Ako Fakafaifekau Fakateokalati ki he 2015 ʻOkú Ne Tokoniʻi Kitautolu ke Fakaleleiʻi ʻEtau Faiakó

¹ Naʻe tohi ʻe he tokotaha-tohi-saame ko Tēvitá: “ʻE Sihova, ke hoko lelei ki ho ʻao ʻa e ngaahi lea ʻa hoku ngutu ni, mo e fakakaukau ʻa hoku loto, ʻa e ʻAfiona ko hoku Moʻunga mo hoku Koeli!” (Saame 19:14) ʻOku tau loto foki mo kitautolu ke hoko ʻetau ngaahi leá ʻo lelei pe fakahōifua kia Sihova koeʻuhí ʻoku tau koloaʻaki hotau monū ke leaʻaki ʻa e moʻoní ʻi he fakatahaʻangá pea ʻi he ngāue fakafaifekaú. Ko e Ako Fakafaifekau Fakateokalatí ko e taha ia ʻo e ngaahi founga ʻo hono akoʻi kitautolu ʻe Sihova ki he ngāue fakafaifekaú. ʻOku fakahoko ʻa e ako ko ení ʻi he uike taki taha ʻi he fakatahaʻanga laka hake ʻi he 111,000 ʻi māmani lahi. Kuo tokoniʻi ai ʻa e fanga tokoua mo e fanga tuofāfine takatakai he māmaní mei he ngaahi puipuituʻa kehekehe ke nau hoko ʻo taau feʻunga ko ha kau faifekau ʻo e ongoongo leleí, ʻo malava ke faiako fakataha mo e fakalotoʻi, fakapotopoto mo e loto-toʻa.—Ngā. 19:8; Kol. 4:6.

² ʻI he taimi-tēpile ki he ako ʻi he 2015 kuo fai ʻa e fengaʻunuʻaki ʻi he taimi ʻoku vaheʻi ki he meʻa mahuʻinga mei he Tohi Tapú mo e Konga Fika 1. Ko e ngaahi liliu ko ení fakataha mo e ngaahi fakahinohino ki he anga hono fakahoko ʻa e ngaahi konga ʻi he akó ʻoku lāulea ki ai ʻa e ngaahi palakalafi hokó.

³ Meʻa Mahuʻinga mei he Tohi Tapú: Ko e fanga tokoua ʻoku vaheʻi ki ai ʻa e konga ko ení te nau maʻu ʻa e miniti ʻe ua ke lāulea ai ki he poini Fakatohitapu mahuʻinga mo ʻaonga ʻe taha mei he lau Tohi Tapu fakauiké. Ko e teuteu leleí ʻe iku ia ki hano vahevahe ha poini ʻaonga ki he fakatahaʻangá ʻi loto ʻi he taimi kuo vaheʻí. Hili iá, ʻe maʻu ʻe he fakatahaʻangá ʻa e miniti ʻe ono anga-mahení ke fai ha poupou sekoni ʻe 30 pe siʻi ange ai ʻo fekauʻaki mo e ngaahi poini mahuʻinga naʻa nau maʻu ʻi he lau Tohi Tapu fakauiké. ʻOku fiemaʻu ʻa e teuteu mo e mapuleʻi-kita ke fai ha poupou mohu ʻuhinga ʻi he sekoni ʻe 30, ka ko e fai peheé ko ha akoʻi lelei ʻo kitautolu. ʻOku toe fakaʻatā ai ha taimi ki ha niʻihi kehe ke nau fakamatala ki he meʻa naʻa nau ako ʻi heʻenau fekumi fakafoʻituituí.

⁴ Konga Fika 1: Ko e taimi ʻoku vaheʻi ki he lau Tohi Tapú kuo fakasiʻisiʻi ia ki he miniti ʻe tolu pe siʻi ai pea ʻe feʻunga ia mo ha fakamatala siʻisiʻi. Ko e faʻahinga ʻoku nau maʻu ha konga lautohi ʻoku totonu ke toutou ʻahiʻahiʻi ia ʻaki hono lau leʻo-lahi ia pea tokanga lelei ki he puʻaki totonú mo e pōtoʻi koeʻuhí ke fakahaaʻi ʻa e fakakaukaú mo e mahinó. Ko e kotoa ʻo e kakai ʻa Sihová ʻoku totonu ke nau feinga ke lautohi lelei, koeʻuhi ko e lautohí ko ha konga mahuʻinga ia ʻi heʻetau lotú. He fiefia ē ko kitautolu ʻi he tokolahi ʻetau fānau ʻoku nau lautohi leleí! ʻOku fakaongoongoleleiʻi ʻa e ngaahi mātuʻá ki heʻenau feinga anga-ʻofa ke tokoniʻi ʻenau fānaú ke nau hoko ko e kau lautohi leleí.

⁵ Konga Fika 2: Ko ha konga miniti ʻe nima eni ʻoku vaheʻi ki ha tuofefine. Ko e kaveinga kuo vaheʻí ʻoku totonu ke ngāueʻaki. ʻI he taimi ʻoku makatuʻunga ai ʻa e kongá ʻi he fakamatala ʻoku maʻu ʻi he polosiua Ongoongo Lelei pe Talateu ki he Folofola ʻa e ʻOtuá, ʻoku totonu ke ngāueʻaki ia ki ha tafaʻaki ʻi he ngāue fakamalangá ʻa ia ʻoku ʻi ha tuʻunga moʻoni mo ʻaonga ki he feituʻu ngāue fakalotofonuá. ʻE fakakau nai ai ha toe konga Tohi Tapu ʻoku kaunga ki he kaveingá. ʻE vaheʻi ʻe he ʻovasia akó ha tokotaha tokoni.

⁶ Konga Fika 3: Ko ha konga miniti ʻe nima eni ʻoku vaheʻi ki ha tokoua pe ko ha tuofefine. ʻI hono vaheʻi ki ha tuofefine, ko e konga ko ení ʻoku totonu ke fakahoko ia ʻo hangē ko e Konga Fika 2. ʻI hono vaheʻi ki ha tokoua, ko e fakamatalá ʻoku makatuʻunga ia ʻi he Ngaahi Kaveinga Fakatohitapu ki he Fetalanoaʻakí ʻi he Liliu Tohi Tapu ʻo e Māmani Foʻoú ʻo e Ngaahi Konga Tohi Tapu Faka-Kalisi Kalisitiané ʻoku totonu ke fai ia ko ha malanga fakataha mo e fakakaukau ki he kau fanongó. ʻOku totonu ke fakahoko ʻe he tokotaha akó ʻa e kaveinga kuo vaheʻí pea fili ʻa e ngaahi konga Tohi Tapu feʻungamālie ke ngāueʻakí.

⁷ Akonaki: ʻE ngāueʻaki ʻe he ʻovasia akó ʻa e miniti ʻe ua hili ʻa e konga ʻa e tokotaha ako taki taha ke fai ha fakaongoongolelei pehē foki ki ha akonaki ʻaonga ʻo makatuʻunga ʻi he Maʻu ʻAonga mei he Ako Fakafaifekau Fakateokalatí. ʻI he taimi ʻoku fakafeʻiloaki ai ʻe he ʻovasia akó ʻa e konga ʻa ha tokotaha ako ʻi he polokalamá, heʻikai ke ne tala mai ʻa e poini ʻoku ngāue ki ai ʻa e tokotaha akó. Hili ʻa e konga taki taha, ʻoku totonu ki he ʻovasiá ke ne fakaongoongoleleiʻi loto-moʻoni ʻa e tokotaha akó, ʻo tala mai ʻa e poini naʻe ngāue ki ai ʻa e tokotaha akó pea lave hangatonu ki he ʻuhinga naʻe lelei ai ʻa e ngāue ʻa e tokotaha akó ki he poini ko iá pe fakamatalaʻi anga-ʻofa ʻa e ʻuhinga ʻe ʻaonga ai ki he tokotaha akó ke toe tokanga lahi ange ki he poini ko iá.

⁸ Ko e foomu akonaki ʻa e tokotaha akó ʻe lava ke maʻu ia ʻi he peesi 79 ki he 81 ʻene tatau fakafoʻituitui ʻo e tohi Ako Fakafaifekau. Hili hono fai ʻe ha tokotaha ako ʻene kongá, ʻe fakaʻilongaʻi feʻungamālie ʻe he ʻovasia akó ʻa e tohi ʻa e tokotaha akó pea ʻeke fakafoʻituitui ange ki he tokotaha akó pe naʻá ne fakahoko ʻa e meʻa naʻe vaheʻi ke ne faí. Ko e fakaongoongolelei pehē foki ki ha toe ngaahi fokotuʻu ʻaonga ʻe lava ke ʻoange ia ki he tokotaha akó ʻi he hili ʻa e fakatahá pe ko ha taimi kehe. Ko e akonaki fakafoʻituitui ʻoku maʻu ʻe ha tokotaha ako ʻi he akó ʻoku totonu ke vakai ki ai ko ha faingamālie ia ke tokoniʻi ia ke laka ki muʻa fakalaumālie.—1 Tīm. 4:15.

⁹ Kapau ʻoku ʻovataimi ha tokotaha ako, ko e ʻovasia akó pe ko e tokoní ʻoku totonu ke tokanga ke ʻoatu ha fakaʻilonga, hangē ko hono tā ha fafangu pe fakaʻilonga atu, ke fakahaaʻi ʻi ha founga fakapotopoto ko e taimi ʻa e tokotaha akó kuo ʻosi. ʻOku totonu ke ʻiloʻi ʻe he tokotaha akó ʻa e fakaʻilongá pea fakaʻosi ʻene sētesí pea mavahe mei he peletifōmú.—Sio ki he tohi Ako Fakafaifekau, p. 282, pal. 4.

¹⁰ Ko e faʻahinga kotoa ʻoku nau aʻusia ʻa e ngaahi fiemaʻú ʻoku fakalototoʻaʻi ke nau kau ʻi he Ako Fakafaifekau Fakateokalatí. (Sio ki he tohi Ako Fakafaifekau, p. 282, pal. 6.) Ko e ako ʻoku tokonaki mai ʻe he ako ko ení kuó ne ʻai ke malava ʻa e kakai ʻa Sihová ʻo malanga mo faiakoʻaki ʻa e ongoongo lelei ʻo e Puleʻangá fakataha mo e tuipau, fakangeingeia mo e ʻofa. ʻOku ʻikai ha veiveiua ʻoku hōifua ʻa Sihova ʻi hono fakalāngilangiʻi ia ʻe he faʻahinga kotoa ʻoku nau maʻu ʻaonga lahi mei he ako fakateokalatí!—Saame 148:12, 13; ʻAi. 50:4.