ʻOku Mateuteu Hoʻo Fānaú?
1. Ko e hā ʻoku ʻi ai ai ha fiemaʻu ki he fānau akó ke nau mateuteú?
1 ʻI he kamata ʻa e teemi fakaako foʻou taki taha, ʻoku ʻikai ha veiveiua ʻe hokosia ʻe hoʻo fānaú ʻa e ngaahi pole mo e ngaahi tenge foʻou. Te nau toe maʻu foki mo e ngaahi faingamālie foʻou ke “fakahāʻi ʻa e moʻoni.” (Sione 18:37) ʻOku nau mateuteu?
2. Koeʻuhi ke hoko ʻo mateuteú, ko e hā ʻoku totonu ke ʻilo ʻe hoʻo fānaú?
2 ʻOku mahinoʻi māʻalaʻala ʻe hoʻo fānaú ko e hā ʻoku lau ko e kau ia ʻi ha ngaahi kātoanga fakafonua mo e ngaahi ʻaho mālōlō fakapanganí mo e ʻuhinga ʻoku hala ai ke kau ki aí? ʻOku nau mateuteu ki he tenge te nau maʻu ke tuli ki he ako māʻolunga angé, faialeá, mo hono ngāueʻaki ʻa e ʻolokaholó pe faitoʻo kona tapú? Te nau fakamatala pē ko ha ngāue ʻikai lelei ia ʻoku fepaki mo ʻenau lotú, pe ʻoku nau ʻilo ʻa e founga ke fakamatalaʻi ai ʻenau ngaahi tuí?—1 Pita 3:15, Ko e Taulua.
3. ʻE anga-fēfē nai hano ngāueʻaki ʻe he ngaahi mātuʻá ʻenau efiafi Lotu Fakafāmilí ke teuteuʻi ai ʻenau fānaú?
3 Ngāueʻaki ʻa e Efiafi Lotu Fakafāmilí: Ko e moʻoni, ʻoku ngalingali ʻe ʻi ai ʻa e ngaahi fetalanoaʻaki ʻi he kotoa ʻo e taʻu fakaakó ʻi he malanga hake ha fiemaʻu. Ko hoʻo fai ha feinga makehe ke lāulea ki he ngaahi meʻa felāveʻi mo e akó ki muʻa ke kamata ha teemi foʻoú, ha taʻu fakaako foʻoú pe ko ha ʻapiako foʻoú, ʻe ʻoange ai ki hoʻo fānaú ʻa e loto-maʻu. Ko e hā ʻoku ʻikai ke ngāueʻaki ai ha efiafi Lotu Fakafāmili ʻe taha pe lahi ange ki he meʻá ni? Te ke ʻeke nai ki hoʻo fānaú ko e hā e meʻa ʻokú ne fakatupunga ʻa e hohaʻa lahi taha kia kinautolu ʻi heʻenau fakakaukau atu ki he ʻalu ki he akó. Ko e ngaahi meʻa naʻa mou lāulea ki ai ʻi he ngaahi taʻu ki muʻá ʻe lava ke fakamanatu he ko eni kuo lalahi ʻa e fānaú pea kuo tupulaki ʻenau mahinó. (Sāme 119:95) Te ke lava ʻo fakakau ai ha ngaahi taimi ʻahiʻahi ʻa ia te ke ʻai ko e ko ha faiako, tokotaha faleʻi, pe kaungāako. Akoʻi hoʻo fānaú ki he founga ʻo e tali mei he Tohi Tapú pea ke ngāueʻaki ʻa e ngaahi meʻangāue hangē ko e tohi Reasoning mo e tohi ʻEke ʻe he Toʻutupú. Naʻe ngāueʻaki ʻe ha mātuʻa ʻe taha ʻa e ngaahi taimi ʻahiʻahí ke teuteuʻi ai ʻene fānaú ke fakalea ki heʻenau kau faiako foʻoú ʻi he kamata ʻa e taʻu fakaako taki taha mo fakahā ange ko e Kau Fakamoʻoni ʻa Sihova kinautolu.—Sio ki he Taua Leʻo ʻo Tīsema 15, 2010, peesi 3-5.
4. Ko e hā ʻe fai ʻe he ngaahi mātuʻa fakapotopotó?
4 Ko e ngaahi pole kuo pau ke fehangahangai mo e toʻutupu Kalisitiané lolotonga ʻa e ngaahi ʻaho fakaʻosí ʻoku fakautuutu ʻene “faingataʻa.” (2 Tim. 3:1) Ko e ngaahi mātuʻa fakapotopotó te nau feinga ke toka fakakaukauʻi ia. (Pal. 22:3) Fai e meʻa kotoa te ke lavá ke tokoniʻi hoʻo fānaú ke nau mateuteu.