ʻiloʻi ai ko ha meʻa faingataʻa ia ke . . . , ka naʻá ku ʻiloʻi naʻe tokoni eni. . . .” ʻI he taimi ʻe niʻihi ʻe ʻaonga ai ke sio fakataha ki he tohi Reasoning. Koeʻuhi ke ʻoua te ke lōmekina ia, fai ha fokotuʻu ki he tafaʻaki pē ʻe taha ʻo ʻene tuʻuakí.
6. ʻI he fekauʻaki mo e ngāue fakafaifekaú, ʻoku anga-fēfē hono ‘fakamajila e he ukamea ae ukameá’?
6 Fakamāsila ʻa e Ukamea ʻAki ʻa e Ukamea: Ko Tīmoté, ko ha ʻevangeliō taukei, naʻe fakalototoʻaʻi ia ʻe Paula ke hokohoko atu ʻene nofo ki he faiakó pea fai ha laka ki muʻa. (1 Tim. 4:13, 15) Neongo kuo laui taʻu nai mei he ʻuluaki taimi ʻo hoʻo ngāue fakafaifekaú, ʻoku ʻikai ʻaupito totonu ke tuku hoʻo feinga ke fakaleleiʻi ʻa hoʻo pōtoʻí. Ako mei he kau malanga naʻá ke malanga mo iá, naʻa mo e faʻahinga ʻoku siʻi ange ʻenau taukei ʻi he ngāue fakafaifekaú, pea tokanga ke tokoniʻi ʻi he anga-ʻofa ʻa e niʻihi kehé, tautefito ki he faʻahinga foʻou angé, ke nau hoko ko e kau faifekau pōtoʻi ʻo e ongoongo leleí.—Pal. 27:17, PM.