Faifakamoʻoni he Halá ʻa Ia ʻOku Ola Leleí

1. Ko e hā e founga ʻe taha ʻe lava ke tau faʻifaʻitaki ai kia Sīsuú?

¹ Lolotonga ʻene ngāue fakafaifekau he māmaní, naʻe ʻikai ke toumoua ʻa Sīsū ke lea ki he kakai naʻá ne fetaulaki mo ia ʻi he halá pea ʻi he ngaahi feituʻu kakai kehé. (Luke 9:57-61; Sione 4:7) Naʻá ne loto ke vahevahe ʻene pōpoaki mahuʻingá ki he tokolahi taha ʻo e kakai ʻe ala lavá. ʻI he ʻahó ni, ko e faifakamoʻoni he halá ko ha founga lelei lahi ia ke tokoniʻi ai e kakaí ke maʻu ʻa e poto fakaʻotuá. (Pal. 1:20) ʻE fakalahi ai ʻetau lavameʻá kapau te tau tamuʻomuʻa pea ngāueʻaki e ʻiloʻiló.

2. ʻOku fēfē ʻa e kaunga ʻa e tamuʻomuʻá ʻi hono fai ʻa e ngāue he halá?

² Tamuʻomuʻa: ʻOku meimei lelei ange ke fakaofiofi ki he faʻahinga tāutahá kae ʻikai ko e tuʻu pe taʻutu ʻi ha feituʻu pē taha ʻo tatali ki he faʻahinga ʻoku fakalaka haké ke nau fakaofiofi atu kia koe. Malimali, fetuʻutaki ʻi he sio, pea fai ia ʻi ha founga nonga mo anga-fakakaumeʻa. Kapau ʻokú ke ngāue fakataha mo e kau malanga kehé, ʻoku faʻa lelei tahá ke fakaofiofi makehekehe ki he kakaí. Ko e tamuʻomuʻá ʻoku toe fiemaʻu ia ke toe foki ki he kau mahuʻingaʻia naʻá ke maʻú. Kapau ʻoku feʻungamālie, ʻi he fakaʻosinga ʻo e fetalanoaʻakí, ʻeke fakalelei ange pe ʻe fēfē nai haʻo toe fetuʻutaki mo e tokotahá. Ko e kau malanga ʻe niʻihi ʻoku nau fai tuʻumaʻu ʻa e ngāue he halá ʻi he feituʻu tatau, ʻo fakamafeia ai kinautolu ke toutou lea ki he kakai tatau mo fakalahi ʻenau mahuʻingaʻiá.

3. ʻE fēfē nai ʻetau ngāueʻaki ʻa e ʻiloʻiló ʻi heʻetau fai ʻa e faifakamoʻoni he halá?

³ Ngāueʻaki ʻa e ʻIloʻiló: Ngāueʻaki e fakafuofua leleí ʻi hono fili ʻa e feituʻu ke tuʻu ai he halá pea ko hai ke fakaofiofi ki aí. ʻOku ʻikai fiemaʻu ia ke faifakamoʻoni ki he tokotaha kotoa pē ʻoku fakalaka haké. Hoko ʻo fakatokanga meʻa. Ko e fakatātaá, kapau ko e tokotahá ʻoku fakavave, ʻe lelei nai ke tuku ia ke fakalaka hake. ʻI he taimi ʻoku faifakamoʻoni ai ʻi muʻa ʻi ha feituʻu pisinisi, hoko ʻo fakapotopoto koeʻuhí ke kalofi hano fakatupunga ha hohaʻa tōtuʻa ki he pulé. ʻOku faʻa lelei ange ke faifakamoʻoni ki he kakaí ʻi heʻenau mavahe mei he pisinisí kae ʻikai ko ʻenau hū ki aí. Fakaofiofi ki he kakaí ʻi ha founga ʻe ʻikai ke fakamanavaheeʻi pe fakaʻohovaleʻi ai kinautolu. Pehē foki, ʻiloʻilo he taimi ʻoku tuʻuaki ai ʻa e ʻū tohí. Kapau ʻoku ʻikai loko fakahaaʻi ʻe he tokotahá ha mahuʻingaʻia, te ke tuʻuaki nai ha tuleki kae ʻikai ko e makasiní.

4. Ko e hā ʻoku hoko ai ʻa e faifakamoʻoni he halá ko e founga ʻaonga mo fakafiefia ia ʻo e faifakamoʻoní?

⁴ Ko e faifakamoʻoni he halá ʻokú ne fakamafeia kitautolu ke fakamovete ʻa e ngaahi tenga ʻo e moʻoní ʻi ha vahaʻa taimi nounou. (Koh. 11:6) Ko e kakai ʻe niʻihi ʻoku tau fetaulaki mo iá ko e niʻihi nai ia ʻoku ʻikai lava ke tau maʻu ʻi ʻapi he taimi ʻoku tau ngāue ai fale ki he falé. Ko e hā ʻoku ʻikai fai ai ha ngaahi fokotuʻutuʻu ke kau ʻi he faifakamoʻoni he halá, ko ha founga fakafiefia mo ola lelei ia ʻo e ngāue fakamalangá?