Ngaahi Hiva Foʻou ki he Lotú!
1 ʻI he fakataha fakataʻu fakamuimui taha ʻa e Watch Tower Bible and Tract Society of Pennsylvania, ʻa ia naʻe fakahoko ʻi ʻOkatopa 4, 2014, naʻe fanongonongo ai ʻa e palani ke fakafoʻou ʻetau tohi hiva lolotongá. Ko ha ongoongo fakafiefia moʻoni ia! Naʻe fakamanatu ai ki he kau maʻu fakatahá kotoa ko ʻetau ngaahi hiva ʻo e Puleʻangá kuo hoko ia ko ha konga mahuʻinga ʻi heʻetau lotú.—Saame 96:2.
2 Te ke fifili nai, ‘Ko e hā ʻoku fiemaʻu ai ke fakafoʻou ʻa e tohi hivá?’ ʻOku ʻi ai ʻa e ngaahi ʻuhinga kehekehe. ʻUluakí, ko ʻetau mahinoʻi ʻo e Folofolá ʻoku hokohoko atu ke fakaleleiʻi, pea ʻe lava ke liliu ai ʻa e fakalea ʻetau ngaahi hivá. (Pal. 4:18) Ko e ʻuhinga ʻe taha ki he fakafoʻoú: ʻI he ngaahi lea lahi ko e ngaahi lea mo e kupuʻi lea ʻoku ngāueʻaki ʻi he tohi hiva lolotongá naʻe toʻo ia mei he pulusinga ki muʻa ʻo e New World Translation. Ko e ngaahi fakalea ko iá kuo pau ke fakatonutonu he taimí ni ke fehoanaki mo e fakalea ʻo e pulusinga kuo fakaleleiʻí. Koeʻuhi ko e ngāue lahi ʻe fiemaʻu ki hono ʻai ʻo e ngaahi fakaleá ki he fakamuimui tahá, naʻe fili ai ke toe tānaki atu ha ngaahi hiva foʻou ʻe niʻihi ki he tohi hivá.
3 ʻE fiemaʻu ke tau tatali kae ʻoua ke pulusi mai ʻa e tohi hiva foʻoú ki muʻa ke lava ʻo tau kamata ngāueʻaki ʻa e ngaahi hiva foʻoú? ʻIkai. ʻOku mau fiefia ke fakahaaʻi atu ʻi he ngaahi māhina ka hokó, ʻe tukuange mai ha ngaahi hiva foʻou ʻi heʻetau Uepisaiti, jw.org. ʻI he taimi ʻe tukuange mai ai ha hiva foʻou, ʻe fakataimitēpileʻi ia ke hivaʻi ʻi he ngataʻanga ʻo ha Fakataha Ngāue mo e fakalea ʻo e “hiva foʻou.”
4 Founga ke Ako Ai ʻa e Ngaahi Hiva Foʻoú: ʻE lava ke hoko ko ha pole hono ako ha hiva foʻou. Ka, hangē ko e tokotaha-tohi-sāmé, ʻoku tau loto ke hiva ʻi he ngaahi fakataha ʻa e fakatahaʻangá pea “ʻoua ʻe fakalongolongo.” (Saame 30:12, NW) Ke ako ha hiva foʻou, muimui ʻi he ngaahi sitepu faingofua ko ení.
Toutou fanongo ki he tā piano ʻo e hivá, ʻa ia ʻe ʻasi ʻi heʻetau Uepisaití. Ko e lahi ange hoʻo fanongo ki he fasí, ko e faingofua ange ia kiate koe ke manatuʻi iá.
Ako ʻa e fakaleá, pea feinga ke maʻuloto ia.
Hivaʻi fakataha ʻa e fasí mo e fakaleá. Fai pehē kae ʻoua ke ke maʻu ʻa e hivá.
Toutou hivaʻi ʻa e ngaahi hiva foʻoú lolotonga hoʻo Lotu Fakafāmilí kae ʻoua ke maʻu ia ʻe ho fāmilí.
5 ʻI he māhina ka hoko mai ʻi he taimi ʻe fakataimitēpileʻi ai ha hiva foʻou ke fakaʻosiʻaki ʻa e Fakataha Ngāué, ʻe fanongo tuʻo taha ʻa e fakatahaʻangá ki he tā pianó. ʻE hivaʻi leva ʻe he kau fanongó ʻa e hivá fakataha mo e tā pianó, ʻo hangē pē ko ʻetau hivaʻi ʻa e ngaahi hiva kehé.
6 ʻI he taimi ʻokú ke fakakaukau ai ki aí, ko e hiva ʻi heʻetau ngaahi fakatahá ʻoku ʻomai ai kia kitautolu ʻa e fiefia ʻi hono fakatahaʻi fakataha hotau leʻó ʻi hono fakahīkihikiʻi ʻo Sihová. Ko ia ai, ʻoku totonu ke ʻoua te tau angaʻaki ʻa e mavahe noaʻia mei hotau ngaahi nofoʻangá ʻi he taimi ʻoku fakafeʻiloaki ai ha hiva ʻi heʻetau ngaahi fakataha faka-Kalisitiané.
7 ʻOku ʻi ai ʻa e founga ʻe taha ʻe lava ke tau fakahāhā ai ʻa e houngaʻia moʻoni ʻi heʻetau hiva toputapú. ʻI he ngaahi ʻasemipilī mo e fakataha-lahí, ʻoku fai ha tā fasi ki muʻa ke kamata ʻa e konga taki taha. Tuʻo ua he taʻu, ko e fanga tokoua mo e fanga tuofāfine līʻoa mei he tapa kotoa ʻo e māmaní ʻoku nau fononga mai ʻi he fakamole pē ʻa kinautolu ki Patterson, Niu ʻIoke, koeʻuhi ke faʻu ha hiva mālie ke ngāueʻaki ʻi heʻetau lotú. Ko ia, ʻi he taimi ʻoku fakaafeʻi ai kitautolu ʻe he seá ke tau tangutu pea fanongo ki he fasi kuo teuteuʻi ʻe he kau tā meʻaleá, ʻoku totonu ke tau fai pehē. Ko ʻetau fai ení ʻe tokoniʻi ai kitautolu ke teuʻi hotau lotó ki he fakamatala ʻe hoko maí.—ʻĒsela 7:10, PM.
8 Te tau fakaʻosiʻaki ʻetau fakataha he ʻaho ní ʻa e hiva foʻou ʻoku fakakaveinga “Kuo ʻi Ai ʻa e Puleʻangá—Tuku ke Hoko Mai!” Ko e hiva ko ení, ʻa ia naʻe fakahoko ʻi he fakataha fakataʻu fakamuimuí, naʻe faʻu tefito ia ke fakaʻilongaʻiʻaki ʻa hono fakamanatu ʻo e taʻu 100 ʻo hono fanauʻi ʻa e Puleʻangá.
9 Ko e ngaahi hiva foʻoú ko e “ngaahi meʻa lelei” moʻoni ia meia Sihova. (Māt. 12:35a) Tau ʻai ko ʻetau fakapapaú ia ke ako ʻa e ngaahi hiva foʻou ko ení pea hivaʻi ia mei hotau lotó, ʻo ʻave ai ʻa e fakahīkihiki mo e fakalāngilangi feʻungamālie ki hotau ʻOtuá!—Saame 147:1.