ʻOkú Ke ʻIlo Hoʻo Ngaahi Fili ke Faí?
Ko e tafa taʻekau ai ha totó ʻoku fakahoko ia ʻi he ngaahi senitā fakafaitoʻo lahi fakautuutu takatakai ʻi he māmaní. ʻOkú ke lāuʻilo kakato ki he ngaahi fili ke fai ʻa ia ʻoku ala maʻu ʻi he malaʻe fakafaitoʻo taʻekau ai ha totó? ʻOku fiemaʻu ke ke ʻilo ia koeʻuhi ke ke lava ʻo fai ha ngaahi fili makatuʻunga ʻi he ʻilo ʻo fekauʻaki mo ha faitoʻo ke fai pea mo ha tafa. Sio ʻi he vitiō No Blood—Medicine Meets the Challenge. Hili iá, fakamanatu fakafou ʻi he lotu ʻa e meʻa kuó ke akó fakataha mo e tokoni ʻa e ngaahi fehuʻi ʻoku fokotuʻu mai ʻi laló.—Fakatokanga: Koeʻuhi ʻoku kau ʻi he vitioó ʻa e ngaahi konga nounou fakaetafa, ʻoku totonu ke ngāueʻaki ʻa e fakapotopotó ʻe he ngaahi mātuʻá ʻi he sio mo e fānau īkí he foʻi vitioó.
(1) Ko e hā ʻa e ʻuhinga tefito ʻoku fakafisi ai ʻa e Kau Fakamoʻoni ʻa Sihová mei he huhu totó? (2) ʻI heʻene haʻu ko ia ki he tokangaʻi fakafaitoʻó, ko e hā ʻoku fiemaʻu ʻe he Kau Fakamoʻoni ʻa Sihová? (3) Ko e hā ʻa e totonu tefito ʻoku maʻu ʻe he kau mahakí? (4) Ko e hā ʻoku fakapotopoto ai mo totonu ke fili ʻa e ngaahi faitoʻo fetongi ʻo e huhu totó? (5) ʻI he taimi ʻoku mole lahi ai ʻa e totó, ko e hā ʻa e ongo ngāue fakavavevave muʻomuʻa ke fai ʻe he kau toketaá? (6) Ko e hā ʻa e founga faitoʻo tefito ʻe fā ʻoku fetongi ʻaki ʻa e huhu totó? (7) ʻE anga-fēfē nai ʻa hono hanga ʻe he kau toketaá ʻo (a) fakasiʻisiʻi e mole ʻa e totó, (e) fakahaofi ʻa e ngaahi sela toto kulokulá, (f) fakakakeʻi hono faʻu ʻo e totó pea (h) fakafoki ʻa e toto ne molé? (8) Fakamatalaʻi ʻa e ongo founga ʻoku ʻiloa ko e (a) fakamanifi ʻo e totó (hemodilution) mo e (e) fakahaofi e sela ʻo e totó (cell salvage). (9) Ko e hā ʻoku totonu ke ke fieʻilo ki ai fekauʻaki mo ha faʻahinga faitoʻo fetongi pē ʻo e huhu totó? (10) ʻE lava ke fai ha ngaahi tafa lahi mo fihi ʻo taʻekau ai hono ngāueʻaki ʻo e huhu totó? (11) Ko e hā ʻa e fakalakalaka lelei ʻoku fakahoko ʻi loto ʻi he tafaʻaki fakafaitoʻó?
Ko hono tali ha niʻihi ʻo e ngaahi faitoʻo ʻoku fakaeʻa ʻi he foʻi vitioó ko ha fili fakafoʻituitui ia ʻo fakatatau ki he konisēnisi ʻo e toko taha taki taha kuo akoʻi ʻe he Tohi Tapú. Kuó ke fai ha fili mahino pe ko fē ʻa e ngaahi faitoʻo mo e ngaahi founga fakafalemahaki ʻokú ke loto-lelei ke tali maʻau mo hoʻo fānaú pea fakafonu leva ha kaati HCD? Ki ha fetalanoaʻaki kakato ki he ngaahi meʻá ni, vakaiʻi fakalelei ʻa e “Ngaahi Fehuʻi mei he Kau Lautohí” ʻi he ʻīsiu ʻo e Taua Leʻo ʻo Sune 15, 2004 mo ʻOkatopa 15, 2000. Pea ngāueʻaki leva ʻa e foomu ngāue ʻi he fakalahi ʻo ʻEtau Ngāue Fakafaifekau ʻo e Puleʻanga ʻo Nōvema 2006, “Ko e Hā ʻEku Fili ʻo Kau ki he Fanga Kiʻi Konga Iiki ʻo e Totó mo e Founga Fakafaitoʻo ʻOku Fekauʻaki mo Hoku Totó Tonu?,” ke fai ai hoʻo ngaahi fili fakafoʻituitui fekauʻaki mo e ngaahi faitoʻo te ke talí pe ʻikai talí. Fakaʻosí, fakapapauʻi ʻokú ke hiki totonu hoʻo ngaahi filí ki hoʻo kaati HCD. ʻOku totonu ke fakahā mahino hoʻo ngaahi filí ki he ngaahi kautaha tokangaʻi e moʻuí kuó ke filí pea ki ha mēmipa pē ʻi he fāmilí ʻoku ʻikai ko ha Fakamoʻoní.