Ko e Hā ʻOku Lava Moʻoni Ke Ne Tala Ho Kahaʻú?
ʻOku tui ʻa e tokolahi ʻoku puleʻi honau kahaʻú ʻe ha ngaahi mālohi taʻehāmai. Ko ia ai, ʻoku nau muimui ki he ngaahi tōʻonga ʻoku nau ongoʻi te ne ʻomai ha monū ki honau kahaʻú.
MEʻA ʻOKU TUI KI AI ʻA E TOKOLAHI
VAVALO KI HE FETUʻÚ: ʻOku tui ʻa e kakai ʻe niʻihi ko honau kahaʻú ʻoku makatuʻunga ia ʻi he tuʻu ʻa e fetuʻú ʻi he taimi naʻe fanauʻi ai kinautolú. ʻOku nau kumi ki he ngaahi fakamatala vavalo fakaʻasitalolosia ke ʻiloʻi honau tufakangá pea nau fai leva ha meʻa ke fakaʻehiʻehi mei ha fakatamaki pe ke lavameʻa.
FAI PELE: ʻOku tui ʻa e niʻihi ko e kumi tokoni ki he kau fai pelé ʻe lava ke ne fakapapauʻi ʻa e ʻuhinga ʻoku hoko ai ha ngaahi meʻa kiate kinautolu mo e meʻa ʻoku fiemaʻu ke nau faí. ʻI heʻenau ʻiloʻi pē ʻa e ʻuhingá, ʻoku lava leva ke nau fakaʻehiʻehi mei ha fakatuʻutāmaki ʻe hoko nai kiate kinautolu, kumi ha fakaleleiʻanga ki he palopalemá, pea hoko ʻo lavameʻa.
LOTU KI HE FANGA KUÍ: Ka ko e niʻihi ʻoku nau tui kuo pau ke nau fakafiemālieʻi ʻenau fanga kui kuo maté pe ko e ngaahi ʻotuá ke maʻu ha maluʻi pe ko hanau tāpuaki. Ko Van,a ʻoku nofo ʻi Vietinemi, ʻokú ne pehē, “Naʻá ku tui ko hono fai ha fakaʻapaʻapa ki heʻeku fanga kuí, te u maʻu ai ha moʻui lelei ange he taimí ni mo ha kahaʻu malu maʻaku mo ʻeku fānaú.”
TOE FANAUʻI SINO FOʻOU: ʻOku vakai ʻa e tokolahi ki he moʻuí ko ha vilo takai hokohoko, mate, pea toe fanauʻi sino foʻou. ʻOku nau tui ko e meʻa lelei pe kovi ʻoku nau hokosia he taimi ní ko e ola ia ʻo ha meʻa naʻe hoko ʻi heʻenau moʻui ki muʻá.
Neongo ia, ko e tokolahi ʻoku nau vakai ki he ngaahi meʻa ko ení ko ha tui fakafaʻahikehe. Ka ʻoku nau kei ngāueʻaki pē ʻa e tala ʻa e kahaʻú mei he laine ʻo e ʻaofinimá, ʻasitalolosiá, papa Ouija®, pele fakatātaá mo e ngaahi meʻa pehē. ʻOku nau pehē mahalo ʻoku ʻi ai pē ha tokoni ʻa e ngaahi tōʻonga ko ení ke nau ʻilo honau kahaʻú.
KO E HĀ ʻA E OLÁ?
Kuo maʻu ʻe he faʻahinga ʻoku nau falala ki he ngaahi tui mo e ngaahi tōʻonga peheé ha moʻui ʻoku lelei mo ha kahaʻu malu?
Fakakaukau ki he hokosia ʻa Hào, ʻoku nofo ʻi Vietinemi. Naʻá ne hanga ki he vavalo ki he fetuʻú, vavalo ʻi ʻĒsiá mo e lotu ki he fanga kuí ki ha tataki. Naʻá ne lavameʻa? ʻOku pehē ʻe Hào, “Naʻe mole ʻeku pisinisí, maʻu ha moʻua lahi, palopalema hoku fāmilí, pea lōmekina fakaeongo au.”
Ko Qiuming, mei Taiuani, naʻá ne tui foki ki he vavalo ki he fetuʻú, toe fanauʻi sino foʻoú, tufakangá, vavalo ʻi ʻĒsiá mo e lotu ki he fanga kuí. Hili hono sivisiviʻi fakalelei ʻa e ngaahi kaveinga ko ení, naʻá ne pehē: “Naʻá ku ʻiloʻi ko e ngaahi akonaki mo e anga fakafonua ko iá ʻoku nau fepakipaki mo fakapuputuʻu. Naʻá ku ʻiloʻi ko e ngaahi vavalo fakaʻasitalolosiá naʻe faʻa hala. Pea ko e fanauʻi sino foʻoú, kapau ʻoku ʻikai ke ke manatuʻi hoʻo moʻui ki muʻá, ʻe lava fēfē ke ke liliu mo fai ha meʻa lelei ange ʻi hoʻo moʻui hokó?”
“Naʻá ku ʻiloʻi ko e ngaahi akonaki mo e anga fakafonua ko iá ʻoku nau fepakipaki mo fakapuputuʻu.”—QIUMING, TAIUANI
Hangē ko Hào, Qiuming mo e tokolahi kehe kuo nau ʻiloʻi, ko hotau kahaʻú ʻoku ʻikai ke fakapapauʻi ia ʻe he tufakangá, fetuʻú, fanga kui kuo maté pe ko e fanauʻi foʻoú. ʻOku ʻuhinga ení heʻikai pē lava ke tau puleʻi hotau kahaʻú?
ʻOku ongoʻi ʻe he tokolahi ko e founga ke fakapapauʻi ai ha kahaʻu lelei angé ko ʻenau tuli ki he ako māʻolunga angé mo e koloá. Ko e hā ʻa e meʻa kuo hoko ki he niʻihi kuo nau fai ʻa e fili ko iá?
a ʻI he kupu ko ení mo e ngaahi kupu hokó, kuo liliu ʻa e ngaahi hingoa ʻe niʻihi.
b Ko e lea ko ení ʻoku maʻu ia ʻi he Tohi Tapu Māʻoniʻoní ʻi he Kalētia 6:7. Ko e foʻi fakakaukau ko iá ʻoku fakamatalaʻi ʻi ha lea ʻiloa ʻi ʻĒsia Tō meleni pea te ke maʻu ʻa e meleni; tō piini pea te ke maʻu ʻa e piini.