MOʻUI KO HA KALISITIANE

Fili Fakapotopoto ʻa Hoʻo Fakafiefiá

Ko e hā kuo pau ai ke tau fili fakapotopoto ʻa ʻetau fakafiefiá? Koeʻuhí ko e taimi ʻoku tau fili ai ke sio ha faiva, fanongo ki ha hiva, uepisaiti te ke hū ki ai, lau ha tohi pe vaʻinga ʻi ha keimi vitiō, ʻoku tau fili ai ʻa e meʻa ke ne fakafonu hotau ʻatamaí. Ko ʻetau ngaahi filí ʻoku kaunga ia ki hotau ʻulungāngá. ʻOku fakamamahí, ko e lahi taha ʻo e ngaahi fakafiefia ʻoku ala maʻu ʻi he ʻaho ní ʻoku kau ai ʻa e ngaahi meʻa ʻoku fakahalaiaʻi ʻe Sihova. (Saame 11:5; Kal. 5:19-21) ʻI he ʻuhinga ko ení, ʻoku ekinaki mai ʻa e Tohi Tapú ke tau hokohoko atu ke tokanga ki he ngaahi meʻa ʻokú ne fakalāngilangiʻi ʻa Sihová.—Fil. 4:8.

SIO ʻI HE VITIŌ KO E HĀ ʻA E FAKAFIEFIA ʻOKU TOTONU KE U FILÍ? PEA TALI LEVA ʻA E NGAAHI FEHUʻI KO ENÍ:

Ko e hā ʻa e faitatau ʻi he vaʻinga tau ki he mate ʻa e kau Lomá pea mo e ngaahi fakafiefia ʻe niʻihi ʻi hotau ʻaho ní?
ʻE lava fēfē ke tokoni ʻa e fakatahaʻangá ki he toʻutupú ke nau fili fakapotopoto ʻa e fakafiefiá?
ʻOku totonu ke fēfē hono tokoniʻi kitautolu ʻe he Loma 12:9 ki he fili ʻo e fakafiefiá?
Ko e hā ʻa e faʻifaʻitakiʻanga ʻe niʻihi ʻo e fakafiefia ʻoku lelei ʻi ho feituʻú?

FAKAFIEFIA LONGOMOʻUI PE ʻIKAI LONGOMOʻUI?

Ko e lahi taha ʻo e ngaahi fakafiefia ʻiloa ʻo e ʻaho ní ʻokú ne ʻai ha tokotaha ke ʻikai longomoʻui. Ko e ngaahi faiva, tohi pea mo e polokalama televīsoné ʻokú ne ʻomai ʻa e ngaahi fakakaukau ʻa ha tokotaha kehe ʻo ʻikai ko hoʻo fakakaukaú tonu. Lolotonga ʻoku ʻi ai ha feituʻu ki he fakafiefia ʻoku ʻikai longomoʻuí, ʻoku pehē ʻe he tokolahi ʻoku ola lelei ange ʻa e fakafiefia longomoʻuí. Ko e fakatātaá, ʻoku saiʻia ʻa e niʻihi ke tā ha meʻalea pe tā fakatātā. ʻOku saiʻia ʻa e niʻihi ia ʻi he fakafiefia ʻoku longomoʻuí, hangē ko e luelue ʻeveʻevá pe kemí. Ko ha fakafiefia pe ʻoku tau fili, tau “fai ʻa e ngaahi meʻa kotoa pē maʻá e lāngilangi ʻo e ʻOtuá.”—1 Kol. 10:31.