Sio ki he Kau Palōfitá ko ha Sīpinga—Hōsea
1. Ko e hā nai ha fehuʻi kuó ke ʻeke hifo kiate koe?
1 ‘Ko e hā ʻa e ngaahi feilaulau ʻoku ou loto-lelei ke fai maʻa Sihová?’ Mahalo kuó ke ʻeke hifo kiate koe ʻa e fehuʻi ko iá ʻi hoʻo fakalaulauloto ki he hulu fau ʻa ʻene leleí mo e mēsí. (Saame 103:2-4; 116:12) Naʻe loto-lelei ʻa Hōsea ke fai ʻa e fekau naʻe ʻoange ʻe Sihova kiate iá, neongo naʻe fiemaʻu ha feilaulau fakafoʻituitui. ʻE lava fēfē ke tau faʻifaʻitaki kia Hōsea?
2. ʻE lava fēfē ke tau faʻifaʻitaki ki he faʻifaʻitakiʻanga lelei ʻa Hōseá ʻi he kītaki ʻi he ngāue fakamalangá?
2 Malanga ʻi he Taimi Faingataʻá: Ko e pōpoaki ʻa Hōseá naʻe fakahangatonu tefito ia ki he puleʻanga matakali ʻe hongofulu ʻo ʻIsilelí, ʻa ia ko e lotu moʻoní naʻe meimei mole ʻosi. Ko Tuʻi Selopoame II naʻá ne fai ʻa e meʻa naʻe kovi ʻi he vakai ʻa Sihová pea tākiekina ai ʻa e lotu ki he kiʻi pulú ʻa ia naʻe kamataʻi ʻe Selopoame I. (2 Tuʻi 14:23, 24) Ko e ngaahi tuʻi hokohoko atu aí naʻa nau holoki fakalaumālie ʻa e puleʻanga matakali ʻe hongofulú ʻo aʻu ki hono fakaʻauha ʻosi ʻi he 740 K.M. Kae kehe, neongo ʻa e failahia ʻo e lotu loí, naʻe hoko atu pē ʻa Hōsea ko ha palōfita faitōnunga ʻo ʻikai siʻi hifo ʻi he taʻu ʻe 59. ʻOku tau fakapapauʻi ʻi he tuʻunga meimei tatau ke malanga ʻi he taʻu ki he taʻu neongo ʻa e fehangahangai mo ha ngaahi taʻemahuʻingaʻia pe fakafepaki?—2 Tīm. 4:2.
3. Naʻe anga-fēfē hono fakatātaaʻi ʻe he moʻui ʻa Hōseá ʻa e meesi ʻa Sihová?
3 Fakahangataha ʻi he Meesi ʻa Sihová: Naʻe fekau ʻe Sihova ʻa Hōsea ke mali mo “ha fefine feʻauaki.” (Hōs. 1:2) Neongo ko hono uaifí, ʻa Kōmela naʻá ne fanauʻi kiate ia ha foha, ngalingali naʻá ne toe fanauʻi ha ongo tamaiki tuʻutāmaki ki mui. Naʻe loto-lelei ʻa Hōsea ke fakamolemoleʻi hono uaifí naʻe fakatātaaʻi ai ʻa e meesi lahi ʻa Sihova ki ʻIsileli talangataʻá ʻi he taimi naʻa nau fakatomala aí. (Hōs. 3:1; Loma 9:22-26) ʻOku tau loto-lelei ke tuku ki tafaʻaki ʻetau saiʻia fakafoʻituituí kae malava ke ʻai ke ʻiloa ʻa e meesi ʻa Sihová ki he faʻahinga kakai kotoa pē?—1 Kol. 9:19-23.
4. Ko e hā ha ngaahi feilaulau ʻe niʻihi ʻe lava nai ke tau fai maʻa Sihova?
4 Ko e niʻihi ʻo e kau sevāniti ʻa Sihová ʻoku nau feilaulauʻi ha ngaahi lakanga totongi lelei kae malava ke nau līʻoa lahi ange honau taimí ki he ngāue fakafaifekaú. Ko e niʻihi ʻoku nau nofo taʻemali pe ʻikai maʻu fānau kae tuli ki he ngaahi meʻa mahuʻinga ʻo e Puleʻangá. ʻI he fakakaukauloto ki he moʻui ʻa Hōseá, te tau fakakaukau nai kiate kitautolu, ‘ʻE ʻikai ʻaupito ke u lava ʻo fai ʻa e meʻa naʻá ne faí.’ Kae kehe, ʻi he tupulaki ʻetau houngaʻia ki he ʻofa maʻataʻatā ʻa Sihová pea falala ki hono laumālie māʻoniʻoní ki ha mālohi, ʻe lava ke ne ngāueʻaki nai kitautolu ʻi ha ngaahi founga ʻe ʻikai ʻaupito te tau fakakaukau ʻe malava, ʻo hangē pē ko Hōseá.—Māt. 19:26; Fil. 2:13.