Ngaahi Tafaʻaki ʻAonga ʻo e Fiefia ʻi he Moʻuí ʻo Taʻengata!

ʻOkú ke saiʻia ʻi hono ngāueʻaki ʻa e ngaahi vitioó mo e ngaahi fehuʻi fakatupu fakakaukau ʻi he tohi Fiefia ʻi he Moʻuí ʻo Taʻengata!? ʻOku fēfē ʻa e ngaahi tafaʻaki “ʻOku Pehē ʻe he Niʻihi,” “Meʻa ke Fai,” mo e “Ako Lahi Ange”? Ko e hā mo ha ngaahi tafaʻaki kehe ʻokú ke ʻiloʻi ʻoku ʻaonga kiate koe ʻi hoʻo fakahoko ha ako Tohi Tapu?​—Māt. 28:19, 20.

Maʻuʻanga Fakamatala: Kapau ʻokú ke saiʻia ʻi hono ngāueʻaki ʻa e tohi kuo pulusí ki he fakahoko ha ako Tohi Tapu, ʻe lava fēfē ke ke maʻu kotoa ʻa e ngaahi vitiō mo e maʻuʻanga fakamatala kehé ʻi he feituʻu pē ʻe taha? ʻI he tohi fakaʻilekitulōniká, fili ha taha mei he konga tefito ʻe faá. ʻI he ngataʻanga ʻo e fakahokohoko ʻo e ngaahi lēsoní, ʻe lava ke ke fili ʻa e kotoa ʻo e maʻuʻanga fakamatala ki he konga tonu ko iá. (Sio ki he fakatātā 1.)

“Tatau Kuo Pulusí”: Kapau ʻokú ke ako mo ha tokotaha ʻi ha meʻangāue fakaʻilekitulōnika, ʻe tokoni nai kapau te ke lomi ʻa e “Tatau Kuo Pulusí” ʻi he lolotonga ʻa e akó. Ke maʻu ení, ʻi he lēsoní lomi ʻa e toti ʻe tolu ʻi he tuliki taupotu ki ʻolunga ʻo e pēsí pea fili ʻa e “Tatau Kuo Pulusí.” ʻE tokoni eni ke ke hanganaki fakakaukau ai ki he anga ʻo e felāveʻi ʻa e fakamatala ʻokú ke lāulea ki aí mo e kaveinga ʻo e lēsoni ko iá. Ke toe foki ki he tatau fakaʻilekitulōniká, lomi ʻa e toti ʻe tolú, pea fili ʻa e “Tatau Fakaʻilekitulōnika.”

“ʻOku Ou Mateuteu?”: Ko e ngaahi puha ko eni ʻoku ʻi he ngataʻanga ʻo e tohí ʻoku fakamatalaʻi ai ʻa e tuʻunga taau ki he ngāue fakamalanga mo e fakatahaʻangá pea hoko ʻo papitaisó. (Sio ki he fakatātā 2.)

Fakamatala ʻi he Ngataʻanga: ʻOku ʻomai ai ha fakamatala fekauʻaki mo e ngaahi kaveinga mahuʻinga. ʻOku ʻi ai ha link ʻi he tohi fakaʻilekitulōniká ʻi he ngataʻanga taki taha ʻo e fakamatala ʻi he ngataʻangá ʻa ia te ne ʻave koe ki he meʻa naʻá ke ngata aí. (Sio ki he fakatātā 2.)