Toʻutupu—“Faivelenga Maʻá e Ngaahi Ngāue Leleí”

ʻI he tohi fakamānavaʻi ʻa e ʻapositolo ko Paulá kia Taitusí, naʻá ne tohi ai ko e kau tangata taʻu siʻi angé, kau ai ʻa Taitusi, ʻoku totonu ke nau fai honau lelei tahá ke hoko ko ha “faʻifaʻitakiʻanga ʻo e ngaahi ngāue leleí ʻi he tafaʻaki kotoa pē.” (Tai. 2:6, 7) ʻI he konga ki mui ʻo e vahe tatau pē, naʻá ne fakahaaʻi ai ko e kakai ʻa Sihová ʻe fakamaʻa kinautolu kae malava ke nau “faivelenga maʻá e ngaahi ngāue leleí.” (Tai. 2:14) Ko e taha ʻi he ngaahi ngāue lelei ko iá ko e malanga mo faiako ʻo fekauʻaki mo e Puleʻanga ʻo e ʻOtuá. Kapau ko ha toʻutupu koe, te ke ngāueʻaki ʻa e mālohi ʻo hoʻo kei talavoú ke hoko ko ha tāimuʻa tokoni pe tāimuʻa tuʻumaʻu?—Pal. 20:29.

Kapau te ke fie hoko ko ha tāimuʻa, fai ha fokotuʻutuʻu ki he founga ʻe lava ke ke fai ai iá. (Luke 14:28-30) Fakatātaá, ʻe lava fēfē ke ke maʻu ha paʻanga feʻunga ke poupouʻi hoʻo ngāue fakafaifekau taimi-kakató? ʻE fēfē nai haʻo maʻu ʻa e ngaahi houa ʻoku fiemaʻú? Lotu kia Sihova ʻo fekauʻaki mo ho tuʻungá. (Saame 37:5) Talanoa ki hoʻo ongo mātuʻá ʻo fekauʻaki mo hoʻo palaní pea pehē ki he faʻahinga kuo nau lavameʻa ʻi he ngāue tāimuʻá. Pea ngāue leva ke aʻusia hoʻo taumuʻá. ʻE tāpuakiʻi ʻe Sihova hoʻo ngaahi feinga faivelenga ʻi heʻene ngāué!

SIO ʻI HE VITIŌ TOʻUTUPU ʻOKU NAU FAKALĀNGILANGIʻI ʻA SIHOVA, PEA TALI LEVA ʻA E NGAAHI FEHUʻI KO ENÍ:

• Ko e hā ʻa e ngaahi pole kuo ikuʻi ʻe he niʻihi ke hoko ai ko ha tāimuʻá, pea naʻa nau fakahoko fēfē ia?

• ʻE lava fēfē ke tokoniʻi ʻe he ngaahi mātuʻá ʻenau fānaú ke nau tāimuʻa tuʻumaʻu?

• Ko e hā ʻoku mahuʻinga ai ke ʻi ai ha taimi-tēpile ki he ngāue fakamalangá?

• ʻE lava fēfē ke fakalototoʻaʻi mo tokoniʻi ʻe he ngaahi mēmipa ʻo e fakatahaʻangá ha tāimuʻa?

• Ko e hā ʻa e ngaahi tāpuaki ʻoku maʻu ʻe he faʻahinga ʻoku nau tāimuʻá?