Ko ʻEtau Ngaahi Makasiní—ʻOku Fakataumuʻa ke Fakamānako ki he Tokolahi
1. ʻOku fēfē faʻifaʻitaki ʻa e kalasi tamaioʻeiki anga-tonu mo potó ki he ʻapositolo ko Paulá?
1 Hangē pē ko e feʻunuaki ʻe he ʻapositolo ko Paulá ʻa e founga ʻene ʻoatu ʻa e ongoongo leleí koeʻuhi ke maʻu ai ʻa e “kakai kehekehe,” ʻoku ngāueʻaki ʻe he kalasi tamaioʻeiki anga-tonu mo potó ʻetau ngaahi makasiní ke aʻu ki he kakai ʻo e ngaahi puipuituʻa mo e ngaahi tui kehekehe. (1 Kol. 9:22, 23) Ke tau lava ʻo ngāueleleiʻaki ʻa e Taua Leʻo mo e ʻĀ Hake! ʻoku lelei ke tau manatuʻi kinautolu te nau lau ʻa e ngaahi makasiní ni.
2. Ko e ʻĀ Hake! ʻoku fakataumuʻa ia ke fakamānako kia hai?
2 ʻĀ Hake!: Ko e makasini ko ení ʻoku fakataumuʻa ia ke aʻu ki he faʻahinga kakai tatau mo ia naʻe lea ki ai ʻa Paula ʻi heʻene lea ki he “kau tangata ʻo ʻAtenisi.” (Ng. 17:22) Ko e kau tangata ko iá naʻe ʻikai hanau puipuituʻa faka-Kalisitiane, pea naʻe siʻi pē ʻenau mahinoʻi ʻa e Tohi Tapú. ʻOku pehē pē, ko e kau lautohi ʻoku fakataumuʻa ki ai ʻa e ʻĀ Hake! ʻoku siʻi pe halaʻatā haʻanau ʻilo ki he Tohi Tapú. ʻE halaʻatā nai haʻanau ʻilo fekauʻaki mo e ngaahi akonaki faka-Kalisitiané, ʻoku nau ngali taʻefalala nai ki he lotú, pe ʻoku ʻikai nai te nau lāuʻilo ʻoku ʻi ai ʻa e mahuʻinga ʻaonga ʻo e Tohi Tapú. Ko ha taumuʻa tefito ʻo e ʻĀ Hake! ke fakatuipauʻi hono kau lautohí ʻoku ʻi ai ʻa e ʻOtua moʻoní. Ko e toe taumuʻa ʻo e makasiní ni ke langaʻi ʻa e tui ki he Tohi Tapú pea tokoniʻi e tokotaha lautohí ke mahinoʻi ko e Kau Fakamoʻoni ʻa Sihová ʻoku nau kehe mei he ngaahi kulupu fakalotu kehé.
3. Ko e hā ʻa e kau lautohi ʻo e pulusinga taki taha ʻo e Taua Leʻo?
3 Ko e Taua Leʻo: Ko e kau lautohi ʻoku fakataumuʻa ki ai ʻa e pulusinga maʻá e kakaí ʻo e makasini ko ení ʻoku ʻi ai haʻanau kiʻi tokaʻi ʻo e ʻOtuá pea mo e Tohi Tapú. ʻOku nau maʻu ha ʻilo ʻe niʻihi ʻo e Tohi Tapú ka ʻoku ʻikai te nau mahinoʻi totonu hono ngaahi akonakí. ʻOku nau hangē ko e kau fanongo naʻe lave ki ai ʻa Paulá ko e faʻahinga ʻoku “manavahe ki he Otua.” (Ng. 13:14-16) Ko e pulusinga ako ʻo e Taua Leʻo ʻoku hiki tefito ia maʻá e Kau Fakamoʻoni ʻa Sihová. Naʻe fakakaukau ʻa Paula ko e faʻahinga ko ia naʻa nau lau ʻene ngaahi tohí naʻa nau alāanga mo e Tohi Tapú pea naʻa nau maʻu ha ʻilo totonu ʻo e moʻoní. (1 Kol. 1:1, 2) ʻOku pehē pē, ko e ngaahi kupu ʻi he pulusinga akó kuo tohi ia maʻá e faʻahinga ʻoku nau maʻu ʻetau ngaahi fakatahá pea ʻoku nau alāanga mo e ngaahi foʻi lea mo e ngaahi fakakaukau ʻa e Kau Fakamoʻoní.
4. Ko e hā ʻoku totonu ai ke tau hoko ʻo alāanga mo e ʻīsiu taki taha ʻo e ongo makasini ʻoku tau ngāueʻaki ʻi he malaʻe ngāué?
4 Neongo ʻoku tau tuʻuaki anga-maheni ʻa e ongo makasiní ko ha foʻi seti, ʻoku tau faʻa lāulea pē ki he taha ʻo kinaua ʻi heʻetau tuʻuakí. Ko ia ai, ʻai ia ko hoʻo kolo ke alāanga mo e ʻīsiu taki taha. Te ke ʻi ha tuʻunga lelei leva ai ke fakaʻaliʻali ʻa e meʻa ʻe fakamānako ki he faʻahinga ʻokú ke fetaulaki mo iá.