Ko e Hā Hoʻo “ʻUhinga ke Hakailangitau Ai”?

1. Ko e hā ʻa e ʻuhinga ʻoku tau maʻu ke hakailangitau ai ʻi he ngataʻanga ʻo e māhina taki tahá?

¹ ʻI he aʻu ki he ngataʻanga ʻo e māhina taki taha pea ʻoku kole ai ki he tokotaha kotoa ke ʻomai ʻenau līpooti ngāue fakamalangá, ko e hā hoʻo “ʻuhinga ke hakailangitau ai”? (Kal. 6:4) Tatau ai pē pe ʻoku tau tāimuʻa makehe ʻo līpooti ʻa e houa ʻe 130 ʻi he ngāue fakafaifekaú pe ko e tokotaha malanga kuo tali ke ne līpooti ʻa e miniti pē ʻe 15, ʻoku totonu ke tau fiefia kotoa ʻi he ʻetau ngāue ʻaufuatō kia Sihová.—Saame 100:2.

2. Ko e hā ʻoku totonu ai ke tau feinga mālohi ʻi he ngāue ʻa Sihová?

² Ko e ʻEiki Hau ʻo e ʻunivēsí, ʻoku taau ai mo Sihova ke foaki kiate ia ʻa e lelei taha ʻoku tau maʻú. (Mal. 1:6) Koeʻuhi ko ʻetau ʻofa kiate iá kuo tau fakatapui ai ʻetau moʻuí ke fai hono finangaló. Ko ia ai, ʻi he ngataʻanga ʻo e ʻahó pe ko e ngataʻanga ʻo e māhiná, kapau ʻoku tau falala-pau kuo tau ʻoatu ʻa e “polopolo” ʻo hotau taimí, ngaahi talēnití, mo e mālohí ʻi he ngāue ʻa Sihová, ko e ʻuhinga leva ia ke tau hakailangitau aí. (Pal. 3:9) Neongo ia, kapau ʻoku fakahalaiaʻi kitautolu ʻe hotau konisēnisí, ʻoku totonu leva ke tau fakakaukau ki ha meʻa ʻoku lava ke tau fai ke tau fakaleleiʻi ai ia.—Loma 2:15.

3. Ko e hā ʻoku ʻikai fakapotopoto ai ke fakahoa kitautolu ki he niʻihi kehé?

³ “ʻIkai ʻi Hono Fakahoa Atu ki ha Taha Kehe”: ʻOku ʻikai fakapotopoto ke fakahoa kitautolu ki he niʻihi kehé pe kia kitautolu ʻi he taimi ʻoku lahi ange ai hotau iví. Liliu ʻa e ngaahi tuʻungá. Kehekehe ngaahi malavá. Ko e fakahoá ʻoku faʻa taki atu ia ki he feʻauʻauhi pe ngaahi ongoʻi taʻeʻaonga. (Kal. 5:26; 6:4) Naʻe ʻikai fai ʻe Sīsū ʻa e fakahoá. ʻI hono kehé, naʻá ne ʻoatu ha fakaongoongolelei ʻo fakatatau mo e malava ʻa ha taha ke fai ha meʻa.—Mk. 14:6-9.

4. Ko e hā ʻa e ngaahi lēsoni mahuʻinga ʻe lava ke tau ako mei he pealapeli ʻa Sīsū fekauʻaki mo e ngaahi talēnití?

⁴ ʻI he pealapeli ʻa Sīsū ʻo fekauʻaki mo e ngaahi talēnití, ko e tokotaha ngāue taki taha naʻá ne maʻu ʻa e ngaahi talēniti “ʻo fakatatau ki heʻene malavá.” (Māt. 25:15) ʻI he foki mai ʻa e ʻeikí peá ne kole ha līpooti ki heʻenau ngāué, ko kinautolu naʻe ngāue tōtōivi ʻo fakatatau ki heʻenau ngaahi malavá mo fakaʻatā kinautolu ʻe he ngaahi tuʻungá naʻa nau maʻu ʻa e fakaongoongolelei pea hū ki he fiefiaʻanga ʻa honau ʻeikí. (Māt. 25:21, 23) ʻI heʻetau nofoʻaki femoʻuekina meimei tatau ʻi he ngāue malangaʻi ʻo e Puleʻangá, ʻoku lava ke tau falala-pau ki he hōifua ʻa e ʻOtuá mo e ʻuhinga ke tau hakailangitau aí!