Koeʻuhi Pē ko ha Malimali!

NAʻE ʻalu fakataha ha ongo finemui ki ha feituʻu pisinisi ʻi he Kolo Baguio, ʻi he ʻOtu Motu Filipainí. Naʻá na fakatokangaʻi ha papa faifakamoʻoni, ka naʻe ʻikai ke na ʻalu ki ai. Ko Helen, ʻa e tuofefine naʻe tuʻu ʻi he tafaʻaki ʻo e papá, naʻá ne malimali atu kiate kinaua. Naʻe hoko atu ʻena lué, ka naʻe maongo kiate kinaua ʻa e malimali loto-māfana ʻa Helen.

Ki mui ai, ʻi he heka atu ʻa e ongo fefiné he pasí ki honau ʻapí, naʻá na fakatokangaʻi ha fakaʻilonga ʻo e jw.org ʻi ha Fale Fakatahaʻanga. Naʻá na manatuʻi ko e fakaʻilonga tatau pē mo ia naʻá na sio ki ai ki muʻa ange ʻi he papa faifakamoʻoní. Naʻá na hifo mei he pasí ke vakaiʻi ʻa e taimi-tēpile ki he fakataha ʻa e ngaahi fakatahaʻangá ʻi he ʻā ʻo e Fale Fakatahaʻangá.

Naʻe maʻu ʻe he ongo fefiné ʻa e taha ʻo e ngaahi fakataha hokó. Pea ko hai naʻá na sio ki ai ʻi heʻena hū ki he Fale Fakatahaʻangá? Ko Helen! Naʻá na ʻohovale ʻi heʻena ʻiloʻi ʻa e tokotaha naʻe malimali angé. ʻOku pehē ʻe Helen, “ʻI heʻena lue mai kiate aú, naʻá ku ongoʻi manavasiʻi. Naʻá ku fakakaukau mahalo naʻá ku fai ha kovi.” Ka naʻe fakamatala ange ʻe he ongo fefiné kia Helen ʻa e meʻa naʻe hokó.

Naʻe fiefia ʻa e ongo finemuí ʻi hono maʻu ʻa e fakatahá pea naʻá na ongoʻi fiemālie ʻi he feohi mo e fanga tokouá. ʻI heʻena sio ki he fakamaʻa ʻe he niʻihi ʻa e fale fakatahaʻangá ʻi he tuku ʻa e fakatahá, naʻá na tala ange pe ʻe sai pē ke na tokoni. Ko e taha ʻi he ongo fefiné kuó ne mavahe mei he ʻOtu Motu Filipainí, ka ʻoku kamata ke maʻu fakataha ʻa e fefine ʻe tahá pea ako ʻa e Tohi Tapú​—koeʻuhi pē ko ha malimali!