“Fai ha Fakamoʻoni Fakaʻāuliliki” Fekauʻaki mo e Puleʻanga ʻo e ʻOtuá
1. Ko e hā ʻoku tau lāulea ai ki he tohi Fai ha Fakamoʻoni ʻi he Ako Tohi Tapu ʻa e Fakatahaʻangá?
1 Kuo tau ʻosi kamata lāulea ʻi he “Fai ha Fakamoʻoni Fakaʻāuliliki” Fekauʻaki mo e Puleʻanga ʻo e ʻOtuá ʻi he Ako Tohi Tapu ʻa e Fakatahaʻangá. Ko e tohi ko ení ʻoku fakamatalaʻi ai ʻa e tohi ʻa Ngāué ʻi ha founga ʻe lava ke fakahaaʻi ai ki he tokotaha lautohí ʻa e fakaofo ʻo e fakatātā maeʻeeʻa ʻo e meʻa naʻe hoko aí. ʻI he ʻikai fakamatalaʻi fakafoʻi vēsí, ʻoku ʻomai ʻi he tohi Fai ha Fakamoʻoni ha ngaahi lēsoni mei he ngaahi fakamatala ʻi he tohi ʻa Ngāué pea tokoniʻi kitautolu ke tau ʻiloʻi ʻa e founga ʻe lava ke tau ngāueʻaki fakafoʻituitui ai iá.—Loma 15:4.
2. Fakamatala ki ha niʻihi ʻo e ngaahi tafaʻaki ʻo e tohi Fai ha Fakamoʻoni.
2 Ngaahi Tafaʻaki ʻo e Tohí: Ko e talateu ʻi he peesi 2 ko ha tohi fakalotomāfana ia mei he Kulupu Pulé ʻoku fakamatalaʻi ai ʻa e anga ʻo ʻenau loto ke tau maʻu ʻaonga mei he tohi ko ení. ʻI he kamataʻanga ʻo e vahe 2, ʻoku ʻi ai ha kiʻi fakamatala ʻokú ne tala mai ʻa e poini tefito ʻo e vahe taki taha pea mo ha konga Tohi Tapu ʻa ia ʻokú ne fakahaaʻi mai ʻa e konga ʻi he tohi ʻa Ngāué ʻa ia ʻe fai ki ai ʻa e lāuleá. Ko e ngaahi vahe lahi ʻoku ʻi loto ai ʻa e ngaahi puha ʻokú ne ʻomai ha ngaahi fakaikiiki lahi ange fekauʻaki mo e puipuituʻa ʻo e kakaí, ngaahi feituʻú pe ngaahi meʻa naʻe hokó. Ko e konga ʻoku ʻatā ʻi he tafaʻakí ʻoku fakaʻatā ai kitautolu ke hiki ha nouti. ʻI he kotoa ʻo e tohí ʻoku ʻi ai ʻa e ngaahi fakatātā fakaikiiki mahuʻinga ʻo e ngaahi meʻa Fakatohitapu ke tokoniʻi ai kitautolu ke tau sioloto ki he ngaahi meʻa mahuʻinga naʻe hokó pea ʻi he peesi fakaʻosí ʻoku ʻi ai ha ʻiniteki fakatātā ke fakamatalaʻi ʻaki ʻa e ngaahi fakatātā kehé. ʻI loto ʻi he ongo takafí ʻoku ʻi ai ʻa e mape ke tokoniʻi kitautolu ke tau muimuiʻi ʻa e anga ʻo e fakalakalaka ʻa e kaungālotu ʻi he ʻuluaki senitulí ʻi heʻenau kamata ke fakamafola ʻa e ongoongo leleí “ʻo aʻu ki he ngataʻanga ʻo māmani.”—Ngāue 1:8.
3. Ko e hā ʻa e ngaahi fehuʻi mahuʻinga ʻe tali ʻi heʻetau ako ʻa e tohi ʻa Ngāué?
3 Tali ʻo e Ngaahi Fehuʻi Mahuʻingá: ʻI he lāulea ki he tohi ʻa Ngāué ʻe tokoniʻi ai kitautolu ke tau ʻiloʻi lelei ʻa e ngaahi tali ki he ngaahi fehuʻi mahuʻinga fekauʻaki mo e ngāue fakafaifekau faka-Kalisitiané. Ko e fakatātaá, ko e hā ʻa e ngāue mo e pōpoaki ʻokú ne fakaʻilongaʻi ʻa e kau muimui moʻoni ʻo Sīsū Kalaisí? Ko hai ʻokú ne tataki ʻa e ngāue fakamalanga ʻi māmani lahí pea ʻoku anga-fēfē? Ko e hā ʻa e ngaahi faingamālie ki he kau malangá ʻi he hoko ʻa e fakatangá mo e fakafepakí? Ko e hā ʻa e ngafa ʻo e laumālie māʻoniʻoní ʻi heʻetau ngāue fakafaifekaú?
4. ʻE anga-fēfē nai ʻetau maʻu ʻa e ʻaonga kakato mei heʻetau lāulea ʻi he tohi ko ení?
4 Ke maʻu ʻa e ʻaonga kakató, ako ʻa e fakamatalá ki muʻa mo teuteu ke kau ʻi he fetalanoaʻaki ʻa e fakatahaʻangá. Maʻu ʻa e fakataha taki taha, fakakaukau ki he founga ʻe lava ke ke ngāueʻaki ai ʻa e lēsoni ʻoku akó ʻi hoʻo ngāue fakafaifekau fakafoʻituituí. ʻOfa ke hoko ʻetau lāulea ki he tohi fakalotomāfana ko ení ke ne ueʻi kitautolu ke Fai ha Fakamoʻoni Fakaʻāuliliki fekauʻaki mo e Puleʻanga ʻo e ʻOtuá!—Ngāue 28:23.