Kuó Ke Maʻu ʻAonga mei Hono Maʻu ha Feituʻu Ngāue Fakafoʻituitui?
1. Ko e hā ʻa e feituʻu ngāue fakafoʻituitui?
1 Ko e hā ʻa e feituʻu ngāue fakafoʻituitui? ʻOku ala maʻu ia ʻi he ngaahi fakatahaʻanga ʻa ia ʻoku lahi honau feituʻu ngāué, ko ha feituʻu ngāue pē ʻaʻau, mahalo ko ha taha ofi atu ki he feituʻu ʻokú ke nofo aí. Ko e tohi Fokotuʻutuʻu Maau, peesi 103 ʻoku pehē ai: “ʻI hono maʻu hao feituʻu ngāue feʻungamālie pē ʻaʻaú te ne ʻai ai koe ke ke lava ʻo ngāue ola lelei ʻaki ʻa e taimi ʻoku lava ke līʻoa ki he malaʻe malangá. ʻIkai ko ia pē, ʻe lava ke ke fakaafeʻi ha tokotaha malanga ʻe taha ke mo ngāue fakataha ʻi ho feituʻu ngāue ʻaʻaú.”
2. ʻE anga-fēfē nai hano ngāueʻaki ha feituʻu ngāue fakafoʻituitui ke tokoni ki he faifakamoʻoni fakakulupú?
2 Tokoni ki he Faifakamoʻoni Fakakulupú: Kapau ʻokú ke maʻu ha feituʻu ngāue fakafoʻituitui ofi atu ki hoʻo ngāué, ʻe lava ke ke kau atu ʻi he malangá lolotonga ʻa e kai hoʻataá pe ki muʻa ke foki ki ʻapí, mahalo mo ha tokotaha malanga ʻoku ngāue ofi atu kiate koe. Kapau ʻokú ke maʻu ha feituʻu ngāue ofi ki ho ʻapí, te ke lava mo ho fāmilí ʻo faifakamoʻoni efiafi ʻi ha taimi feʻungamālie. Ko e moʻoni, kapau ʻoku ʻikai ke ke ʻalu ki he fakataha ʻa e kulupu malangá, ʻoku lelei ke lotu ki he tataki ʻa Sihová ki muʻa ke kamata hoʻo malangá. (Fil. 4:6) Tānaki atu ki aí, ʻoku totonu ke ke fakamafamafatatau ʻa e taimi ʻokú ke ngāue ai ʻi he feituʻu ngāue fakafoʻituituí mo e taimi ʻokú ke poupou ai ki he ngaahi fokotuʻutuʻu ʻa e fakatahaʻangá ki he kulupu malangá. Tautefito ki he ngaahi fakaʻosinga ʻo e uiké, ʻi he taimi ʻoku tokolahi ai ʻa e fakataha ki he ngāue fakamalangá, ʻoku faʻa lelei tahá ke poupouʻi hoʻo kulupu ngāue fakamalangá.
3. Ko e hā ʻa e ngaahi ʻaonga ʻo hono maʻu ha feituʻu ngāue fakafoʻituituí?
3 ʻAonga: Kapau ʻokú ke maʻu ha feituʻu ngāue fakafoʻituitui, ʻoku ʻi ai ha feituʻu ke ke malanga ai ʻi ha taimi ʻoku fakaʻatā ai koe ʻe hoʻo taimi-tēpilé. ʻOku lahi ange ʻa e taimi ʻe lava ke ke līʻoa ki he malangá pea fakamoleki ʻa e taimi siʻi ange he fonongá. Ko e lahi ange ʻa e ngaofengofuá ʻoku fakaʻatā ai ʻa e niʻihi ke tāimuʻa tokoni pe tāimuʻa tuʻumaʻu. Koeʻuhi ko e fakahāhā ʻe he tokotaha-ʻapí ha mahuʻingaʻia, ʻe faingofua ange ai ke fai ʻa e toe ʻaʻahí pea mo fakahoko ʻa e ngaahi ako Tohi Tapu. Ko e tokolahi ʻoku nau ʻilo ko e malanga ʻi he feituʻu ngāue fakafoʻituituí ʻoku tokoni ia kiate kinautolu ke ʻiloʻi ʻa e tokotaha-ʻapí pea fakatupulekina ʻenau falalá, tautefito kapau ko e feituʻu ngāué ʻoku lava ke ngāueʻi ʻo laka hake he tuʻo tahá ki muʻa ke fakafokí koeʻuhi ke lava ʻo kole nai ia ʻe he niʻihi kehé. Ko e ngāue ʻi ha feituʻu ngāue fakafoʻituitui te ne tokoniʻi koe mo ho fāmilí ke fakahoko kakato ange hoʻo mou ngāue fakafaifekaú?—2 Tīm. 4:5.