Ngāueʻaki Ia ʻi he Taimi Kotoa Pē
1. Ko e tuleki Fieʻilo ki he Moʻoní ʻoku ʻaonga ki hono fai ʻa e hā?
1 Ko e tuleki Te Ke Fieʻilo ki he Moʻoní? kuo fakataumuʻa ia ke tokoniʻi kitautolu ke kamata ha ngaahi ako Tohi Tapu. Ka ko ha toe meʻangāue ola lelei ia ʻe lava ke tau ngāueʻaki ki hono fakamovete ʻa e tenga ʻo e moʻoní. (Koh. 11:6) Ko e niʻihi eni ʻo e ngaahi fokotuʻu ke tokoni kia kitautolu ke tau ngāueleleiʻaki iá.
2. ʻE lava fēfē ke tau ngāueʻaki ʻa e tulekí ke kamata ha fetalanoaʻaki?
2 Ke Kamata ha Fetalanoaʻaki: Te ke ʻoange nai ʻa e tulekí ki he tokotaha-ʻapí, tuhu ki he ngaahi fehuʻi ʻe ono ʻi he takafí, pea ʻeke ange: “Ko fē ʻi he ngaahi fehuʻi ko ení kuó ke fifili fekauʻaki mo iá?” Hili hono maʻu ʻene talí, lāulea mei he tulekí ki he tali ʻa e Tohi Tapú ki ha taha ʻo e ngaahi fehuʻi ʻa e tokotaha-ʻapí pea lau ʻa e taha ʻo e potutohi ʻoku fakahāʻí. Lau pe fakamatala fakanounouʻi ʻa e peesi ʻi muí, pea tuʻuaki ʻa e tohi Akoʻi ʻe he Tohi Tapú. Neongo kapau heʻikai te ne tali ʻa e tohí, kuó ne ʻosi maʻu ʻa e tulekí, ʻa ia te ne fakamafeia nai ʻa e moʻoní ke faiaka ʻi hono lotó.—Mt. 13:23.
3. Kapau ʻoku femoʻuekina ha tokotaha-ʻapi, ko e hā nai te tau faí?
3 Kapau ʻOku Femoʻuekina ʻa e Tokotaha-ʻApí: Te ke pehē nai: “Koeʻuhí ʻoku ʻikai ko ha taimi feʻungamālie eni, te u tuku atu ʻa e tuleki ko ení. ʻOku lisi ai ʻa e ngaahi fehuʻi tefito ʻe ono kuo faʻa ʻeke ʻe he tokolahi taha ʻo kitautolu pea ʻoatu ai mo e tali fakahangatonu ki he fehuʻi taki taha mei he Tohi Tapú. ʻI he taimi te ta toe fetaulaki aí, tala mai pe ko e hā hoʻo fakakaukaú.”
4. Ko e hā ʻe lava ke tau leaʻaki ʻi he taimi ʻoku tau tuʻuaki ai ʻa e tulekí ʻi he ngāue he halá?
4 ʻI Hono Fai ʻa e Ngāue he Halá: ʻE lava ke ke pehē: “Mālō e lelei. Kuó ke ʻeke nai ha taha ʻo e ngaahi fehuʻi ko ení? [Tuku ke ne tali.] ʻOku fakahaaʻi heni ʻa e ngaahi tali māʻalaʻala mo fakafiemālie ʻoku maʻu ʻi he tohi Tapú.” Kapau ʻoku ʻikai fakavavevave ʻa e tokotahá, ʻe lava nai ke ke fetalanoaʻaki ʻi ha taha ʻo e ngaahi tali mei he tulekí pea naʻa mo hano tuʻuaki ʻa e tohi Akoʻi ʻe he Tohi Tapú.
5. ʻE anga-fēfē nai haʻatau ngāueʻaki mei he taimi ki he taimi ʻa e tulekí ʻi he ngaahi ʻapi ʻikai ha tahá?
5 Ngaahi ʻApi ʻOku ʻIkai ʻi ai ha Tahá: ʻI he ngaahi feituʻu ngāue ʻe niʻihi, ko e kau malangá ʻoku nau faʻa tuku ʻa e tohí ʻo ʻikai fakaʻasi ki tuʻa ʻi he ngaahi ʻapi ʻikai ha tahá. Kapau ko e founga ia ʻoku angaʻaki ʻi hoʻomou fakatahaʻangá, ko e hā ʻoku ʻikai ke mou tuku ai ʻa e tuleki Fieʻilo ki he Moʻoní mei he taimi ki he taimi? ʻI he taimi te ke foki aí ʻe lava ke ke pehē: “ʻI he taimi naʻa mau ʻi heni ai ki muʻá, naʻe ʻikai te ke ʻi ʻapí ni, ko ia naʻa mau tuku ai ʻa e tulekí ni ʻi ho matapā. Ko fē ʻi he ngaahi fehuʻí ni te ke loto ke talí?”
6. Ko e hā ʻokú ne ʻai ʻa e tuleki Fieʻilo ki he Moʻoní ko ha meʻangāue fakamalanga ola leleí?
6 Ko e tuleki Fieʻilo ki he Moʻoní ʻokú ne ʻomai ʻa e moʻoní ʻi ha founga faingofua pea fakahangatonu. ʻOku fakamānako ia ki he faʻahinga ʻi he ngaahi lotu mo e anga-fakafonua kotoa pē. ʻOku faingofua ke tuʻuaki, naʻa mo e fānaú mo e kau malanga foʻoú ʻe lava ke nau tuku ia. ʻOkú ke ngāueʻaki ia ʻi he taimi feʻungamālie kotoa pē?