Ko ha Ngaahi Langi Foʻou mo ha Fonua Foʻou Te Na ʻOmai ʻa e Fiefia Lahi

Ko e talaʻofa ʻa e ʻOtuá ki he fakafoʻoú ʻoku lēkooti ia ʻi he ʻAisea vahe 65 ʻoku mātuʻaki pau he ʻoku folofola ʻa Sihova ʻo fekauʻaki mo ia ʻo hangē ia kuo ʻosi fakahokó.

ʻOku fakatupu ʻe Sihova ʻa e ngaahi langi foʻou mo ha fonua foʻou, ʻa ia ʻe ʻikai toe manatua ʻa e ngaahi meʻa muʻá

65:17

Ko e hā ʻa e ngaahi langi foʻoú?

• Ko ha founga-pule foʻou te ne ʻomai ʻa e ngaahi tuʻunga māʻoniʻoní ki he māmaní

• Naʻe fokotuʻu ia ʻi he 1914 ʻi he taimi naʻe fakanofo tuʻi ai ʻa Kalaisi ko e Tuʻi ʻi he Puleʻanga ʻo e ʻOtuá

Ko e hā ʻa e fonua foʻoú?

• Ko ha sōsaieti ia ʻo ha kakai mei he ngaahi puleʻanga, lea mo e matakali kotoa pē, ʻoku nau anganofo fiefia ki he pule ʻa e founga-pule foʻou fakahēvaní

ʻI he founga fē ʻe ʻikai ke toe manatua ai ʻa e ngaahi meʻa muʻá?

• Ko e ngaahi tupuʻanga ʻo e ngaahi manatu fakamamahí—fakasino, fakaʻatamai mo e faingataʻaʻia fakaeongó—ʻe ʻikai ke toe ʻi ai

• ʻE fiefia kakato ʻa e faʻahinga faitōnunga ʻo e tangatá pea te nau koloaʻaki ʻa e ngaahi manatu fakafiefia ʻi he hili ʻa e ʻaho taki taha