Hoko ʻo “Manavaʻofa”
1. Ko e hā ʻoku fiemaʻu vavale ʻe he kakai ʻo e ʻaho ní?
1 Kuo teʻeki ʻaupito ha taimi ki muʻa ʻi he hisitōliá ʻe fuʻu lahi fau ai ʻa e kakai ʻoku nau fiemaʻu vavale ha tokoni manavaʻofa. Ko e hoholo kovi ʻa e ngaahi tuʻunga ʻo e māmaní kuo iku ʻo mafolalahia ai ʻa e ngaahi ongoʻi ʻikai fiefia, loto-mafasia, mo ʻikai ha ʻamanaki. ʻOku fiemaʻu ʻe he laui miliona ʻa e tokoni, pea ko kitautolu ʻi he tuʻunga ko e kau Kalisitiané ʻoku tau ʻi ha tuʻunga ke fakahāhā ʻa e tokanga moʻoni ki hotau ngaahi kaungāʻapí. (Mt. 22:39; Kal. 6:10) ʻE lava fēfē ke fakahā ʻa e tokanga peheé?
2. Ko e hā ʻa e founga lelei taha kia kitautolu ke fakahāhā ai ʻa e manavaʻofá?
2 Ko ha Ngāue ʻo e Manavaʻofá: ʻOku ʻikai ha fakafiemālie moʻoni mo tuʻuloa ʻe taʻetupu mei he ʻOtuá. (2 Kol. 1:3, 4) ʻOku ekinaki mai ʻa Sihova kia kitautolu ke faʻifaʻitaki kiate ia ʻaki ʻa e hoko ʻo “manavaʻofa” pea kuó ne ʻomai kia kitautolu ʻa e fekau ke ʻaʻahi ki hotau ngaahi kaungāʻapí mo e ongoongo lelei ʻo e Puleʻangá. (1 Pita 3:8) Ko e kau longomoʻui ʻi he ngāue ko ení ʻa e founga lelei taha kia kitautolu ke fakafiemālieʻi ʻa e “loto mafesi,” koeʻuhí ko e Puleʻanga pē ʻo e ʻOtuá ʻa e ʻamanakiʻanga moʻoni ki he faʻahinga faingataʻaʻia ʻo e tangatá. (Ai. 61:1) Koeʻuhi ko ʻene manavaʻofa ki hono kakaí, ʻe vavé ni ke fakamaʻa atu ʻe Sihova ʻa e fulikivanú pea fokotuʻu ha māmani foʻou māʻoniʻoní.—2 Pita 3:13.
3. ʻE fēfē nai haʻatau vakai ki he kakaí ʻo hangē ko ia naʻe fai ʻe Sīsuú?
3 Vakai ki he Kakaí Hangē ko Ia Naʻe Fai ʻe Sīsuú: Naʻa mo ʻene malanga ki he ngaahi fuʻu kakai tokolahí, naʻe sio ʻa Sīsū ki he meʻa lahi ange ia ʻo ʻikai ki ha fuʻu kakai lahí pē. Naʻá ne sio ki he faʻahinga tāutaha ʻoku ʻi ai ʻenau fiemaʻu fakalaumālie. Naʻa nau hangē ha fanga sipi ʻoku ʻikai hanau tauhi ke tataki kinautolu. Naʻe maongo ki he loto ʻo Sīsuú ʻa e meʻa naʻá ne sio ki aí, pea naʻe ueʻi ia ke ne akoʻi kinautolu ʻi he anga-kātaki. (Mk. 6:34) Ko ʻetau vakai ki he kakaí ʻi he founga tatau mo ia naʻe fai ʻe Sīsuú ʻe fakaʻaiʻai ai kitautolu ke fakahāhā ʻa e manavaʻofa moʻoni kia kinautolu ʻi honau tuʻunga tāutahá. ʻE hā mahino eni ʻi he tō hotau leʻó mo e fōtunga hotau matá. ʻE hoko ʻa e malangá ko ʻetau meʻa muʻomuʻá ia, pea te tau feʻunuʻaki ʻetau ngaahi leá ke feʻungamālie mo e ngaahi meʻa ʻoku hohaʻa ki ai ʻa e tokotaha taki taha.—1 Kol. 9:19-23.
4. Ko e hā ʻoku totonu ai ke tau kofuʻaki ʻa e manavaʻofá?
4 Ko ha fuʻu kakai tokolahi mei he puleʻanga kotoa pē ʻoku nau tali lelei ʻa e pōpoaki ʻo e Puleʻangá mo e mahuʻingaʻia foʻou ʻoku hā ʻia kinautolú. ʻI heʻetau hokohoko atu ke ʻai pe kofuʻaki ʻa e manavaʻofá, te tau fakalāngilangiʻi mo fakahōifuaʻi ai hotau ʻOtua manavaʻofá, ʻa Sihova.—Kol. 3:12, PM.