Pouaki ʻa e Ngaahi Tuʻunga Fakaeʻulungaanga ʻa Sihová

Ko Sihova ko e ʻOtuá kuó ne fokotuʻu ʻa e tuʻunga ki he ʻulungāngá ki he faʻahinga ʻo e tangatá. Hangē ko ení, ʻokú ne tuʻutuʻuni ko e nofo malí ko ha haʻi tuʻuloa ia ʻi he vahaʻa ʻo e tangata mo ha fefine. (Māt. 19:​4-6, 9) ʻOkú ne fakahalaiaʻi ʻa e faʻahinga kotoa pē ʻo e fehokotaki fakaesino ­taʻetāú. (1 Kol. 6:​9, 10) ʻOku aʻu ʻo ne tokonaki mai ʻa e ngaahi tefitoʻi moʻoni fekauʻaki mo e valá mo e teuteú ʻa ia ʻoku fakamavaheʻi ai ʻene kakaí.—Teu. 22:5; 1 Tīm. 2:​9, 10.

ʻI he māmani ʻo e ʻaho ní, ʻoku talitekeʻi ʻe he kakai tokolahi ʻa e ngaahi tuʻunga ʻa Sihová. (Loma 1:​18-​32) ʻOku nau fakaʻatā ʻa e fakakaukau manakoá ke ne tākiekina honau valá, mo e teuteú mo honau ʻulungāngá. Ko e tokolahi ʻoku nau futaʻaki ʻenau faihala lahí mo fakaangaʻi ʻa e faʻahinga ʻoku nau moʻuiʻaki ha tuʻunga ʻoku kehe.​—1 Pita 4:​3, 4.

ʻI he tuʻunga ko e Kau Fakamoʻoni ʻa Sihová, kuo pau ke tau pouaki loto-toʻa ʻa e ngaahi tuʻunga fakaeʻulungaanga ʻa e ʻOtuá. (Loma 12:​9) Anga-fēfē? ʻOku totonu ke tau fakapotopoto ʻi hono ʻai ke ʻiloa ʻa e meʻa ʻoku fakahōifua kiate iá. Ka ʻoku toe fiemaʻu ke tau tauhi maʻu ha tuʻunga māʻolunga ʻi heʻetau moʻuí tonu. Ko e fakatātaá, ʻi heʻetau filifili ʻa e ngaahi sitaila ʻo e valá mo e teuteú, te tau ʻeke hifo nai kiate kitautolu: ‘ʻOku tapua atu ʻi heʻeku ngaahi fili ko ení ʻa e ngaahi tuʻunga ʻa Sihová pe ko e māmaní? ʻOku fakahaaʻi atu ʻi hoku valá mo e teuteú ko ha Kalisitiane manavahē-ʻOtua au?’ Pe ʻi hono fili ha polokalama pe ko ha faiva ke mamata ai, te tau ʻeke hifo nai kiate kitautolu: ‘ʻE tali ʻe Sihova ʻa e polokalama ko ení? Ko e ngaahi tuʻunga fakaeʻulungaanga ʻa hai ʻoku pouaki aí? ʻOku hanga ʻe heʻeku fili ʻo e fakafiefiá ʻo fakavaivaiʻi ʻeku ngaahi maluʻi fakaeʻulungāngá? (Saame 101:​3) ʻOku lava ke hoko ia ko ha tūkiaʻanga ki he mēmipa ʻo e fāmilí pe ko e niʻihi kehé?’​—1 Kol. 10:​31-​33.

Ko e hā ʻoku mātuʻaki mahuʻinga ai ke tau pouaki ʻa e ngaahi tuʻunga fakaeʻulungaanga ʻa Sihová? ʻE vavé ni ke fakaʻauha ʻe Kalaisi Sīsū ʻa e ngaahi puleʻangá mo e fulikivanu kotoa pē. (ʻIsi. 9:​4-7) Ko e faʻahinga pē ʻoku nau fai ʻa e finangalo ʻo e ʻOtuá ʻe kei toé. (1 Sio. 2:​15-​17) Ko ia, tau taukapoʻi ʻa e ngaahi tuʻunga fakaeʻulungaanga ʻa Sihová koeʻuhi ke fakalāngilangiʻi ʻa e ʻOtuá ʻe he faʻahinga ʻoku nau sio tonu mai ki heʻetau ʻulungaanga leleí.​—1 Pita 2:​11, 12.

SIO ʻI HE VITIŌ HOKO KO E KAUMEʻA ʻO SIHOVA​—TANGATA ʻE TAHA, FEFINE ʻE TAHA, PEA LĀULEA LEVA KI HE NGAAHI FEHUʻI KO ENÍ:

• Ko e hā ʻoku fakapotopoto ai ke moʻuiʻaki ʻa e ngaahi tuʻunga ʻa Sihová?

• Ko e hā ʻoku totonu ai ki he ngaahi mātuʻá ke nau kamata akoʻi ʻa e ngaahi tuʻunga fakaeʻulungaanga ʻa Sihová ki heʻenau fānaú ʻi heʻenau kei taʻu siʻí?

• ʻE lava fēfē ke tokoniʻi ʻe he faʻahinga kei siʻi mo e taʻumotuʻá ʻa e kakaí ke nau maʻu ʻaonga mei he ngaahi lelei ʻa e ʻOtuá?